കൊച്ചി: ബാര്‍ക്കോഴ കേസില്‍ എക്‌സൈസ് മന്ത്രി കെ. ബാബുവിനെതിരെ സിബിഐ അന്വേഷണം വേണ്ടെന്ന് സര്‍ക്കാര്‍. ഇക്കാര്യം അറിയിച്ച് വിജിലന്‍സ് ഡയറക്ടര്‍ എന്‍. ശങ്കര്‍ റെഡ്ഡി ഹൈക്കോടതിയില്‍ സത്യവാങ്മൂലം നല്‍കി.
കെ. ബാബുവിനെതിരെ എറണാകുളം റേഞ്ച് വിജിലന്‍സ് ഡിവൈഎസ്പി അന്വേഷണം നടത്തിയിരുന്നു. ഈ അന്വേഷണത്തില്‍ 24 സാക്ഷികളുടെ മൊഴിയെടുത്തു. 11 രേഖകള്‍ പിടിച്ചെടുത്തു. മന്ത്രി ബാബുവിന്റേയും മൊഴിയെടുത്തു. എന്നാല്‍ ഇതിലൊന്നും മന്ത്രിയെ വിചാരണ ചെയ്യാന്‍ തക്ക തെളിവുകള്‍ ലഭിച്ചില്ല. തുടര്‍ന്നു നടപടികള്‍ അവസാനിപ്പിക്കാന്‍ !വിജിലന്‍സ് ഡയറക്ടര്‍ ഉത്തരിവിട്ടു. അതുകൊണ്ടാണു ബാബുവിനെതിരെ എഫ്‌ഐആര്‍ രജിസ്റ്റര്‍ ചെയ്യാതിരുന്നതെന്ന് സത്യവാങ്മൂലത്തില്‍ പറയുന്നു.
മൂന്നു കീഴ്‌ക്കോടതികളില്‍ കെ. ബാബുവിനെതിരെ അന്വേഷണ ആവശ്യം ഉന്നയിച്ചു ഹര്‍ജികള്‍ നല്‍കിയിട്ടുണ്ട്. ഈ മൂന്നു കോടതികളിലും ഇതു സംബന്ധിച്ച കേസ് പുരോഗമിക്കുകയാണ്. ഈ സാഹചര്യത്തില്‍ ഇതേ ആവശ്യം ഉന്നയിച്ചു ഹൈക്കോടതിയില്‍ ഹര്‍ജി നല്‍കുന്നതു നിയമത്തെ ദുരുപയോഗം ചെയ്യുന്നതാണ്.
അതുകൊണ്ട് സിബിഐ അന്വേഷണം ആവശ്യപ്പെടുന്ന ഹര്‍ജിക്കാര്‍ കീഴ്‌ക്കോടതികളിലെ കേസുകളില്‍ കക്ഷിചേരുകയാണു വേണ്ടതെന്നും സത്യവാങ്മൂലത്തില്‍ വ്യക്തമാക്കുന്നു. സിബിഐ അന്വേഷണം ആവശ്യപ്പെട്ടു ഹൈക്കോടതിയില്‍ വി.എസ്. സുനില്‍ കുമാര്‍ എംഎല്‍എ അടക്കമുള്ളവര്‍ നല്‍കിയ ഹര്‍ജിയിലാണു സര്‍ക്കാര്‍ സത്യവാങ്മൂലം.
Discussion about this post