കണ്ണൂർ: വൈദ്യുതി മന്ത്രി സണ്ണി ജോസഫ് പങ്കെടുത്ത ഔദ്യോഗിക പരിപാടിക്കിടെ വൈദ്യുതി മുടങ്ങിയ സംഭവത്തിൽ കെഎസ്ഇബിയുടെ കടുത്ത അച്ചടക്ക നടപടി. ഗുരുതരമായ കൃത്യവിലോപം ചൂണ്ടിക്കാട്ടി സബ് എൻജിനീയർ സതീഷ് ബാബുവിനെ സർവീസിൽ നിന്നും സസ്പെൻഡ് ചെയ്തു. വൈദ്യുതി മുടക്കത്തിന് പിന്നിൽ മനഃപൂർവ്വമായ ഗൂഢാലോചനയുണ്ടെന്ന് ആരോപിച്ച് കണ്ണൂർ എംഎൽഎ ടി.ഒ. മോഹനൻ കെഎസ്ഇബി ചെയർമാന് പരാതി നൽകിയതിന് പിന്നാലെയാണ് അടിയന്തര നടപടിയുണ്ടായത്.
ശനിയാഴ്ച കണ്ണൂരിൽ നടന്ന കേരള സഹകരണ റിസ്ക് ഫണ്ട് ധനസഹായ വിതരണ ചടങ്ങിനിടെയാണ് നാടകീയ സംഭവങ്ങൾ അരങ്ങേറിയത്. മന്ത്രി സണ്ണി ജോസഫ് വേദിയിലേക്ക് എത്തിയതിന് തൊട്ടുപിന്നാലെ ഹാളിലെ വൈദ്യുതി പൂർണ്ണമായും നിലയ്ക്കുകയായിരുന്നു. വൈദ്യുതി നിലച്ചതോടെ മൈക്ക് സംവിധാനവും പ്രവർത്തനരഹിതമായി. ഇതോടെ മൈക്കില്ലാതെയാണ് മന്ത്രി പരിപാടിയിൽ പ്രസംഗിച്ചത്. ഏറെ നേരത്തിന് ശേഷം ജനറേറ്റർ സജ്ജീകരിച്ച ശേഷമാണ് ചടങ്ങിലെ മറ്റ് നടപടികൾ മുന്നോട്ട് കൊണ്ടുപോകാൻ സാധിച്ചത്.
സംഭവം സർക്കാരിനും വകുപ്പിനും വലിയ നാണക്കേടുണ്ടാക്കിയതോടെയാണ് ടി.ഒ. മോഹനൻ എംഎൽഎ കെഎസ്ഇബി ചെയർമാന് രേഖാമൂലം പരാതി നൽകിയത്. മന്ത്രി പങ്കെടുക്കുന്ന ഔദ്യോഗിക ചടങ്ങിൽ മുന്നൊരുക്കങ്ങൾ നടത്തുന്നതിൽ ഉദ്യോഗസ്ഥർ വീഴ്ച വരുത്തിയെന്നും, ഇതിന് പിന്നിൽ ഗൂഢാലോചന സംശയിക്കുന്നുണ്ടെന്നും പരാതിയിൽ ചൂണ്ടിക്കാട്ടിയിരുന്നു. പ്രാഥമിക പരിശോധനയിൽ ഉദ്യോഗസ്ഥന്റെ ഭാഗത്തുനിന്ന് വീഴ്ച സംഭവിച്ചതായി കണ്ടെത്തിയതിനെ തുടർന്നാണ് സബ് എൻജിനീയറെ സസ്പെൻഡ് ചെയ്തത്.
നേരത്തെ സെപ്റ്റംബറിൽ കൊച്ചിയിൽ നടന്ന കെഎസ്ഇബി ഓഫീസേഴ്സ് ഫെഡറേഷൻ സമ്മേളനത്തിൽ മന്ത്രി സണ്ണി ജോസഫ് പ്രസംഗിക്കുന്നതിനിടയിലും സമാനമായ രീതിയിൽ വൈദ്യുതി മുടങ്ങിയിരുന്നു. തുടർച്ചയായി വൈദ്യുതി മന്ത്രി പങ്കെടുക്കുന്ന വേദികളിൽ കറണ്ട് പോകുന്നത് വലിയ വിമർശനങ്ങൾക്കും ചർച്ചകൾക്കും വഴിവെച്ചിട്ടുണ്ട്. സംഭവത്തിൽ വിശദമായ വകുപ്പുതല അന്വേഷണത്തിനും കെഎസ്ഇബി ഉത്തരവിട്ടിട്ടുണ്ട്.












