കഴിഞ്ഞ ഒരാഴ്ചയ്ക്കിടെ ആഗോളതലത്തിൽ മൈക്രോസോഫ്റ്റ്, ആപ്പിൾ, അമേരിക്കൻ ബാങ്കിംഗ് സംവിധാനങ്ങൾ, വിമാനക്കമ്പനികൾ എന്നിവയുടെ ഓൺലൈൻ സേവനങ്ങൾ തുടർച്ചയായി സ്തംഭിച്ചതിന് പിന്നിൽ നിർമ്മിതബുദ്ധിയുടെ (AI) അതിവേഗവും അനിയന്ത്രിതവുമായ ഉപയോഗമാണെന്ന ഞെട്ടിക്കുന്ന വെളിപ്പെടുത്തലുമായി പ്രമുഖ സൈബർ സുരക്ഷാവിദഗ്ധ നിക്കോൾ പേൾറോത്ത്. 70-ഓളം രാജ്യങ്ങളിലെ സർക്കാർ ഏജൻസികളെയടക്കം ബാധിച്ച ഈ വൻ തകർച്ചകൾക്ക് പിന്നിൽ സൈബർ ആക്രമണങ്ങളല്ലെന്നും സാധാരണ സാങ്കേതിക പിഴവുകൾ മാത്രമാണെന്നുമാണ് ടെക് കമ്പനികളും ഭരണകൂടങ്ങളും ആവർത്തിക്കുന്നത്. എന്നാൽ, പുറമെ കാണുന്നതിനേക്കാൾ ഭീകരമായ ഒരു പ്രതിസന്ധിയാണ് ടെക് ലോകം നേരിടുന്നതെന്നും ‘വൾണോപ്പോക്കലിപ്സ്’ (Vulnpocalypse) എന്ന സമാനതകളില്ലാത്ത സാങ്കേതിക അസ്ഥിരതയുടെ കാലഘട്ടത്തിലേക്കാണ് ലോകം പ്രവേശിക്കുന്നതെന്നും നിക്കോൾ പേൾറോത്ത് മുന്നറിയിപ്പ് നൽകുന്നു.
ന്യൂയോർക്ക് ടൈംസിലെ മുൻ സൈബർ സുരക്ഷാ റിപ്പോർട്ടറും ‘ദിസ് ഈസ് ഹൗ ദേ ടെൽ മി ദി വേൾഡ് എൻഡ്സ്’ എന്ന ബെസ്റ്റ് സെല്ലർ ഗ്രന്ഥത്തിന്റെ രചയിതാവുമായ പേൾറോത്ത് എക്സിൽ (X) പങ്കുവെച്ച കുറിപ്പാണ് ഇപ്പോൾ ആഗോള ടെക് ലോകത്ത് വലിയ ചർച്ചയായിരിക്കുന്നത്. കഴിഞ്ഞ വ്യാഴാഴ്ച മൈക്രോസോഫ്റ്റിനുണ്ടായ ചരിത്രത്തിലെ ഏറ്റവും വലിയ തകരാറിന് പിന്നാലെ അമേരിക്കൻ വ്യോമയാന മേഖല നിശ്ചലമാവുകയും, ബാങ്കിംഗ് ഇടപാടുകൾ തടസ്സപ്പെടുകയും, ചൊവ്വാഴ്ച ആപ്പിളിന്റെ ഐക്ലൗഡ് (iCloud), ആപ്പിൾ പേ (Apple Pay) സേവനങ്ങൾ പണിമുടക്കുകയും ചെയ്തിരുന്നു. ഈ തുടർക്കഥകൾക്ക് പിന്നിലെ യഥാർത്ഥ കാരണം എ.ഐ സംവിധാനങ്ങളുടെ തിടുക്കത്തിലുള്ള വിന്യാസമാണെന്ന് അവർ ചൂണ്ടിക്കാട്ടുന്നു.
സോഫ്റ്റ്വെയറുകളിലെ സുരക്ഷാ പിഴവുകൾ (Vulnerabilities) കണ്ടെത്തുന്നതിന്റെ വേഗത എ.ഐ മൂലം മൂന്നിരട്ടിയായി വർധിച്ചിരിക്കുകയാണെന്ന് പേൾറോത്ത് വ്യക്തമാക്കുന്നു. മുൻപ് ഒരു സുരക്ഷാ പിഴവ് കണ്ടെത്തി അത് ചൂഷണം ചെയ്യപ്പെടാൻ ദിവസങ്ങളെടുത്തിരുന്നെങ്കിൽ, ഇന്ന് എ.ഐയുടെ സഹായത്തോടെ അത് ‘നെഗറ്റീവ് ഏഴ് ദിവസമായി’ ചുരുങ്ങിയിരിക്കുന്നു. അതായത്, കമ്പനികൾ ഒരു സുരക്ഷാ പാച്ച് പുറത്തിറക്കുന്നതിന് മുൻപ് തന്നെ പിഴവുകൾ കണ്ടെത്തപ്പെടുകയും ചൂഷണം ചെയ്യപ്പെടുകയും ചെയ്യുന്നു. ഇത് സോഫ്റ്റ്വെയർ അറ്റകുറ്റപ്പണികൾ നടത്തുന്നതിനുള്ള സമയം കുറയ്ക്കുകയും, അപ്ഡേറ്റുകൾ അതിവേഗം പുറത്തിറക്കാൻ കമ്പനികൾക്ക് മേൽ കടുത്ത സമ്മർദ്ദം ചെലുത്തുകയും ചെയ്യുന്നു. മതിയായ പരിശോധനകളില്ലാതെ തിടുക്കത്തിൽ നടത്തുന്ന ഇത്തരം അപ്ഡേറ്റുകളാണ് പ്രതീക്ഷിക്കാത്ത വിധത്തിൽ വലിയ സെർവർ തകരാറുകളിലേക്ക് നയിക്കുന്നത്.
എല്ലാ മേഖലകളിലും എ.ഐ നിർബന്ധമായും ഉൾപ്പെടുത്തണമെന്ന കമ്പനികളുടെ വാശി വലിയ അപകടമാണ് വിളിച്ചുവരുത്തുന്നതെന്ന് അവർ ഓർമ്മിപ്പിക്കുന്നു. അമിതഭാരം താങ്ങാൻ ശേഷിയില്ലാത്ത, ദുർബലമായ അടിസ്ഥാന സൗകര്യങ്ങൾക്ക് മുകളിലാണ് ഇന്ന് എ.ഐ സംവിധാനങ്ങൾ വ്യാപകമായി കെട്ടിപ്പടുക്കുന്നത്. **’നാം സമാനതകളില്ലാത്ത സാങ്കേതിക അസ്ഥിരതയുടെ ഒരു കാലഘട്ടത്തിലേക്ക് പ്രവേശിക്കുകയാണ്. ഹാക്കർമാരുടെ ആക്രമണങ്ങളോ, മോശം സോഫ്റ്റ്വെയർ അപ്ഡേറ്റുകളോ, അല്ലെങ്കിൽ നമ്മുടെ സ്വന്തം വീഴ്ചകളോ മൂലം ഒന്നിനുപുറകെ ഒന്നായി തകർച്ചകൾ ഉണ്ടാകുന്ന ഒരു കാലഘട്ടത്തിലേക്കാണ് നമ്മൾ പോകുന്നത്. ഖേദകരമെന്നു പറയട്ടെ, ഇത് വെറുമൊരു തുടക്കം മാത്രമാണ്’** എന്നാണ് നിക്കോൾ പേൾറോത്ത് തന്റെ കുറിപ്പിൽ മുന്നറിയിപ്പ് നൽകിയിരിക്കുന്നത്.












