കൊച്ചി: കോണ്‍ഗ്രസിലെ ഗ്രൂപ്പ് തര്‍ക്കത്തിനെതിരെ ശക്തമായ താക്കീതുമായി മുതിര്‍ന്ന കോണ്‍ഗ്രസ് നേതാവ് എ. കെ ആന്റണി. കോണ്‍ഗ്രസില്‍ തലമുറ മാറ്റം വേണമെന്നും ചെറുപ്പക്കാര്‍ നേതൃനിരയിലേക്ക് വരണമെന്നും ആന്റണി ആവശ്യപ്പെട്ടു. കൊച്ചിയില്‍ നടന്ന രാജീവ് ഗാന്ധി സദ്ഭാവന സംഗമം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.
കേരളത്തിലെ കോണ്‍ഗ്രസിന് നാശം വരാന്‍ പോകുന്നുവെന്നും മുന്‍ തിരഞ്ഞെടുപ്പുകളില്‍ ഉണ്ടായിരുന്ന അടിത്തറ ഇന്നില്ലെന്നും അദ്ദേഹം ചൂണ്ടിക്കാട്ടി. കോണ്‍ഗ്രസിന്റെ ജനകീയാടിത്തറ നഷ്ടപ്പെട്ടു. കണ്ടാലും കൊണ്ടാലും കോണ്‍ഗ്രസ് പഠിക്കില്ലെന്നും പാര്‍ട്ടിയുടെ ജനകീയ അടിത്തറ പങ്കിട്ടെടുക്കാന്‍ നടക്കുന്ന ശ്രമം തിരിച്ചറിയണമെന്നും എ.കെ ആന്റണി പറഞ്ഞു.
സംഘപരിവാര്‍ കോണ്‍ഗ്രസിന്റെ വോട്ടുകള്‍ അടര്‍ത്തിയെടുക്കുന്നു. ഒറ്റക്കെട്ടായി മുന്നോട്ടുപോയില്ലെങ്കില്‍ പാര്‍ട്ടി വിട്ട് പോയവര്‍ മടങ്ങി വരില്ല. ചര്‍ച്ച നടത്തിയതുകൊണ്ടോ ഒന്നിച്ച് ഫോട്ടോ എടുത്തതുകൊണ്ടോ മാത്രം കാര്യമില്ല. ഇന്ത്യാ പാക് പ്രധാനമന്ത്രിമാര്‍ ചേര്‍ന്ന് ഒന്നിച്ച് ഫോട്ടെയെടുത്ത് സംയുക്ത പ്രസ്താവന നടത്തുന്നത് പോലെയാണിത്. ഇതില്‍ തനിക്ക് വിശ്വാസമില്ലെന്നും ആന്റണി പറഞ്ഞു.
ഒന്നിച്ച് നിന്നില്ലെങ്കില്‍ നേതാക്കള്‍ക്ക് ചരിത്രം മാപ്പ് നല്‍കില്ലെന്നും അദ്ദേഹം കൂട്ടിച്ചേര്‍ത്തു.
Discussion about this post