രാസലഹരി പിടികൂടാൻ വെളുപ്പാൻ കാലത്ത് ഇറങ്ങിയ എക്സൈസ് സംഘത്തിന്റെ വലയിലായത് ഹൈടെക് ‘മൊബൈൽ ബാർ’ നടത്തിപ്പുകാരൻ. കൊച്ചി കടവന്ത്ര ജംഗ്ഷന് സമീപത്തെ ഷോപ്പിംഗ് കോംപ്ലക്സിന് മുന്നിൽ പുലർച്ചെ അനധികൃതമായി മദ്യവിൽപ്പന നടത്തിവന്ന കൊച്ചു കടവന്ത്ര മീനായിക്കുടത്ത് വീട്ടിൽ എം.ജി. വിനോദിനെയാണ് (52) എറണാകുളം എക്സൈസ് റേഞ്ച് സംഘം സാഹസികമായി പിടികൂടിയത്. പിടികൂടാനെത്തിയ ഉദ്യോഗസ്ഥർക്ക് നേരെ പെപ്പർ സ്പ്രേ പ്രയോഗിക്കുകയും ഉദ്യോഗസ്ഥന്റെ തുടയിൽ കടിച്ച് പരിക്കേൽപ്പിക്കുകയും ചെയ്ത പ്രതിയെ ഏറെ പണിപ്പെട്ടാണ് കീഴടക്കിയത്.
പ്രദേശത്തെ ഒരു നാട്ടുകാരൻ നൽകിയ രഹസ്യവിവരത്തിന്റെ അടിസ്ഥാനത്തിലായിരുന്നു എക്സൈസിന്റെ പരിശോധന. മൊട്ടത്തലയനായ ഒരാൾ പുലർച്ചെ സ്ഥലത്തെത്തി മദ്യം വിൽക്കുന്നുണ്ടെന്നായിരുന്നു ലഭിച്ച സൂചന. ഇതനുസരിച്ച് പുലർച്ചെ അഞ്ച് മണിയോടെ എക്സൈസ് സംഘം കടവന്ത്ര ജംഗ്ഷനിലെ ഷോപ്പിംഗ് കോംപ്ലക്സിൽ എത്തുമ്പോൾ മദ്യവിൽപ്പന തകൃതിയായി നടക്കുകയായിരുന്നു. രാവിലെ ജോലിക്കായി ജംഗ്ഷനിൽ കൂട്ടത്തോടെ എത്തുന്ന അന്യസംസ്ഥാന തൊഴിലാളികളായിരുന്നു വിനോദിന്റെ പ്രധാന ഉപഭോക്താക്കൾ. എക്സൈസ് ഉദ്യോഗസ്ഥരെ കണ്ടതോടെ സ്ഥലത്ത് മദ്യപിച്ചുകൊണ്ടിരുന്നവർ ചിതറിയോടി രക്ഷപ്പെട്ടു.
ചെറിയ കുപ്പികളിൽ 80 മില്ലിലിറ്റർ വീതം നിറച്ചായിരുന്നു വിനോദിന്റെ മദ്യവിൽപ്പന. മദ്യത്തിൽ വെള്ളം കൂടി ചേർത്താണ് കുപ്പികളിൽ നിറച്ചിരുന്നത്. ഒരു കുപ്പിക്ക് 100 രൂപ നിരക്കിലായിരുന്നു വിൽപ്പന. പ്രതിയുടെ കൈവശമുണ്ടായിരുന്ന വലിയ സഞ്ചിക്കുള്ളിലാണ് മദ്യക്കുപ്പികൾ ഒളിപ്പിച്ചിരുന്നത്. തുടർന്ന് നടത്തിയ വിശദമായ പരിശോധനയിൽ ഷോപ്പിംഗ് കോംപ്ലക്സിനകത്തെ ചെറിയൊരു ഇടുക്കിൽ നിന്ന് മദ്യപാനികൾക്കായി കരുതിയിരുന്ന ‘സ്പെഷ്യൽ ടച്ചിംഗ്സും’ ഉദ്യോഗസ്ഥർ കണ്ടെത്തി. ഒരു കുപ്പി നിറയെ നെല്ലിക്ക അച്ചാറാണ് ഇയാൾ ടച്ചിംഗ്സിനായി സൂക്ഷിച്ചിരുന്നത്. കൂടാതെ, മദ്യത്തിൽ കലർത്താനായി 40 കുപ്പി വെള്ളവും ഇയാൾ കരുതിയിരുന്നു. പ്രതിയുടെ പക്കൽ നിന്ന് ആകെ 8.6 ലിറ്റർ വിദേശമദ്യമാണ് എക്സൈസ് പിടിച്ചെടുത്തത്.
അപ്രതീക്ഷിതമായി എക്സൈസ് ഉദ്യോഗസ്ഥർ മുന്നിലെത്തിയതോടെ വിനോദ് ആദ്യം ഒന്ന് പതറിയെങ്കിലും, രക്ഷപ്പെടാൻ അടവുകൾ പതിനെട്ടും പയറ്റി. തന്നെ പിടികൂടാൻ ശ്രമിച്ച സിവിൽ എക്സൈസ് ഓഫീസർമാരായ സിദ്ധാർത്ഥിനും ശ്രീരാജിനും നേരെ വിനോദ് കൈവശം കരുതിയിരുന്ന പെപ്പർ സ്പ്രേ പ്രയോഗിച്ചു. കണ്ണിൽ കുരുമുളക് പൊടി വീണിട്ടും പിടിവിടാതെ മുറുകെ പിടിച്ച ശ്രീരാജിന്റെ തുടയിൽ ഇയാൾ ആഞ്ഞുകടിച്ച് പരിക്കേൽപ്പിച്ചു. തുടർന്ന് കൂടുതൽ എക്സൈസ് ഉദ്യോഗസ്ഥർ സ്ഥലത്തെത്തി ബലപ്രയോഗത്തിലൂടെയാണ് പ്രതിയെ കീഴടക്കിയത്. കണ്ണിൽ പെപ്പർ സ്പ്രേ വീണ് അസ്വസ്ഥത അനുഭവപ്പെട്ട സിദ്ധാർത്ഥും, കടിയേറ്റ ശ്രീരാജും എറണാകുളം ജനറൽ ആശുപത്രിയിൽ ചികിത്സ തേടുകയും ശ്രീരാജ് ടെറ്റനസ് കുത്തിവയ്പ്പിന് വിധേയനാകുകയും ചെയ്തു.
അസിസ്റ്റന്റ് എക്സൈസ് ഇൻസ്പെക്ടർ വി.ആർ. രാജേഷിന്റെ നേതൃത്വത്തിലുള്ള സംഘമാണ് പ്രതിയെ അറസ്റ്റ് ചെയ്തത്. വനിതാ സിവിൽ എക്സൈസ് ഓഫീസർ വിജിയും അന്വേഷണ സംഘത്തിലുണ്ടായിരുന്നു. അടിപിടി ഉൾപ്പെടെ പത്തോളം ക്രിമിനൽ കേസുകളിലെ പ്രതിയാണ് വിനോദെങ്കിലും, മദ്യവിൽപ്പന കേസിൽ പിടിയിലാകുന്നത് ഇതാദ്യമാണെന്ന് എക്സൈസ് അറിയിച്ചു. ഉദ്യോഗസ്ഥരുടെ ഔദ്യോഗിക കൃത്യനിർവ്വഹണം തടസ്സപ്പെടുത്തിയതിനും ആക്രമിച്ചതിനും എറണാകുളം സൗത്ത് പോലീസും ഇയാൾക്കെതിരെ കേസെടുത്തിട്ടുണ്ട്. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.












