സംസ്ഥാനത്ത് അംഗീകൃതമല്ലാത്തതും അപകടകരമായ രാസവസ്തുക്കൾ അടങ്ങിയതുമായ സൗന്ദര്യവർദ്ധക ക്രീമുകളുടെ വിൽപ്പനയ്ക്കെതിരെ കർശന നടപടി സ്വീകരിക്കുമെന്ന് ആരോഗ്യമന്ത്രി കെ. മുരളീധരൻ. പരാതികൾ ലഭിക്കുന്ന മുറയ്ക്ക് സർക്കാർ വ്യാപകമായ പരിശോധനകളും ആവശ്യമായ നിയന്ത്രണങ്ങളും ഏർപ്പെടുത്തുമെന്നും അദ്ദേഹം വ്യക്തമാക്കി. മലപ്പുറം അരീക്കോട് ഇൻസ്റ്റഗ്രാം പരസ്യം കണ്ട് വാങ്ങിയ ‘ദുബായ് നിർമ്മിത’ ഫെയർനസ് ക്രീം ഒരു വർഷത്തോളം ഉപയോഗിച്ച 17-കാരിക്ക് ഗുരുതരമായ വൃക്കരോഗം സ്ഥിരീകരിച്ച ഞെട്ടിക്കുന്ന സംഭവത്തിന്റെ പശ്ചാത്തലത്തിലാണ് മന്ത്രിയുടെ പ്രതികരണം.
ഓൺലൈൻ വഴിയും സമൂഹമാധ്യമങ്ങളിലെ പരസ്യങ്ങൾ കണ്ടും ലഭിക്കുന്ന, നിർമ്മാണ വിവരങ്ങൾ വ്യക്തമല്ലാത്ത മുഖലേപനങ്ങളും ക്രീമുകളും ഉപയോഗിക്കുമ്പോൾ പൊതുജനങ്ങൾ അതീവ ജാഗ്രത പാലിക്കണമെന്ന് മന്ത്രി മുന്നറിയിപ്പ് നൽകി. ഇത്തരം ക്രീമുകൾ ഉപയോഗിച്ചതുകൊണ്ടുമാത്രം സൗന്ദര്യം വർദ്ധിക്കില്ലെന്നും, പലപ്പോഴും ഇവ ജീവന് തന്നെ ഭീഷണിയാകുന്ന ഗുരുതര ആരോഗ്യപ്രശ്നങ്ങളിലേക്കാണ് നയിക്കുന്നതെന്നും അദ്ദേഹം ഓർമ്മിപ്പിച്ചു. അമിത അളവിൽ മെർക്കുറി അടങ്ങിയ ഫേസ് ക്രീമുകളുടെ വിൽപ്പന തടയാനും വിപണിയിൽ പരിശോധന കർശനമാക്കാനും എല്ലാ ജില്ലകളിലും പ്രത്യേക സ്ക്വാഡുകൾ രൂപീകരിക്കുമെന്ന് മന്ത്രി നേരത്തെ അറിയിച്ചിരുന്നു. വിഷയത്തിൽ അടിയന്തര തുടർനടപടികൾ സ്വീകരിക്കാൻ മുഖ്യമന്ത്രിയുടെ ഓഫീസും ആരോഗ്യ അഡീഷണൽ ചീഫ് സെക്രട്ടറിക്ക് നിർദ്ദേശം നൽകിയിട്ടുണ്ട്. ഇതിനുപുറമെ, സംസ്ഥാന ബാലാവകാശ കമ്മീഷൻ സംഭവത്തിൽ സ്വമേധയാ കേസെടുക്കുകയും ചെയ്തു.
17-കാരി ഉപയോഗിച്ച ക്രീമിൽ അനുവദനീയമായതിലും 12,500 മടങ്ങ് അധികം മെർക്കുറിയാണ് പരിശോധനയിൽ കണ്ടെത്തിയത്. സൗന്ദര്യവർദ്ധക വസ്തുക്കളിൽ മെർക്കുറിയുടെ അനുവദനീയമായ അളവ് വെറും ഒരു പി.പി.എം (പാർട്സ് പെർ മില്യൺ) മാത്രമായിരിക്കെ, പെൺകുട്ടി പുരട്ടിയ ക്രീമിൽ 1.25 ശതമാനം മെർക്കുറിയുടെ സാന്നിധ്യമാണ് സ്ഥിരീകരിച്ചത്. തുടർച്ചയായി ക്രീം ഉപയോഗിച്ചതോടെ ത്വക്കിലൂടെ ശരീരത്തിനുള്ളിലെത്തിയ മെർക്കുറി പെൺകുട്ടിയുടെ വൃക്കകളുടെ പ്രവർത്തനത്തെ ഗുരുതരമായി ബാധിക്കുകയായിരുന്നു. കോഴിക്കോട് മെഡിക്കൽ കോളേജിലെയും സ്വകാര്യ ആശുപത്രിയിലെയും വിദഗ്ദ്ധ ചികിത്സയിലൂടെ പെൺകുട്ടി നിലവിൽ അപകടനില തരണം ചെയ്തിട്ടുണ്ട്. ലൈസൻസില്ലാതെയും മാനദണ്ഡങ്ങൾ പാലിക്കാതെയും ഓൺലൈൻ വഴിയും കടകൾ വഴിയും വ്യാജ സൗന്ദര്യവർദ്ധക വസ്തുക്കൾ വിൽക്കുന്നവർക്കെതിരെ ഡ്രഗ്സ് കൺട്രോൾ വകുപ്പിന്റെ നേതൃത്വത്തിൽ വരും ദിവസങ്ങളിൽ പരിശോധന ശക്തമാക്കാനാണ് ആരോഗ്യവകുപ്പിന്റെ തീരുമാനം.












