ഡല്‍ഹി:പെട്രോളിന്റെയും ഡീസലിന്റെയും വില തുടര്‍ച്ചയായി ഉയരുന്ന സാഹചര്യത്തില്‍ അവയുടെ എക്‌സൈസ് തീരുവ കേന്ദ്രസര്‍ക്കാര്‍ കുറച്ചേക്കും.
മേയ് അവസാനയാഴ്ച ഇതുസംബന്ധിച്ച് പ്രഖ്യാപനമുണ്ടായേക്കും. മോദി സര്‍ക്കാരിന്റെ നാലാം വാര്‍ഷികം കൊണ്ടാടുന്ന അവസരത്തില്‍ ഉപഭോക്താക്കള്‍ക്കുള്ള സമ്മാനമാണിതെന്ന് ധനമന്ത്രാലയ വൃത്തങ്ങള്‍ അറിയിച്ചു.
എണ്ണവില ഉയരുന്നതില്‍ കേന്ദ്രസര്‍ക്കാരിന് ആശങ്കയുണ്ടെന്ന് ധനകാര്യ സെക്രട്ടറി സുഭാഷ് ചന്ദ്ര ഗാര്‍ഗ് ഇന്നലെ മാധ്യമപ്രവര്‍ത്തകരോട് പറഞ്ഞിരുന്നു. കേന്ദ്രസര്‍ക്കാര്‍ ഇക്കാര്യത്തില്‍ ഇടപെട്ടു തുടങ്ങിയെന്നു സൂചനയുണ്ട്.
അസംസ്‌കൃത എണ്ണവില ബാരലിന് 85 ഡോളറിനു മുകളില്‍പ്പോയാല്‍ ഡല്‍ഹിയില്‍ പെട്രോള്‍ വില ലിറ്ററിന് 89 രൂപയ്ക്ക് മുകളിലാകും. ഈ സാഹചര്യത്തില്‍ എക്‌സൈസ് തീരുവ കുറയ്ക്കുമെന്ന് ധനമന്ത്രാലയ വൃത്തങ്ങള്‍ സൂചിപ്പിച്ചു. ആദ്യഘട്ടത്തില്‍ ലിറ്ററിന് രണ്ടു രൂപയായിരിക്കും കുറയ്ക്കുക.
കേന്ദ്രം നികുതി കുറച്ചാല്‍ കേരളത്തിലും നികുതി കുറക്കാന്‍ സംസ്ഥാന സര്‍ക്കാര്‍ തയ്യാറാവണമെന്ന ആവശ്യം ഉയര്‍ന്നിട്ടുണ്ട്. നികുതി കുറക്കില്ല എന്ന നിലപാടിലായിരുന്നു സംസ്ഥാന സര്‍ക്കാര്‍. ജനദുരിതം കുറക്കാന്‍ സംസ്ഥാന സര്‍ക്കാരിനും ഉത്തരവാദിത്തമുണ്ടെന്നും, കേന്ദ്രത്തെ കുറ്റപറഞ്ഞ് രക്ഷപ്പെടാനാവില്ലെന്നും പ്രതിപക്ഷം ആരോപിച്ചിരുന്നു.
Discussion about this post