തിരുവനന്തപുരം: സംസ്ഥാനത്ത് വലിയ രാഷ്ട്രീയ ചർച്ചകൾക്കും വിവാദങ്ങൾക്കും വഴിവെച്ച വൈദ്യുതി പർച്ചേസ് തർക്കത്തിന് വിരാമം. മുഖ്യമന്ത്രി വി.ഡി. സതീശനും വൈദ്യുതി മന്ത്രി സണ്ണി ജോസഫും തമ്മിലുണ്ടായ ഭിന്നതകൾക്ക് പരിഹാരം കാണുന്നതിന്റെ ഭാഗമായി ഔദ്യോഗിക വസതിയായ ക്ലിഫ് ഹൗസിൽ നിർണായക ചർച്ച നടന്നു. മന്ത്രി രമേശ് ചെന്നിത്തലയുടെ സാന്നിധ്യത്തിലായിരുന്നു ബുധനാഴ്ച രാത്രി അനുരഞ്ജന ചർച്ച നടന്നത്. ഒരു മണിക്കൂറോളം നീണ്ട കൂടിക്കാഴ്ചയോടെ സർക്കാരിനുള്ളിലെ അസ്വാരസ്യങ്ങൾക്ക് താൽക്കാലിക വിരാമമായിരിക്കുകയാണ്.
വൈദ്യുതി വാങ്ങുന്നതുമായി ബന്ധപ്പെട്ട വിഷയങ്ങളിൽ വകുപ്പ് മന്ത്രിയെ ഒഴിവാക്കി ഉദ്യോഗസ്ഥരുമായി മുഖ്യമന്ത്രി നേരിട്ട് ചർച്ച നടത്തിയതും, കരാർ റദ്ദാക്കിയ തീരുമാനം മാധ്യമങ്ങളിലൂടെ അറിഞ്ഞുവെന്ന മന്ത്രി സണ്ണി ജോസഫിന്റെ പരസ്യപ്രസ്താവനയും വലിയ കോലാഹലങ്ങൾ സൃഷ്ടിച്ചിരുന്നു. കെ.എസ്.ഇ.ബി ചെയർമാൻ എൻ. പ്രശാന്ത്, ഊർജവകുപ്പ് സെക്രട്ടറി പുനീത്കുമാർ എന്നിവരുമായി മുഖ്യമന്ത്രി നടത്തിയ ചർച്ചകൾ മന്ത്രിയുടെ അറിവോടെയല്ലെന്ന രീതിയിൽ പുറത്തുവന്ന വാർത്തകൾ സർക്കാരിന് അകത്തും പുറത്തും ചർച്ചയായിരുന്നു.
എന്നാൽ, ഉദ്യോഗസ്ഥരുമായി നടത്തിയ ചർച്ചകൾ തികച്ചും യാദൃശ്ചികമായിരുന്നുവെന്നും വകുപ്പ് മന്ത്രിയെ ഒഴിവാക്കി ഏകപക്ഷീയമായി തീരുമാനമെടുത്തിട്ടില്ലെന്നും മുഖ്യമന്ത്രി കൂടിക്കാഴ്ചയിൽ വിശദീകരിച്ചതായാണ് സൂചന.ബോർഡിന്റെ ശുപാർശകളും വൈദ്യുതി വാങ്ങലിലെ ലാഭനഷ്ടങ്ങളും സംബന്ധിച്ച് തനിക്കുണ്ടായ പ്രയാസങ്ങളും അതൃപ്തിയും മന്ത്രി സണ്ണി ജോസഫ് മുഖ്യമന്ത്രിയെ നേരിട്ട് ധരിപ്പിച്ചു. മന്ത്രിയുടെ പരസ്യ പ്രതികരണങ്ങൾക്ക് പിന്നാലെ പാർട്ടി തലത്തിലും മുന്നണി തലത്തിലും ഉണ്ടായ അസ്വസ്ഥതകൾ ഒഴിവാക്കാൻ മുതിർന്ന നേതാവ് രമേശ് ചെന്നിത്തലയുടെ നേതൃത്വത്തിൽ ഇടപെടലുകൾ നടക്കുകയായിരുന്നു. വിവാദങ്ങൾ നീണ്ടുപോകുന്നത് സർക്കാരിന് പ്രതിച്ഛായക്ക് കോട്ടമുണ്ടാക്കുമെന്ന വിലയിരുത്തലിന്റെ അടിസ്ഥാനത്തിലാണ് പ്രശ്നങ്ങൾക്ക് പെട്ടെന്ന് തന്നെ പരിഹാരം കണ്ടത്.
