കോട്ടയം: കേരള രാഷ്ട്രീയത്തിൽ വലിയ ചർച്ചകൾക്ക് വഴിവെച്ച മുഖ്യമന്ത്രി വി.ഡി. സതീശനും എൻ.എസ്.എസ് ജനറൽ സെക്രട്ടറി ജി. സുകുമാരൻ നായരും തമ്മിലുള്ള വർഷങ്ങൾ നീണ്ട പിണക്കത്തിന് ഒടുവിൽ വിരാമം.സതീശനുമായുള്ള എല്ലാ അഭിപ്രായ ഭിന്നതകളും പരസ്പരം സംസാരിച്ച് അവസാനിപ്പിച്ചതായും പെരുന്നയിൽ നടക്കുന്ന മന്നം ജയന്തി ആഘോഷങ്ങളിൽ മുഖ്യമന്ത്രി പങ്കെടുക്കുമെന്നും ജി. സുകുമാരൻ നായർ വ്യക്തമാക്കി. ഇരുവരും തമ്മിലുള്ള മഞ്ഞുരുക്കം സംസ്ഥാന രാഷ്ട്രീയത്തിലും സാമുദായിക സമവാക്യങ്ങളിലും വലിയ ചലനങ്ങൾക്കാണ് വഴിവെച്ചിരിക്കുന്നത്.
മുഖ്യമന്ത്രിയെ ഫോണിൽ വിളിച്ച് മന്നം ജയന്തി ആഘോഷങ്ങളിലേക്ക് നേരിട്ട് ക്ഷണിച്ചതായും ഔദ്യോഗികമായി കത്തയച്ചതായും സുകുമാരൻ നായർ മാധ്യമങ്ങളോട് പറഞ്ഞു. ക്ഷണം സ്വീകരിച്ച മുഖ്യമന്ത്രി പരിപാടിക്ക് എത്താമെന്ന് മറുപടി നൽകിയിട്ടുണ്ട്. മുൻപ് നടത്തിയ പരാമർശങ്ങൾ അതത് സാഹചര്യങ്ങളിൽ പറഞ്ഞുപോയതാണെന്ന് മുഖ്യമന്ത്രി വ്യക്തമാക്കിയതായും അതെല്ലാം താൻ മറന്നുവെന്നും സുകുമാരൻ നായർ കൂട്ടിച്ചേർത്തു. ഇതോടെ ഏറെക്കാലമായി തുടർന്നിരുന്ന പരസ്യമായ ഏറ്റുമുട്ടലുകൾക്കും അകൽച്ചയ്ക്കുമാണ് അവസാനമായിരിക്കുന്നത്.
2021-ൽ പ്രതിപക്ഷ നേതാവായി തിരഞ്ഞെടുക്കപ്പെട്ടതിന് പിന്നാലെ വി.ഡി. സതീശൻ നടത്തിയ ചില പരാമർശങ്ങളാണ് എൻ.എസ്.എസ് നേതൃത്വവുമായുള്ള രൂക്ഷമായ ഭിന്നതകൾക്ക് തുടക്കമിട്ടത്. രാഷ്ട്രീയ നേതാക്കൾ സാമുദായിക നേതാക്കളുടെ ‘തിണ്ണ നിരങ്ങാൻ’ പോകരുതെന്നും, സമുദായ നേതാക്കൾ ഇരിക്കാൻ പറയുമ്പോൾ രാഷ്ട്രീയക്കാർ കിടക്കരുതെന്നുമുള്ള സതീശന്റെ പ്രസ്താവന സുകുമാരൻ നായരെ വല്ലാതെ ചൊടിപ്പിച്ചിരുന്നു. ഇതിന് പിന്നാലെ ഇരുവരും തമ്മിൽ രൂക്ഷമായ വാക്പോരുകൾ ഉണ്ടാവുകയും, മറ്റ് കോൺഗ്രസ് നേതാക്കളിൽ നിന്ന് വ്യത്യസ്തമായി സതീശൻ പെരുന്നയിലെ എൻ.എസ്.എസ് ആസ്ഥാനം സന്ദർശിക്കുന്നത് പൂർണ്ണമായും ഒഴിവാക്കുകയും ചെയ്തിരുന്നു.
ഇരുവരും തമ്മിലുള്ള അകൽച്ച കോൺഗ്രസിനുള്ളിലും മുന്നണിയിലും വലിയ തലവേദന സൃഷ്ടിച്ചിരുന്നു. എന്നാൽ,വി.ഡി. സതീശൻ മുഖ്യമന്ത്രി പദത്തിലെത്തിയതിന് പിന്നാലെ ബന്ധം മെച്ചപ്പെടുത്താനുള്ള നീക്കങ്ങൾ അണിയറയിൽ സജീവമായിരുന്നു. ഒടുവിൽ എല്ലാ പരിഭവങ്ങളും മാറ്റിവെച്ച് മുഖ്യമന്ത്രി പെരുന്നയിലേക്ക് എത്താൻ തീരുമാനിച്ചതോടെ കേരള രാഷ്ട്രീയത്തിലെ ഏറ്റവും ശ്രദ്ധേയമായ ഒരു അനുരഞ്ജനത്തിനാണ് കളമൊരുങ്ങിയിരിക്കുന്നത്.
