തിരുവനന്തപുരം: തലസ്ഥാന നഗരത്തിലെ പ്രധാന വ്യാപാര കേന്ദ്രമായ ചാലയിൽ വൻ സ്വർണക്കവർച്ച. കടയടച്ച് വീട്ടിലേക്ക് മടങ്ങുകയായിരുന്ന ജ്വല്ലറി ഉടമയെ പിന്തുടർന്നെത്തിയ ബൈക്ക് സംഘം രണ്ട് കിലോയോളം സ്വർണം കവർന്നു. ചാലയിലെ വൈഷ്ണവി ജ്വല്ലറി ഉടമ മഹാരാഷ്ട്ര സ്വദേശി നന്ദകുമാറിന്റെ പക്കൽ നിന്നാണ് സ്വർണമടങ്ങിയ ബാഗ് തട്ടിപ്പറിച്ചത്. വ്യാഴാഴ്ച രാത്രി പതിനൊന്ന് മണിയോടെ ചാല സഭാവതി കോവിൽ റോഡിൽ വച്ചാണ് നാടിനെ നടുക്കിയ കവർച്ച അരങ്ങേറിയത്.
കടയടച്ച ശേഷം സ്വർണവുമായി വലിയശാലയിലുള്ള വീട്ടിലേക്ക് ഇരുചക്രവാഹനത്തിൽ പോകുകയായിരുന്നു ജ്വല്ലറി ഉടമ. ഈ സമയം ബൈക്കുകളിലെത്തിയ സംഘം ഇദ്ദേഹത്തെ പിന്തുടരുകയും സഭാവതി കോവിൽ റോഡിലെത്തിയപ്പോൾ തടഞ്ഞുനിർത്തി സ്വർണം സൂക്ഷിച്ചിരുന്ന ബാഗ് തട്ടിപ്പറിച്ച് അതിവേഗം കടന്നുകളയുകയുമായിരുന്നു. മറ്റ് കടകളിൽ നിന്നടക്കം ശേഖരിക്കുന്ന പഴയ സ്വർണം ഉരുക്കി ശുദ്ധീകരിക്കുന്നതിനായി പതിവായി വീട്ടിലേക്ക് കൊണ്ടുപോകാറുണ്ടായിരുന്നുവെന്ന് വ്യാപാരികൾ പറയുന്നു. ഇക്കാര്യം കൃത്യമായി നിരീക്ഷിച്ച് മനസ്സിലാക്കിയ സംഘമാണ് കവർച്ചയ്ക്ക് പിന്നിലെന്നാണ് പൊലീസിന്റെ പ്രാഥമിക നിഗമനം.
സംഭവത്തിൽ ഫോർട്ട് പൊലീസും ഡാൻസാഫ് സംഘവും സംയുക്തമായി അന്വേഷണം ഊർജിതമാക്കിയിട്ടുണ്ട്.കവർച്ചയ്ക്ക് ശേഷം അക്രമികൾ ബൈക്കിൽ കടന്നുകളയുന്ന സിസിടിവി ദൃശ്യങ്ങൾ പൊലീസിന് ലഭിച്ചിട്ടുണ്ട്.പ്രദേശത്തെയും സമീപ റോഡുകളിലെയും കൂടുതൽ സിസിടിവി ക്യാമറകൾ കേന്ദ്രീകരിച്ചും പ്രതികൾ സഞ്ചരിച്ച ബൈക്കിന്റെ നമ്പർ തിരിച്ചറിയാനുമുള്ള ശ്രമങ്ങൾ പൊലീസ് തുടരുകയാണ്. തിരക്കേറിയ ചാല കമ്പോളത്തിന്റെ ചരിത്രത്തിൽ ഇതാദ്യമായാണ് ഇത്തരത്തിൽ വൻ സ്വർണക്കവർച്ച റിപ്പോർട്ട് ചെയ്യുന്നത്. നഗരമധ്യത്തിൽ നടന്ന ഈ കവർച്ച ചാലയിലെ വ്യാപാരികൾക്കിടയിലും വലിയ ആശങ്കയ്ക്കും സുരക്ഷാ ഭീഷണിക്കും ഇടയാക്കിയിട്ടുണ്ട്.
