കെയ്റോ: രാജ്യത്തെ വ്യോമയാന മേഖലയിൽ വൻ കുതിച്ചുചാട്ടത്തിന് വഴിയൊരുക്കുന്ന നിർണ്ണായക പ്രഖ്യാപനവുമായി കേന്ദ്ര വാണിജ്യ-വ്യവസായ മന്ത്രി പീയൂഷ് ഗോയൽ. രാജ്യം നേരിടുന്ന രൂക്ഷമായ വിമാനക്ഷാമം പരിഹരിക്കുന്നതിനും വർദ്ധിച്ചുവരുന്ന യാത്രക്കാരുടെ തിരക്ക് നിയന്ത്രിക്കുന്നതിനുമായി 1,000 യാത്രാ വിമാനങ്ങൾ (Civilian Aircraft) കൂടി വാങ്ങാൻ ഇന്ത്യ സജ്ജമാണെന്ന് അദ്ദേഹം വ്യക്തമാക്കി. ദ്വിദിന സന്ദർശനത്തിനായി ഈജിപ്തിലെത്തിയ മന്ത്രി, കെയ്റോയിൽ മാധ്യമപ്രവർത്തകരോട് സംസാരിക്കവെയാണ് ഇക്കാര്യം വെളിപ്പെടുത്തിയത്.
നിലവിൽ 1,200-ലധികം വിമാനങ്ങൾക്കുള്ള ഓർഡറുകൾ ഇന്ത്യ നൽകിയിട്ടുണ്ടെങ്കിലും രാജ്യത്തിന്റെ വർദ്ധിച്ചുവരുന്ന ആവശ്യങ്ങൾ നിറവേറ്റാൻ 2,000-ത്തിലധികം വിമാനങ്ങൾ ആവശ്യമാണെന്ന് പീയൂഷ് ഗോയൽ ചൂണ്ടിക്കാട്ടി. ഓർഡർ ചെയ്ത വിമാനങ്ങൾ എത്രയും വേഗം ലഭ്യമാക്കുന്നതിനായി ആഗോളതലത്തിലെ പ്രമുഖ വിമാന നിർമ്മാണ കമ്പനികളുമായി കേന്ദ്ര സർക്കാർ നിരന്തരം ബന്ധപ്പെടുന്നുണ്ടെന്നും അദ്ദേഹം കൂട്ടിച്ചേർത്തു.
ലോകത്തിലെ തന്നെ ഏറ്റവും വേഗത്തിൽ വളരുന്ന വ്യോമയാന വിപണികളിലൊന്നാണ് ഇന്ത്യയുടേത്. ആഭ്യന്തര വിമാനക്കമ്പനികളായ ഇൻഡിഗോയും എയർ ഇന്ത്യയും ഇതിനോടകം തന്നെ എയർബസ്, ബോയിങ് തുടങ്ങിയ പ്രമുഖ കമ്പനികൾക്ക് വമ്പൻ ഓർഡറുകൾ നൽകിയിട്ടുണ്ട്. ഇതിന് പുറമെ, ഇന്ത്യയിൽ വിമാന നിർമ്മാണ മേഖല ശക്തിപ്പെടുത്തുന്നതിന്റെ ഭാഗമായി എയർബസിന് രാജ്യത്ത് രണ്ട് ഫൈനൽ അസംബ്ലി ലൈനുകളുണ്ട്. പ്രതിവർഷം ഏകദേശം 200 കോടി ഡോളറിന്റെ വിമാന ഘടകങ്ങളും സേവനങ്ങളുമാണ് ബോയിങ്ങും എയർബസും ഇന്ത്യയിൽ നിന്ന് വാങ്ങുന്നത്. കൂടാതെ, പ്രാദേശിക വിമാന നിർമ്മാണത്തിനായി ബ്രസീലിയൻ കമ്പനിയായ എംബ്രയർ (Embraer) അദാനി ഗ്രൂപ്പുമായി തന്ത്രപ്രധാനമായ സഹകരണത്തിലും ഏർപ്പെട്ടിട്ടുണ്ട്.
ഇന്ത്യയും ഈജിപ്തും തമ്മിലുള്ള വ്യാപാര-നിക്ഷേപ ബന്ധം ശക്തിപ്പെടുത്തുന്നതിന്റെ ഭാഗമായാണ് മന്ത്രിയുടെ ഈജിപ്ത് സന്ദർശനം. ഇരുരാജ്യങ്ങളും തമ്മിലുള്ള വ്യോമബന്ധം കൂടുതൽ വിപുലീകരിക്കേണ്ടതിന്റെ ആവശ്യകതയും അദ്ദേഹം എടുത്തുപറഞ്ഞു. പുതിയ വിമാനങ്ങൾ എത്തുന്നതോടെ ഇന്ത്യയിൽ നിന്ന് ഈജിപ്തിലേക്ക് കൂടുതൽ നേരിട്ടുള്ള വിമാന സർവീസുകൾ ആരംഭിക്കാൻ വിമാനക്കമ്പനികൾക്ക് സാധിക്കുമെന്നും, ഇത് ഇരുരാജ്യങ്ങളും തമ്മിലുള്ള ടൂറിസം, വ്യാപാര മേഖലകൾക്ക് വലിയ ഉണർവ് നൽകുമെന്നും പീയൂഷ് ഗോയൽ പ്രത്യാശ പ്രകടിപ്പിച്ചു.നിലവിൽ ഈജിപ്ത് എയർ (EgyptAir) ആണ് ഇരുരാജ്യങ്ങൾക്കുമിടയിൽ നേരിട്ടുള്ള സർവീസുകൾ നടത്തുന്നത്.










