മുംബൈയിൽ നടന്ന എർത്ത്ഷോട്ട് പ്രൈസ് (Earthshot Prize) പുരസ്കാര വേദിയിൽ പരമ്പരാഗത ഇന്ത്യൻ വേഷമായ ചുവപ്പ് അനാർക്കലി അണിഞ്ഞെത്തി ലോകശ്രദ്ധ പിടിച്ചുപറ്റിയ ബ്രിട്ടീഷ് രാജകുമാരി കേറ്റ് മിഡിൽടണിന്റെ വസ്ത്രത്തിന് പിന്നിലെ കൗതുകകരമായ വിവരങ്ങൾ പുറത്ത്. വെറും മൂന്ന് ആഴ്ചയ്ക്കുള്ളിൽ നോയിഡയിലെ ഫാക്ടറിയിൽ അതീവ രഹസ്യമായി തയ്യാറാക്കിയ ഈ വസ്ത്രത്തിന് പിന്നിൽ കർശനമായ ‘നോ-പ്ലാസ്റ്റിക്’ നിബന്ധനയും, ചടങ്ങിന് വെറും 30 മിനിറ്റ് മുൻപ് വന്ന ഒരു അപ്രതീക്ഷിത ഫോൺ കോളുമുണ്ടെന്ന് വസ്ത്രം ഡിസൈൻ ചെയ്ത ഡൽഹി സ്വദേശിനി മഹിമ മഹാജൻ വെളിപ്പെടുത്തി.
മുംബൈയിലെ ‘ഗ്രീൻ കാർപെറ്റിലേക്ക്’ ബനാറസി പട്ടുനൂലുകളുടെ പ്രൗഢിയുള്ള, നിലംതൊടുന്ന കടുംചുവപ്പ് അനാർക്കലി അണിഞ്ഞ് വെയിൽസ് രാജകുമാരി എത്തിയതോടെ ആഗോള ഫാഷൻ ലോകം ഒന്നടങ്കം അമ്പരന്നിരുന്നു. മാസങ്ങൾ നീണ്ട തയ്യാറെടുപ്പുകൾക്ക് പകരം വെറും മൂന്ന് ആഴ്ചത്തെ സമയം കൊണ്ടാണ് മഹിമ മഹാജന്റെ നേതൃത്വത്തിലുള്ള സംഘം ഈ വസ്ത്രം ഒരുക്കിയെടുത്തത്. ലണ്ടനിലെ ഒരു പ്രമുഖ ബോട്ടീക്ക് വഴിയാണ് മഹിമയെ ഈ ദൗത്യത്തിനായി സമീപിച്ചത്. പരിസ്ഥിതി സംരക്ഷണവുമായി ബന്ധപ്പെട്ട എർത്ത്ഷോട്ട് പുരസ്കാര വേദിയായതിനാൽ, വസ്ത്രനിർമ്മാണത്തിൽ ഒട്ടും തന്നെ പ്ലാസ്റ്റിക് ഉപയോഗിക്കാൻ പാടില്ലെന്ന കർശന നിബന്ധനയും (No-plastic request) മുന്നോട്ടുവെച്ചിരുന്നു.
സാധാരണയായി അനാർക്കലികളിലും ആഡംബര വസ്ത്രങ്ങളിലും തിളക്കം നൽകുന്നതിനായി പ്ലാസ്റ്റിക് അധിഷ്ഠിതമായ സീക്വിനുകളും മറ്റ് അലങ്കാര വസ്തുക്കളും ഉപയോഗിക്കാറുണ്ട്. എന്നാൽ, രാജകുമാരിയുടെ പ്രത്യേക നിർദ്ദേശപ്രകാരം പ്ലാസ്റ്റിക് പൂർണ്ണമായും ഒഴിവാക്കി, ശുദ്ധമായ ബനാറസി സിൽക്കും പരമ്പരാഗത കൈത്തറി നെയ്ത്തുവിദ്യകളും മാത്രമാണ് ഇതിനായി ഉപയോഗിച്ചത്. നോയിഡയിലെ വർക്ക്ഷോപ്പിൽ രാപകലില്ലാതെ നെയ്ത്തുകാരും കരകൗശല വിദഗ്ധരും നടത്തിയ കഠിനാധ്വാനത്തിനൊടുവിലാണ് ഈ മനോഹരമായ അനാർക്കലി പൂർത്തിയായത്.
വസ്ത്രം ലണ്ടനിലേക്ക് അയച്ചുകൊടുത്തുവെങ്കിലും, കേറ്റ് മിഡിൽടൺ ഇത് തന്നെ ധരിക്കുമോ എന്ന കാര്യത്തിൽ അവസാന നിമിഷം വരെ ഡിസൈനർക്ക് യാതൊരു ഉറപ്പുമുണ്ടായിരുന്നില്ല. ഒടുവിൽ മുംബൈയിലെ ചടങ്ങ് ആരംഭിക്കുന്നതിന് വെറും 30 മിനിറ്റ് മുൻപ് വന്ന ഒരു ഫോൺ കോളിലൂടെയാണ് രാജകുമാരി തന്റെ വസ്ത്രം തന്നെയാണ് തിരഞ്ഞെടുത്തതെന്ന് മഹിമ മഹാജൻ അറിയുന്നത്. ചിത്രങ്ങൾ പുറത്തുവന്നതിന് പിന്നാലെ കഴിഞ്ഞ 12 മണിക്കൂറിനുള്ളിൽ തങ്ങളുടെ ബ്രാൻഡിന് ലഭിക്കുന്ന ആഗോള അംഗീകാരം അവിശ്വസനീയമാണെന്നും, പ്രത്യേകിച്ച് പാശ്ചാത്യ രാജ്യങ്ങളിൽ നിന്ന് ഇന്ത്യൻ അനാർക്കലി ഡിസൈനുകൾക്ക് വലിയ സ്വീകാര്യതയാണ് ലഭിക്കുന്നതെന്നും മഹിമ മഹാജൻ പറഞ്ഞു.











