‘വനിതാ മതില്‍ ഉയരുമ്പോള്‍ എ കെ ശശീന്ദ്രന്റെ ലൈംഗിക സീത്കാര ശബ്ദത്തിന്റെ സത്യം എന്ത്? ‘-മന്ത്രിയുടെ ടെലിഫോണ്‍ സെക്‌സ് ആരോപണത്തിലെ അന്വേഷണം എന്തായി എന്ന ചോദ്യമുയര്‍ത്തി മാധ്യമപ്രവര്‍ത്തകന്‍

എസ്.വി പ്രദീപ്-In Facebook

വനിത മതില്‍ ഉയരുമ്പോള്‍ എ കെ ശശീന്ദ്രന്റെ ലൈംഗിക സീത്കാര ശബ്ദത്തിന്റെ സത്യം എന്ത്? നവോത്ഥാന മതിലില്‍ ശശീന്ദ്രനും ഭാഗം..

വനിത മതില്‍ നവോത്ഥാനകേരളത്തിന് പിണറായി വിജയന്റെ സംഭാവന. അങ്ങനെ പിണറായി വിജയന്‍ കേരളത്തിന്റെ ആധുനിക നവോത്ഥാന ശില്‍പി ആയി ഗിന്നസ് റക്കോര്‍ഡ്‌സില്‍ കയറിക്കൂടാന്‍ പെടാപ്പാടുപെടുന്നു. ആധുനിക കേരള നവോത്ഥാനശില്‍പി പിണറായി വിജയനോട് ചില ചോദ്യങ്ങള്‍. Mr പിണറായി വിജയന്‍ എ കെ ശശീന്ദ്രന്‍ ഉള്‍പ്പെട്ട മന്ത്രിസഭയുടെ നാഥന്‍ എന്ന നിലയ്ക്കും ഭരണത്തലവന്‍ എന്ന നിലയ്ക്കും താങ്കള്‍ മറുപടി പറയണം. പ്രത്യേകിച്ച് സ്ത്രീ ശാക്തീകരണത്തിനായി വനിത മതില്‍ പടുത്തുയര്‍ത്തുന്ന സമയത്ത്.

1. 2017 മാര്‍ച്ച് 26 ന് അങ്ങയുടെ മന്ത്രിസഭയിലെ എ കെ ശശീന്ദ്രന്‍ എന്ന മന്ത്രി ടെലിഫോണ്‍ സെക്‌സ് നടത്തിയെന്ന ആരോപണത്തെ തുടര്‍ന്ന് രാജി വച്ചിരുന്നെല്ലോ. ആ കേസില്‍ ഗൂഢാലോചനകുറ്റം ചുമത്തി 30 03 17 ല്‍ 51, 52/CR/OCW1/TVPM എന്ന കേസ് രജിസ്റ്റര്‍ ചെയ്തിരുന്നു. ഈ കേസ് എന്തായി?

2 കേസ് രജിസ്റ്റര്‍ ചെയ്തിട്ട് രണ്ട് വര്‍ഷം തികയാറാകുന്നു. ചാര്‍ജ്ജ് ഷീറ്റ് സമര്‍പ്പിച്ചോ?

3 ആരൊക്കെയാണ് ഈ കേസില്‍ യഥാര്‍ത്ഥ കുറ്റവാളികള്‍?ഗൂഢാലോചന നടത്തിയവര്‍ ആരൊക്കെ? വാര്‍ത്ത അവതരിപ്പിച്ച പാവം നിരപരാധികളായ മൂന്ന് മാധ്യമപ്രവര്‍ത്തകരും ഗൂഢാലോചന നടത്തിയോ? അതോ വെറും തൊഴിലാളികള്‍ മാത്രം ആയ അവരെകൊണ്ട് ചാനല്‍ മാനേജ്‌മെന്റിലെ ഒരു വിഭാഗം കള്ളം പറഞ്ഞ് തെറ്റിദ്ധരിപ്പിച്ച് വാര്‍ത്ത അവതരിപ്പിച്ചതാണോ?

4. ഈ കേസ് സി ബി ഐ / ഹൈക്കോടതി മേല്‍നോട്ടത്തില്‍ അന്വേഷിക്കണം വേണമഞന്നാവശ്യപ്പെട്ട് കേരള ഹൈക്കോടതിയില്‍ എസ് വി പ്രദീപ് എന്ന നിരപരാധിയായ മാധ്യമ പ്രവര്‍ത്തകന്‍ നല്‍കിയിരിക്കുന്ന ഹര്‍ജിയെ അങ്ങയുടെ സര്‍ക്കാര്‍ ശക്തിയായി എതിര്‍ക്കുന്നത് എന്തിന്? അങ്ങനെ അന്വേഷണം നടന്നാല്‍ വേറെ പല പല രഹസ്യങ്ങളും പുറത്തുവരുമെന്നും പൊതുജനം അറിയുമെന്നും ഭയന്നിട്ടല്ലേ?

5. സാക്ഷികളാകേണ്ട നിരപരാധികളായ വാര്‍ത്താവതാരകരെ ഗൂഢാലോചന കേസില്‍ പ്രതിപട്ടികയില്‍ ഉള്‍പ്പെടുത്തിയത് യഥാര്‍ത്ഥ സത്യങ്ങള്‍ വെളിച്ചെത്ത് വരാതിരിക്കാനല്ലേ?

6. എകെ ശശീന്ദ്രനെ ചാനല്‍ ഹണിട്രാപ്പില്‍ കുടുക്കിയതാണോ? അങ്ങനെ എങ്കില്‍ ആരൊക്കെയാണ് ഹണിട്രാപ്പില്‍ പങ്കെടുത്തത്? എത്ര സ്ത്രീകള്‍ പങ്കെടുത്തു? അവരെ സഹായിച്ച പുരുഷന്മാര്‍ ആരൊക്കെ?

7 ഹണി ട്രാപ്പില്‍ എ കെ ശശീന്ദ്രന്‍ കുടുങ്ങിയിരുന്നോ? ചാനല്‍ പുറത്ത് വിട്ടത് എ കെ ശശീന്ദ്രന്റെ ലൈംഗിക സീത്കാര ശബ്ദം തന്നെ ആയിയുന്നോ? അതോ ചാനല്‍ പുറത്തുവിട്ട ലൈംഗിക സീത്കാര ശബ്ദം വേറെ ആരുടേതെങ്കിലുമാണോ? അങ്ങനെ വേറെയാരുടേതെങ്കിലുമാണേല്‍ അതാരുടേത്? ചാനല്‍ പുറത്ത് വിട്ട എ കെ ശശിന്ദ്രന്റേതെന്ന് പറയപ്പെടുന്ന ലൈംഗിക സീത്കാര സംഭാഷണ ശകലം ഫോറന്‍സിക് പരിശോധനയ്ക്കയച്ചോ? അതിന്റെ റിസള്‍ട്ട് എന്താണ്?

8 എ കെ ശശീന്ദ്രനോട് മറുതലയ്ക്കല്‍ സെക്‌സ് ചാറ്റ് നടത്തിയത് ആരാണ്? സ്ത്രീയാണോ പുരുഷനാണോ? സ്ത്രീ ആണേല്‍ ആര്? പുരുഷനാണേല്‍ ആര്? അതാരാണെന്ന് അന്വേഷിച്ച് കണ്ടെത്തിയോ?

9. അങ്ങനെ ഒരു സ്ത്രീ മറുതലയ്ക്കല്‍ ഉണ്ടെങ്കില്‍ അവരെ ഗൂഢാലോചനകുറ്റത്തിന് അറസ്റ്റ് ചെയ്യേണ്ടതല്ലേ? അങ്ങനെ ഏതേലും വനിതയെ അറസ്റ്റ് ചെയ്‌തോ?

10. ഹണിട്രാപ്പ് ചാനല്‍ എഡിറ്റോറിയല്‍ ഹെഡ് ആര്‍ അജിത്ത്കുമാര്‍ സര്‍ അങ്ങയുടെ പാര്‍ട്ടി ചാനലായ കൈരളി പീപ്പിള്‍ ടിവിയില്‍ അങ്ങയുടെ മാധ്യമ ഉപദേഷ്ടാവായ ജോണ്‍ ബ്രിട്ടാസ് സറിന്റെ ചര്‍ച്ചകളില്‍ നിരന്തരം പങ്കെടുക്കുന്നത് ഗൂഢാലോചനയുടെ ഭാഗമല്ലേ. കേസന്വേഷണം അട്ടിമറിച്ച് നിരപരാധികളെ ക്രൂശിക്കാനുള്ള കുതന്ത്രം അല്ലേ? ഇത് അനീതി അല്ലേ? ഈ ഗൂഢാലോചന പ്രത്യേകം അന്വേഷിക്കേണ്ടതല്ലേ?
**************
പോരാടും നിരപരാധിത്വം തെളിയിക്കാന്‍ അവസാന ശ്വാസം വരെ
പരാതികള്‍ ഹര്‍ജികള്‍ അവസാനഫലം കാണുംവരെ തുടരും…

(CM’s Office with a Docket No:G180103358) ; (E ptm 6267 / 2018) …ഇതേ കാര്യം ചൂണ്ടിക്കാട്ടി ഹൈക്കോടതിയില്‍ CBI അന്വേഷണം/ പുന:രന്വേഷണം/കോടതിയുടെ മേല്‍നോട്ടം ആവശ്യപ്പെട്ട് കേസ് നടത്തുന്നു (WP (C) 4626/18) സ്വന്തം നിരപരധിത്വം തെളിയിക്കാന്‍..

എസ് വി പ്രദീപ് എന്ന തീര്‍ത്തും നിരപരാധിയായ വ്യക്തിയും മാധ്യമ പ്രവര്‍ത്തകനും കാത്തിരിക്കുന്നു നീതിക്കായി… പോരാടും നീതിക്കായി അവസാന ശ്വാസം വരെ…

#സത്യം_ഇതാണ്_100_ശതമാനം_സത്യം_ഇതാണ്

#26_03_17_ല്‍_നടന്ന_സത്യസന്ധമായ_കാര്യം

2017 മാര്‍ച്ച് 26 ന് ആദ്യ സംപ്രേഷണ ദിവസം രാവിലെ 9.40 ന് മുമ്പ് ഹണി ട്രാപ്പ് വാര്‍ത്തയുടെ ഏതെങ്കിലും പ്രവര്‍ത്തനങ്ങളിലോ ചര്‍ച്ചകളിലോ എസ് വി പ്രദീപ് എന്ന ഞാന്‍ അറിഞ്ഞോ അറിയാതെയോ ഒരു തരത്തിലും ഏര്‍പ്പെട്ടിട്ടില്ല. 2017 മാര്‍ച്ച് 26 ന് രാവിലെ 9.40 ന് അടുത്ത് ചീഫ് എഡിറ്റര്‍ ആര്‍ അജിത് കുമാര്‍ സര്‍ പറഞ്ഞ് മാത്രമാണ് ഞാന്‍ വാര്‍ത്ത അറിയുന്നത്.

അതിന് മുമ്പ് ഏതെങ്കിലും ഘട്ടത്തില്‍ ഏതെങ്കിലും തരത്തില്‍ ഇതുമായി ബന്ധപ്പെട്ട് ആരെയെങ്കിലും ഫോണ്‍ ചെയ്യാനോ ഏതെങ്കിലും മീറ്റിംഗിലോ ഏതെങ്കിലും എഡിറ്റിംഗിലോ എന്ന് വേണ്ട ഞാന്‍ നേരിട്ടോ അല്ലാതെയോ അറിഞ്ഞോ അറിയാതെയോ ഒരു തരത്തിലും ഇടപെട്ടിട്ടില്ല..പിന്നെ എന്ത് ഗൂഢാലോചന?? ഏത് വാര്‍ത്ത സംപ്രേഷണം ചെയ്യണമെന്ന് തീരുമാനിക്കുന്നത് ഒരു അവതാരകന്‍ അല്ലല്ലോ.

ആദ്യ ദിവസം സംപ്രേഷണം ചെയ്യുന്ന വാര്‍ത്തയെ കുറിച്ച് ചീഫ് എഡിറ്റര്‍ ആര്‍ അജിത് കുമാര്‍ സര്‍ അറിയിച്ചത് ഇങ്ങനെ. ലക്ഷ്മി മോഹന്‍ സാക്ഷിയാണ്.. ലക്ഷ്മി മോഹനാണ് അജിത്ത് സര്‍ വിളിക്കുന്നതായി എന്നോട് പറയുന്നതും…അദ്ദേഹം പറഞ്ഞതെല്ലാം ലക്ഷ്മി മോഹന്റെ സാന്നിദ്ധ്യത്തിലും.

ആര്‍ അജിത് കുമാര്‍ സര്‍ അറിയിച്ചത് ”ഒരു വീട്ടമ്മ മന്ത്രിയുടെ അടുത്ത് പരാതിയുമായി പോയി തുടര്‍ന്ന് വീട്ടമ്മക്ക് മന്ത്രിയില്‍ നിന്നു നിരന്തരം പീഡനം ഏല്‍ക്കേണ്ടി വന്നു. ലൈംഗിക ചുവയുള്ള സംഭാഷണങ്ങളും ചേഷ്ടകളും മന്ത്രിയില്‍ നിന്നും ഉണ്ടായതായി വിട്ടമ്മക്ക് പരാതി ഉണ്ട് .ആ സംഭാഷണം വീട്ടമ്മ റക്കോര്‍ഡ് ചെയ്ത് ഏല്‍പിച്ചു. അതാണ് മംഗളം ടെലിവിഷന്‍ സംപ്രേഷണം ചെയ്യുന്ന ആദ്യ വാര്‍ത്ത.

ആര്‍ അജിത് കുമാര്‍ സറിനോട് ഞങ്ങള്‍ ചോദിച്ചു വീട്ടമ്മ വാര്‍ത്തയില്‍ ലൈവല്‍
വരുമോ എന്ന്. അതിന് ആര്‍ അജിത് കുമാര്‍ സര്‍ പറഞ്ഞത് അവര്‍ വീട്ടമ്മ ആയതിനാല്‍ പരസ്യമായി വരില്ല എന്നാണ് . എന്നാല്‍ ടെലിഫോണില്‍ കൂടിയെങ്കിലും ആ വീട്ടമ്മ പ്രതികരിക്കുന്നത് ഉചിതമായിരിക്കും എന്ന് ഞങ്ങള്‍ പറഞ്ഞപ്പോള്‍ ആര്‍ അജിത് കുമാര്‍ സര്‍ പറഞ്ഞ മറുപടി അവരുടെ സ്വകാര്യത മാനിക്കേണ്ടത് ഉണ്ടെന്നും അവര്‍ പരസ്യമായി രംഗത്ത് വരില്ല എന്നുമാണ്. പകരം മന്ത്രിക്കെതിരെ ലൈംഗിക ചൂഷണ കുറ്റത്തിന് മംഗളം ടെലിവിഷന്റെ അഭിഭാഷകന്‍ പരാതി ഫയല്‍ ചെയ്യുമെന്നും ആ പരാതിയില്‍ വീട്ടമ്മ ഒന്നാം സാക്ഷി ആയിരിക്കുമെന്നും അറിയിച്ചു . കേസ് മംഗളം ടെലിവിഷന്‍ നടത്തുമെന്നും പറഞ്ഞു . തെളിവുകള്‍ എല്ലാം മംഗളം ടെലിവിഷന്‍ അന്വേഷണ സംഘത്തിന് കൈമാറും എന്ന് ആവര്‍ത്തിച്ചു അറിയിച്ചു.

വീട്ടമ്മ നല്‍കിയ സംഭാഷണം അടങ്ങിയ മൂന്നര മിന്നിട്ടിന്റെയും എട്ട് മിന്നിട്ടിന്റെയും എഡിറ്റഡ് വെര്‍ഷന്‍ സംപ്രേഷണം ചെയ്യുമെന്നും അറിയിച്ചു.. സംപ്രേഷണ യോഗ്യമായ എഡിറ്റ് വെര്‍ഷന്‍ ആണല്ലോ എന്നും സര്‍ കണ്ടു ബോധ്യപ്പെട്ട് അപ്പ്രൂവ് ചെയ്തതും ആണെല്ലോ എന്ന് ആവര്‍ത്തിച്ചു ചോദിച്ചു ഉറപ്പു വരുത്തി…

വീട്ടമ്മ വാര്‍ത്തയില്‍ വരാത്തത് വാര്‍ത്തയ്ക്ക് നല്ലതല്ല എന്ന് ഞങ്ങള്‍ ചൂണ്ടിക്കാണിച്ചു. അതോടൊപ്പം വാര്‍ത്ത എങ്ങനെ റിപ്പോര്‍ട്ട് ചെയ്യുമെന്നും ഞങ്ങള്‍ ചോദിച്ചു . തിരുവനന്തപുരം ബ്യൂറോ ആണ് വാര്‍ത്ത കൈകാര്യം ചെയ്തതെന്നും തിരുവനന്തപുരം ബ്യൂറോയില്‍ നിന്നും വാര്‍ത്ത ലൈവില്‍ കൈകാര്യം ചെയ്യുമെന്നും ആര്‍ അജിത് കുമാര്‍ സര്‍ അറിയിച്ചു. മന്ത്രി എ കെ ശശീന്ദ്രന്‍ ആണ് ആരോപിതനായ മന്ത്രി എന്നും പറഞ്ഞു . വാര്‍ത്ത അവതരിപ്പിക്കുമ്പോള്‍ 18 വയസ്സിനു താഴെ ഉള്ളവര്‍ വാര്‍ത്ത കാണരുത് എന്നും കുട്ടികള്‍ക്ക് കേള്‍ക്കാനുള്ള വാര്‍ത്ത അല്ല അവരെ മാറ്റി നിറുത്തണമെന്ന് അവതാരകര്‍ അവര്‍ത്തിച്ച് ആവശ്യപ്പെടണമെന്ന് ആര്‍ അജിത് കുമാര്‍ സര്‍ പറഞ്ഞു.

#28_03_2017_ല്‍_നടന്ന_സത്യസന്ധമായ_കാര്യം

ഹണി ട്രാപ്പ് വാര്‍ത്ത ആര്‍ അജിത് കുമാര്‍ സറിന്റെ മേല്‍ നോട്ടത്തില്‍ നടന്ന ഹണി സ്റ്റിംഗ് ഓപ്പറേഷനെന്ന് ഞാന്‍ അറിയുന്നത് 28 03 17 ല്‍..ആദ്യ സൂചനകള്‍ പല മാധ്യമ ചര്‍ച്ചകളില്‍ നിന്നും…

വാര്‍ത്ത തെറ്റിദ്ധരിപ്പിച്ച് അവതരിപ്പിച്ചതിനെ കുറിച്ച്, കളളം പറഞ്ഞതിനെ കുറിച്ച്, വസ്തുതകള്‍ ബോധപൂര്‍വ്വം മറച്ചുവച്ച് ചതിച്ചതിനെ കുറിച്ച് ചോദ്യങ്ങള്‍ ഉണ്ടായപ്പോ കിട്ടിയ മറുപടി ഇങ്ങനെ

ചില സാങ്കേതിക തെറ്റുകള്‍ സംഭവിച്ചുപോയി. മാധ്യമ പ്രവര്‍ത്തക അഭിമുഖം എടുക്കാന്‍ മന്ത്രിയെ സമീപിച്ചപ്പോള്‍ സംഭവിച്ച യഥാര്‍ത്ഥ വസ്തുതകള്‍ തന്നെ ആണ് വാര്‍ത്ത..മാധ്യമ പ്രവര്‍ത്തക മന്ത്രിയാല്‍ അപമാനിക്കപ്പെട്ടു…മാധ്യമ പ്രവര്‍ത്തക പീഡിപ്പിക്കപ്പെട്ടു.. വീട്ടമ്മ കൂടിയായ മാധ്യമ പ്രവര്‍ത്തകയുടെ ഐഡന്റ്റിറ്റി വെളിപ്പെടുത്താതിരിക്കാന്‍ വേണ്ടിയാണ് അവരുടെ ശബ്ദവും വിവരങ്ങളും മറച്ച് വച്ച് വീട്ടമ്മ എന്ന് പറഞ്ഞത്.. മാധ്യമ ഫ്രവര്‍ത്തകയെ മന്ത്രി ലൈംഗികമായി ഉപയോഗിക്കാന്‍ ശ്രമിച്ചു എന്ന് ചീഫ് എഡിറ്റര്‍ ആവര്‍ത്തിച്ചു ആണയിട്ടു… മന്ത്രി നിരന്തരം മാധ്യമ പ്രവര്‍ത്തകയെ ലൈംഗിക ചേഷ്ഠകള്‍ക്ക് നിര്‍ബന്ധിച്ചിരുന്നു…മന്ത്രി മാധ്യമ പ്രവര്‍ത്തകയെ വശീകരിച്ചിരുന്നു എന്നും ആര്‍ അജിത്ത് കുമാര്‍ സര്‍ ആണയിട്ട് കരഞ്ഞ് പറഞ്ഞു. പരാതി നല്‍കുമെന്നും തെളിവുകള്‍ കോടതിയില്‍ നല്‍കും എന്നും ആണയിട്ട് കരഞ്ഞ് പറഞ്ഞു. അത് വിശ്വസിച്ചു മാത്രമാണ് പിന്നെ തുടര്‍ന്നത്…

ഉറപ്പ് തന്നതിന്‍ പ്രകാരം തിരുവനന്തപുരം സി ജെ എം കോടതിയില്‍ എ കെ ശശീന്ദ്രനെതിരെ കേസ് വന്നു.. CC No 528/2017..എ കെ ശശീന്ദ്രന്‍ പ്രഥമദൃഷ്ട്യാ കുറ്റക്കാരനെന്ന് കണ്ടെത്തിയ സി ജെ എം കോടതി എ കെ ശശീന്ദ്രനെ സമന്‍സ് അയച്ച് വിളിച്ച് വരുത്തി…വിചാരണ തുടങ്ങി..

പക്ഷേ വിചാരണ ഘട്ടത്തില്‍ പെട്ടെന്ന് ആരും അറിയാതെ ഒരു സൂചനയും ഇല്ലാതെ കോടതിയില്‍ നിന്ന് കേസ് പിന്‍വലിക്കപ്പെട്ടു…എ കെ ശശീന്ദ്രനെ വീണ്ടും മന്ത്രിയുമാക്കി..

അന്ന് തുടങ്ങി സത്യം തേടി, നീതി തേടി, നിരപരാധിത്വം തെളിയിക്കാനുളള പോരാട്ടം…അന്ന് തുടങ്ങി തൊഴില്‍ ഇല്ലാതാക്കാന്‍ കുതന്ത്രം, ഒറ്റപ്പെടുത്താന്‍ കുതന്ത്രം, കൂടാതെ ഭീഷണിയും വ്യാജ പ്രചാരണവും…

പോരാടും നിരപരാധിത്വം തെളിയിക്കാന്‍ അവസാന ശ്വാസം വരെ

(( NB: നൂറ് ശതമാനം സത്യസന്ധമായി അറിഞ്ഞനുഭവിച്ച കാര്യങ്ങള്‍.. പറയുന്ന കാര്യങ്ങള്‍ കള്ളമെന്ന് ആര്‍ക്കെങ്കിലും അഭിപ്രായമുണ്ടെങ്കില്‍ അവര്‍ പറയുന്ന ഏത് ഏജന്‍സിയിലും നുണപരിശോധനയ്ക്ക് ഞാന്‍ തയ്യാറാണ്. ഏത് അന്വേഷണ സംഘത്തിനും മുന്നില്‍ ഹാജരായി എത് തരം ചോദ്യം ചെയ്യലിന് വിധേയനാകാനും ഞാന്‍ തയ്യാറാണ്. അപരാധികള്‍ ശിക്ഷിക്കപ്പെടണ്ട പക്ഷേ നൂറ് ശതമാനം നിരപരാധികള്‍ക്ക് നീതി കിട്ടണം. പണത്തിലും പ്രതാപത്തിലും സ്വാധീനത്തിലും ആ നീതി മുങ്ങി താഴ്ന്നു പോകാന്‍ പാടില്ല ))

https://www.facebook.com/pradeep.sv.90/posts/2460556087293431