സംസ്ഥാന സിവിൽ സർവീസിന്റെ മുഖച്ഛായ മാറ്റാൻ ലക്ഷ്യമിട്ട് രൂപീകരിച്ച കേരള അഡ്മിനിസ്ട്രേറ്റീവ് സർവീസിന്റെ (KAS) നിലവിലുള്ള ചട്ടങ്ങൾ സമഗ്രമായി പൊളിച്ചെഴുതാൻ സംസ്ഥാന സർക്കാർ ഒരുങ്ങുന്നു. കെ.എ.എസ് ചട്ടങ്ങളിൽ നിർണ്ണായക ഭേദഗതികൾ വരുത്തുന്നതിനായി സർക്കാർ കരട് വിജ്ഞാപനം പുറത്തിറക്കി. പുതിയ ഭേദഗതികൾ നിലവിൽ വരുന്നതോടെ കെ.എ.എസ് ഉദ്യോഗസ്ഥർക്ക് ലഭിച്ചിരുന്ന പല സുപ്രധാന ആനുകൂല്യങ്ങളും അധികാരങ്ങളും ഇല്ലാതാകും. മുൻകാല പ്രാബല്യത്തോടെയാണ് ചട്ടഭേദഗതി നടപ്പിലാക്കുന്നത് എന്നതിനാൽ, നിലവിൽ സർവീസിലുള്ള കെ.എ.എസ് ആദ്യ ബാച്ചിലെ ഉദ്യോഗസ്ഥർക്കും ഇത് കനത്ത തിരിച്ചടിയാകും.
പുതിയ കരട് വിജ്ഞാപനത്തിലെ ഏറ്റവും പ്രധാനപ്പെട്ട മാറ്റം 29 സർക്കാർ വകുപ്പുകളിലെ ഒഴിവുകൾ കെ.എ.എസിനായി മാറ്റിവെക്കണമെന്ന നിർബന്ധിത വ്യവസ്ഥ ഒഴിവാക്കുന്നു എന്നതാണ്. നിലവിലെ ചട്ടപ്രകാരം ഈ 29 വകുപ്പുകളിലെ രണ്ടാം ഗസറ്റഡ് തസ്തികകളുടെ പത്ത് ശതമാനം ഒഴിവുകൾ കെ.എ.എസ് നിയമനത്തിനായി നീക്കിവെക്കണമായിരുന്നു. ഈ ചട്ടം പൂർണ്ണമായും എടുത്തുകളയാനാണ് സർക്കാർ നീക്കം. ഇതോടെ കെ.എ.എസ് ഉദ്യോഗസ്ഥരെ ഏത് വകുപ്പിൽ, ഏത് തസ്തികയിൽ നിയമിക്കണമെന്ന് സർക്കാരിന് സ്വന്തം നിലയിൽ തീരുമാനിക്കാം.
ഇതിനുപുറമെ, കെ.എ.എസ് ഉദ്യോഗസ്ഥരുടെ ഏറ്റവും വലിയ ആകർഷണമായിരുന്ന ഐ.എ.എസ് (IAS) കൺഫർമെന്റ് വ്യവസ്ഥയിലും സർക്കാർ കൈവെച്ചിരിക്കുകയാണ്. എട്ട് വർഷത്തെ സർവീസ് പൂർത്തിയാക്കിയാൽ കെ.എ.എസ് ഉദ്യോഗസ്ഥരെ ഐ.എ.എസിലേക്ക് പരിഗണിക്കണമെന്ന സുപ്രധാന ചട്ടമാണ് ഒഴിവാക്കുന്നത്. ഇതോടെ നിശ്ചിത കാലയളവിനുള്ളിൽ ഐ.എ.എസ് പദവിയിലേക്ക് ഉയരാനുള്ള കെ.എ.എസ് ഉദ്യോഗസ്ഥരുടെ അവസരത്തിന് മേൽ വലിയ അനിശ്ചിതത്വമാണ് നിഴലിക്കുന്നത്.
വിവിധ സർക്കാർ വകുപ്പുകളിലെ ജീവനക്കാരുടെ സംഘടനകളിൽ നിന്ന് ഉയർന്ന കടുത്ത എതിർപ്പുകളും, കെ.എ.എസ് ഉദ്യോഗസ്ഥരുടെ നിയമനവുമായി ബന്ധപ്പെട്ട് ഭരണതലത്തിലുണ്ടായ പ്രായോഗിക തടസ്സങ്ങളുമാണ് ചട്ടങ്ങൾ പൊളിച്ചെഴുതാൻ സർക്കാരിനെ പ്രേരിപ്പിച്ചതെന്നാണ് സൂചന. എന്നാൽ, മുൻകാല പ്രാബല്യത്തോടെ ചട്ടം ഭേദഗതി ചെയ്യുന്നത് തങ്ങളുടെ സർവീസ് ആനുകൂല്യങ്ങളെയും സ്ഥാനക്കയറ്റത്തെയും ദോഷകരമായി ബാധിക്കുമെന്ന ആശങ്കയിലാണ് കെ.എ.എസ് ആദ്യ ബാച്ചിലെ ഉദ്യോഗസ്ഥർ. കരട് വിജ്ഞാപനത്തിന്മേലുള്ള ആക്ഷേപങ്ങളും നിർദ്ദേശങ്ങളും പരിശോധിച്ച ശേഷമാകും സർക്കാർ അന്തിമ വിജ്ഞാപനം പുറത്തിറക്കുക.










