തിരക്കുപിടിച്ച ജീവിതശൈലിക്കിടയിൽ രാവിലത്തെ ഭക്ഷണം ഒഴിവാക്കുന്നവരും ഉച്ചയോടെ മാത്രം ആദ്യ ഭക്ഷണം കഴിക്കുന്നവരും ജാഗ്രത പാലിക്കണമെന്ന് പുതിയ ആരോഗ്യപഠനം. പ്രഭാതഭക്ഷണം (Breakfast) വൈകി കഴിക്കുന്നതും രാത്രി ഏറെ വൈകി അത്താഴം കഴിക്കുന്നതും അകാലമരണത്തിനുള്ള സാധ്യത ഗണ്യമായി വർദ്ധിപ്പിക്കുമെന്നാണ് പുതിയ ഗവേഷണ റിപ്പോർട്ടുകൾ വ്യക്തമാക്കുന്നത്. ഉച്ചയ്ക്ക് 12 മണിക്ക് ശേഷം ദിവസത്തിലെ ആദ്യ ഭക്ഷണം കഴിക്കുന്നവരിൽ ഏത് കാരണത്താലുമുള്ള മരണസാധ്യത 29 ശതമാനം കൂടുതലാണെന്ന് പഠനം മുന്നറിയിപ്പ് നൽകുന്നു.
പ്രമുഖ ശാസ്ത്ര ജേണലായ ‘യൂറോപ്യൻ ജേണൽ ഓഫ് ക്ലിനിക്കൽ ന്യൂട്രീഷനിൽ’ (European Journal of Clinical Nutrition) പ്രസിദ്ധീകരിച്ച പഠനത്തിലാണ് ഈ ഞെട്ടിക്കുന്ന വിവരങ്ങളുള്ളത്. അമേരിക്കയിലെ 40 വയസ്സിന് മുകളിലുള്ള 31,044 മുതിർന്നവരുടെ ഭക്ഷണരീതികളും ആരോഗ്യവിവരങ്ങളും വിശകലനം ചെയ്താണ് ഗവേഷകർ ഈ നിഗമനത്തിലെത്തിയത്. 1999 മുതൽ 2018 വരെയുള്ള കാലയളവിൽ ‘യു.എസ് നാഷണൽ ഹെൽത്ത് ആൻഡ് ന്യൂട്രീഷൻ എക്സാമിനേഷൻ സർവേ’യുടെ ഭാഗമായി ശേഖരിച്ച ഭക്ഷണവിവരങ്ങളും, 2019 അവസാനം വരെയുള്ള മരണനിരക്ക് രേഖകളും താരതമ്യം ചെയ്താണ് പഠനം നടത്തിയത്.
രാവിലെ നേരത്തെ പ്രഭാതഭക്ഷണം കഴിക്കുന്നവരെ അപേക്ഷിച്ച്, പ്രഭാതഭക്ഷണം വൈകിച്ച് ഉച്ചയ്ക്ക് മുൻപോ ശേഷമോ കഴിക്കുന്നവർക്ക് ഹൃദയസംബന്ധമായ രോഗങ്ങൾ (Cardiovascular disease) മൂലമുള്ള മരണസാധ്യത വളരെ കൂടുതലാണെന്ന് പഠനം ചൂണ്ടിക്കാട്ടുന്നു. നമ്മൾ എന്ത് കഴിക്കുന്നു എന്നതുപോലെ തന്നെ പ്രധാനമാണ് എപ്പോൾ കഴിക്കുന്നു എന്നതെന്നും ഗവേഷകർ വ്യക്തമാക്കുന്നു. ശരീരത്തിന്റെ സ്വാഭാവിക ജൈവഘടികാരത്തിന് (Circadian rhythm) അനുസൃതമായി ഭക്ഷണം കഴിക്കാത്തത് ശരീരത്തിലെ ഉപാപചയ പ്രവർത്തനങ്ങളെയും (Metabolism) രക്തസമ്മർദ്ദത്തെയും രക്തത്തിലെ പഞ്ചസാരയുടെ അളവിനെയും ദോഷകരമായി ബാധിക്കുന്നു.
പ്രഭാതഭക്ഷണം വൈകുന്നതിനൊപ്പം രാത്രി ഏറെ വൈകി ഭക്ഷണം കഴിക്കുന്ന ശീലവും ആരോഗ്യത്തിന് വലിയ ഭീഷണിയാണ് ഉയർത്തുന്നത്. രാത്രി വൈകിയുള്ള ഭക്ഷണം ദഹനപ്രക്രിയയെ മന്ദഗതിയിലാക്കുകയും പൊണ്ണത്തടി, പ്രമേഹം, ഹൃദ്രോഗം എന്നിവയ്ക്ക് വഴിവെക്കുകയും ചെയ്യുന്നു. അതേസമയം, ഭക്ഷണസമയം വൈകുന്നതും മരണസാധ്യതയും തമ്മിലുള്ള നേരിട്ടുള്ള കാരണങ്ങൾ (Cause-and-effect relationship) പൂർണ്ണമായും സ്ഥാപിച്ചിട്ടില്ലെങ്കിലും, കൃത്യസമയത്ത് ഭക്ഷണം കഴിക്കുന്ന ആരോഗ്യകരമായ ശീലം ദീർഘായുസ്സിന് അത്യന്താപേക്ഷിതമാണെന്ന് ആരോഗ്യവിദഗ്ധർ അടിവരയിടുന്നു. അതിനാൽ രാവിലെ ഉണർന്ന് നിശ്ചിത സമയത്തിനുള്ളിൽ തന്നെ പോഷകസമൃദ്ധമായ പ്രഭാതഭക്ഷണം കഴിക്കാൻ ശ്രദ്ധിക്കണമെന്നാണ് വിദഗ്ധരുടെ നിർദ്ദേശം.












