കൊച്ചി നഗരത്തിലെ രാത്രികാല ലഹരിക്കച്ചവടം പ്രധാനമായും ബാറുകളിലല്ല, മറിച്ച് ചില തട്ടുകടകളും ചായക്കടകളും കേന്ദ്രീകരിച്ചാണ് നടക്കുന്നതെന്ന് കേരള ഹൈക്കോടതി. രാത്രി 11 മണിക്ക് ശേഷം നഗരത്തിലൂടെ ഒന്ന് സഞ്ചരിച്ചാൽ ഈ ഞെട്ടിക്കുന്ന യാഥാർത്ഥ്യം നേരിട്ട് കാണാനാകുമെന്ന് ഡിവിഷൻ ബെഞ്ച് നിരീക്ഷിച്ചു. എന്നാൽ, നഗരത്തിലെ എല്ലാ ചായക്കടകളിലും ലഹരിക്കച്ചവടം നടക്കുന്നുണ്ടെന്നല്ല ഉദ്ദേശിക്കുന്നതെന്നും, ചില പ്രത്യേക കേന്ദ്രങ്ങളെ മറയാക്കിയാണ് മാഫിയകൾ പ്രവർത്തിക്കുന്നതെന്നും കോടതി വ്യക്തമാക്കി.
റാഡിസൺ ബ്ലൂ കേസുമായി ബന്ധപ്പെട്ട് സർക്കാർ സമർപ്പിച്ച അപ്പീൽ പരിഗണിക്കവെയാണ് ഹൈക്കോടതിയുടെ ഈ നിർണ്ണായക പരാമർശങ്ങൾ. ആദ്യം രാത്രികാല ചായക്കടകൾ കേന്ദ്രീകരിച്ച് നടക്കുന്ന ലഹരിവിൽപ്പനയും വിതരണവും തടയാനാണ് സർക്കാർ നടപടിയെടുക്കേണ്ടതെന്നും, അതിനുശേഷം ബാറുകളുടെ നിയന്ത്രണത്തിലേക്ക് കടക്കാമെന്നും കോടതി നിർദ്ദേശിച്ചു. പൊലീസ് നടത്തിയ ‘തൂഫാൻ’ പരിശോധനയിൽ എത്ര ചായക്കടകൾക്കെതിരെ നടപടിയെടുത്തിട്ടുണ്ടെന്ന് കോടതി സർക്കാരിനോട് ചോദിച്ചു.
രാത്രി 12 മണിക്ക് ശേഷമാണ് നഗരത്തിലേക്ക് ലഹരിവസ്തുക്കൾ എത്തുന്നതെന്ന വാദം ശരിയല്ലെന്നും, അതിനുമുമ്പ് തന്നെ ലഹരി കൈമാറ്റങ്ങൾ സജീവമാണെന്നും കോടതി ചൂണ്ടിക്കാട്ടി. അതേസമയം, ഡി.ജെ (DJ) പാർട്ടികൾക്ക് അനുമതി നൽകാനാവില്ലെന്ന് പൊലീസിന് ഏകപക്ഷീയമായി നിലപാടെടുക്കാനാകില്ലെന്നും ഡിവിഷൻ ബെഞ്ച് നിരീക്ഷിച്ചു. ഡി.ജെ എന്നത് സംഗീതം നിയന്ത്രിക്കുന്ന ഒരു വ്യക്തി മാത്രമാണെന്നും അതിനപ്പുറം മറ്റൊന്നുമല്ലെന്നും കോടതി വ്യക്തമാക്കി. ഡി.ജെ ഇല്ലെങ്കിലും ബാറുകളിൽ പൈപ്പ്ഡ് മ്യൂസിക്കും ഉച്ചത്തിലുള്ള സംഗീതവും നിലവിലുണ്ടെന്നും കോടതി ചൂണ്ടിക്കാട്ടി.
എന്നാൽ, ബാറുകൾ പുലർച്ചെ മൂന്ന് മണി വരെ പ്രവർത്തിക്കാൻ അനുവദിച്ചാൽ, പുറത്തുനിന്ന് ലഹരി ഉപയോഗിക്കുന്നവർ അവിടേക്ക് എത്താൻ സാധ്യതയുണ്ടെന്ന ആശങ്കയും കോടതി പങ്കുവെച്ചു. കൊച്ചി നഗരത്തിലെ രാത്രികാല ജീവിതവും ലഹരി ഉപയോഗവും നിയന്ത്രിക്കുന്നതിൽ പൊലീസിന്റെയും എക്സൈസിന്റെയും ഭാഗത്തുനിന്നുണ്ടാകുന്ന വീഴ്ചകളിലേക്ക് വിരൽചൂണ്ടുന്നതാണ് ഹൈക്കോടതിയുടെ ഈ നിരീക്ഷണങ്ങൾ.
