ഇസ്ളാമാബാദ്: തീവ്രവാദത്തിന് സാമ്പത്തിക സഹായം ചെയ്യുന്ന ശക്തികളെ കണ്ടെത്തി അമര്‍ച്ച ചെയ്യാന്‍ കഴിയാത്ത പാകിസ്ഥാനെ ‘ഗ്രേ ലിസ്‌റ്റി’ല്‍ ഉള്‍പ്പെടുത്തി അന്താരാഷ്‌ട്ര സംഘടനയായ ഫിനാന്‍ഷ്യല്‍ ആക്‌ഷന്‍ ടാസ്‌ക് ഫോഴ്‌സ് (എഫ്.എ.ടി.എഫ്). കഴിഞ്ഞ 13 വര്‍ഷമായി ഗ്രേ ലിസ്‌റ്റില്‍ തുടരുന്ന പാകിസ്ഥാന് 38 ബില്യണ്‍ ഡോളര്‍ സാമ്പത്തിക നഷ്‌ടമാണ് ഉണ്ടായത്. അന്താരാഷ്‌ട്ര തലത്തില്‍ കള‌ളപ്പണം വെളുപ്പിക്കുന്നതിനും തീവ്രവാദത്തിന് സാമ്പത്തിക സഹായം ലഭിക്കുന്നതുമായ ശക്തികള്‍ക്കെതിരെ പ്രവര്‍ത്തിക്കുന്ന സംഘടനയാണ് എഫ്.എ.ടി.എഫ്.
തന്ത്രപരമായി തീവ്രവാദത്തെ നേരിടുന്നതില്‍ പാകിസ്ഥാന് പരാജയപ്പെട്ടിരിക്കുകയാണെന്ന് വിലയിരുത്തിയ സംഘടന തങ്ങള്‍ ആവശ്യപ്പെട്ട 27 കാര്യങ്ങള്‍ പാകിസ്ഥാന് ശരിയായ രീതിയില്‍ നടപ്പാക്കിയില്ലെന്ന് കണ്ടെത്തി. തീവ്രവാദത്തെ നേരിടുന്ന നടപടികളില്‍ പാകിസ്ഥാന് ചെറിയ പുരോഗതി വരുത്തിയിട്ടുണ്ടെങ്കിലും തീവ്രവാദത്തിന് പണം നല്‍കുന്നവര്‍ക്കെതിരായ നടപടികളില്‍ വന്ന പിഴവ് തിരുത്താനുള‌ള പാകിസ്ഥാന്റെ ആക്ഷന്‍പ്ളാന്‍ ഇനിയും പൂര്‍ണമാക്കാനുണ്ടെന്ന് എഫ്.എ.ടി.എഫ് പ്രസിഡന്റ് മാര്‍കസ് പ്ളെയെര്‍ പാരിസില്‍ പറഞ്ഞു.
കഴിഞ്ഞ ഒക്‌ടോബറിലാണ് തീവ്രവാദത്തിന് സാമ്ബത്തിക സഹായം നല്‍കുന്ന ശക്തികളെ അടിച്ചമര്‍ത്താന്‍ എഫ്.എ.ടി.എഫ് പാകിസ്ഥാനോട് ആവശ്യപ്പെട്ടത്. ഫെബ്രുവരി വരെയായിരുന്നു സമയം അനുവദിച്ചത്. എന്നാല്‍ പാകിസ്ഥാന് ഇക്കാര്യത്തില്‍ കാര്യമായ പുരോഗതിയൊന്നും വരുത്തിയിട്ടില്ല. ജൂണ്‍ മാസത്തിനകം 27ല്‍ ബാക്കിയുള‌ള മൂന്ന് കാര്യങ്ങളും പൂര്‍ത്തിയാക്കണമെന്ന് എഫ്.എ.ടി.എഫ് പാകിസ്ഥാന് മുന്നറിയിപ്പ് നല്‍കി.
സാമ്പത്തിക സഹായം നല്‍കുന്ന ആയിരത്തിലധികം തീവ്രവാദികള്‍ക്കെതിരെ നടപടിയെടുക്കുകയാണ് പാകിസ്ഥാന് ചെയ്യേണ്ടത്. ഗ്രേ ലിസ്‌റ്റില്‍ പാകിസ്ഥാന് ഉള്‍പ്പെടുമ്പോള്‍ അന്താരാഷ്‌ട്ര നാണയ നിധിയില്‍ ഉള്‍പ്പടെ ആഗോള സംഘടനകളില്‍ നിന്ന് വികസനത്തിന് സാമ്പത്തിക സഹായം ലഭിക്കില്ല. നിലവില്‍ കടുത്ത ദാരിദ്രാവസ്ഥയില്‍ വിഷമിക്കുന്ന രാജ്യത്തിന് വന്‍ തിരിച്ചടി തന്നെയാണ് ഈ തീരുമാനം. എന്നാല്‍ പാകിസ്ഥാന് ഗ്രേ ലിസ്‌റ്റില്‍ തന്നെ തുടരാന്‍ ചില യൂറോപ്യന്‍ രാജ്യങ്ങള്‍ എഫ്.എ.ടി.എഫിനെ നിര്‍ബന്ധിച്ചതായി പാക് മാദ്ധ്യമങ്ങള്‍ ആരോപിക്കുന്നുണ്ട്.
Discussion about this post