ഇന്ത്യ തദ്ദേശീയമായി വികസിപ്പിച്ച ലൈറ്റ് കോംബാറ്റ് എയർക്രാഫ്റ്റ് (LCA) തേജസ് മാർക്ക് 1എ ഈ സാമ്പത്തിക വർഷത്തിനുള്ളിൽ ഇന്ത്യൻ വ്യോമസേനയുടെ ഭാഗമാകുമെന്ന് വ്യോമസേനാ മേധാവി എയർ ചീഫ് മാർഷൽ അശുതോഷ് ദീക്ഷിത് അറിയിച്ചു. ഡൽഹിയിൽ നടന്ന എഎൻഐ നാഷണൽ സെക്യൂരിറ്റി സമ്മിറ്റ് 3.0ൽ സംസാരിക്കുകയായിരുന്നു അദ്ദേഹം. ആദ്യ ഘട്ടത്തിൽ ഒരു സ്ക്വാഡ്രൺ വിമാനങ്ങൾ വ്യോമസേനയിൽ ഉൾപ്പെടുത്തും. തുടർന്ന് കൂടുതൽ വിമാനങ്ങൾ എത്തിക്കുന്നതിനും അവയുടെ ശേഷി വികസിപ്പിക്കുന്നതിനും നടപടികൾ തുടരുമെന്നും അദ്ദേഹം പറഞ്ഞു. ഇന്ത്യയുടെ പ്രതിരോധ മേഖലയിൽ സ്വയംപര്യാപ്തത കൈവരിക്കുന്നതിനുള്ള പ്രധാന ചുവടുവയ്പ്പായാണ് തേജസ് പദ്ധതിയെ അദ്ദേഹം വിശേഷിപ്പിച്ചത്. പൂർണമായും രൂപകൽപ്പന ചെയ്ത് വികസിപ്പിച്ച് പരീക്ഷണം നടത്തി രാജ്യത്ത് തന്നെ നിർമ്മിക്കുന്ന യുദ്ധവിമാനങ്ങൾ സ്വന്തമാക്കാൻ ലോകത്തിലെ ചുരുക്കം ചില രാജ്യങ്ങൾക്കേ കഴിഞ്ഞിട്ടുള്ളൂവെന്നും അദ്ദേഹം ചൂണ്ടിക്കാട്ടി.
തേജസ് വിമാനത്തിന്റെ വികസനത്തിൽ രാജ്യത്തുടനീളമുള്ള 600 മുതൽ 700 വരെ ഗവേഷണ കേന്ദ്രങ്ങളും ലബോറട്ടറികളും പങ്കാളികളായിട്ടുണ്ടെന്ന് ദീക്ഷിത് വ്യക്തമാക്കി. ഐഐടികൾ, സിഎസ്ഐആർ സ്ഥാപനങ്ങൾ, റെയിൽവേ ലബോറട്ടറികൾ തുടങ്ങിയവയും പദ്ധതിയുടെ ഭാഗമായിരുന്നു. ആദ്യഘട്ട പരീക്ഷണങ്ങളിൽ കണ്ടെത്തിയ നാല് പ്രധാന പോരായ്മകൾ പരിഹരിക്കാൻ ഹിന്ദുസ്ഥാൻ എയറോനോട്ടിക്സ് ലിമിറ്റഡുമായി (HAL) ചേർന്ന് വ്യോമസേന പ്രവർത്തിച്ചു. ഇതിനായി വ്യോമസേനയുടെ കൈവശമുണ്ടായിരുന്ന ഒരു തേജസ് വിമാനം വികസന പ്രവർത്തനങ്ങൾക്ക് കൈമാറുകയും ചെയ്തു. ഈ നാല് മേഖലകളിലെയും മെച്ചപ്പെടുത്തലുകൾ ഏതാണ്ട് പൂർത്തിയായിട്ടുണ്ട്. ഡിആർഡിഒ വികസിപ്പിച്ച പുതിയ ആയുധ സംവിധാനങ്ങൾ വിമാനത്തിൽ സംയോജിപ്പിക്കുന്നതിനൊപ്പം നിരവധി പരീക്ഷണങ്ങളും നടത്തിയിട്ടുണ്ട്. എൻജിൻ ലഭ്യതയിലെ കാലതാമസവും സാങ്കേതിക പരിശോധനകളും ആയിരുന്നു തേജസ് മാർക്ക് 1എയുടെ കൈമാറ്റം വൈകാൻ പ്രധാന കാരണങ്ങൾ.
അതേസമയം, തേജസ് മാർക്ക് 1എയ്ക്ക് പിന്നാലെ കൂടുതൽ ശേഷിയുള്ള മാർക്ക് 2 വിമാനത്തിന്റെ വികസനവും പുരോഗമിക്കുകയാണ്. അടുത്ത വർഷം മാർക്ക് 2 വിമാനത്തിന്റെ ആദ്യ രൂപം പുറത്തിറക്കാനാകുമെന്നാണ് പ്രതീക്ഷയെന്ന് വ്യോമസേനാ മേധാവി പറഞ്ഞു. അഡ്വാൻസ്ഡ് മീഡിയം കോംബാറ്റ് എയർക്രാഫ്റ്റ് (AMCA) പദ്ധതിയിലും പ്രവർത്തനങ്ങൾ വേഗത്തിലാക്കിയിട്ടുണ്ട്. ഭാവിയിൽ വികസിപ്പിക്കുന്ന അത്യാധുനിക യുദ്ധവിമാനങ്ങൾക്കുള്ള സാങ്കേതികവിദ്യകൾ ഈ പദ്ധതികളിലൂടെ ലഭ്യമാക്കുകയാണ് ലക്ഷ്യം. നിലവിൽ വ്യോമസേന നേരിടുന്ന യുദ്ധവിമാന സ്ക്വാഡ്രണുകളുടെ കുറവ് പരിഹരിക്കുന്നതിലും തദ്ദേശീയ വിമാനങ്ങളുടെ വരവ് നിർണായകമാകും. ഏകദേശം 1.1 ലക്ഷം കോടി രൂപയുടെ കരാറുകൾ പ്രകാരം 180 തേജസ് മാർക്ക് 1എ വിമാനങ്ങളാണ് വ്യോമസേനയ്ക്കായി ഓർഡർ ചെയ്തിട്ടുള്ളത്. ഇതിന്റെ ആദ്യ വിമാനങ്ങൾ ഈ സാമ്പത്തിക വർഷം എത്തുമെന്ന പ്രഖ്യാപനം ഇന്ത്യയുടെ പ്രതിരോധ വ്യവസായത്തിന് വലിയ പ്രതീക്ഷയാണ് നൽകുന്നത്.










