ബോളിവുഡ് നടന്‍ സുശാന്ത് സിംഗ് രജ്പുത്തിന്റെ മരണത്തില്‍ ദുരൂഹത. സുശാന്തിന് ആത്മഹത്യ ചെയ്യാന്‍ കഴിയില്ലെന്ന് ജാന്‍ അധികാര്‍ പാര്‍ട്ടി (ജെ എ പി ) നേതാവ് പപ്പു യാദവ് ആരോപിച്ചു. ബോളിവുഡ് നടന്റെ മരണത്തില്‍ സിബിഐ അന്വേഷണം വേണമെന്നാവശ്യപ്പെട്ട് പപ്പു യാദവ് ഞായറാഴ്ച പട്നയില്‍ സുശാന്ത് സിംഗ് രജ്പുത്തിന്റെ കുടുംബാംഗങ്ങളെ കണ്ടു. മരണത്തില്‍ ഗൂഢാലോചനയുണ്ടെന്നും സുശാന്ത് ആത്മഹത്യ ചെയ്യുമെന്ന് കരുതുന്നില്ലെന്നും കുടുംബം പ്രതികരിച്ചു.
മരണത്തിന് പിന്നിലെ സത്യാവസ്ഥ അന്വേഷിച്ച്‌ പുറത്ത് കൊണ്ടുവരണമെന്നും സുശാന്തിന്റെ അമ്മാവന്‍ പ്രമുഖ വാര്‍ത്താ ഏജന്‍സിയോട് പ്രതികരിച്ചു.ആത്മഹത്യാ കുറിപ്പ് കണ്ടെത്തിയില്ലെങ്കിലും സുശാന്തിന്റേത് ആത്മഹത്യയാണെന്ന നിഗമനത്തിലാണ് പൊലീസ്. സുശാന്ത് അവസാനമായി ജോലിക്കാരനോട് പറഞ്ഞ വാക്കുകളും ഇപ്പോള്‍ ചര്‍ച്ചയാകുകയാണ്.
അടുത്ത ശമ്പളം നല്‍കാന്‍ തനിക്ക് കഴിയുമോ ഇല്ലയോ എന്നറിയില്ലെന്നാണ് സുശാന്ത് ജോലിക്കാരനോട് പറഞ്ഞത്. കഴിഞ്ഞ മാസത്തെ ശമ്പളം നല്‍കിയപ്പോഴായിരുന്നു സുശാന്ത് ഇക്കാര്യം സൂചിപ്പിച്ചത്. ജോലിക്കാര്‍ക്കുള്ള മുഴുവന്‍ ശമ്പളവും സുശാന്ത് നല്‍കിയിരുന്നു. സുശാന്തിന്റെ മരണം ജോലിക്കാരേയും ഏറെ വേദനിപ്പിച്ചിരിക്കുകയാണ്.മരിക്കുന്നതിന് തലേന്ന് വീട്ടില്‍ കൂട്ടുകാര്‍ക്കൊപ്പം ഏറെനേരം ചെലവഴിച്ചതായും റിപ്പോര്‍ട്ട് ഉണ്ട്. ശനിയാഴ്ച രാത്രി ഏറെ വൈകിയാണ് സുശാന്ത് ഉറങ്ങാന്‍ കിടന്നത്.
അതിനാല്‍ രാവിലെ എഴുന്നേല്‍ക്കാന്‍ വൈകിയതില്‍ വീട്ടുജോലിക്കാര്‍ക്ക് സംശയമൊന്നും തോന്നിയില്ലെന്നും ദേശീയമാധ്യമങ്ങള്‍ റിപ്പോര്‍ട്ട് ചെയ്തു. എന്നാല്‍, ഇക്കാര്യം നടന്റെ സുഹൃത്തുക്കള്‍ സ്ഥിരീകരിച്ചിട്ടില്ല.സുശാന്തിനൊപ്പം മൂന്ന് വീട്ടുജോലിക്കാരും ഫ്ളാറ്റില്‍ കഴിഞ്ഞിരുന്നു. ശനിയാഴ്ച രാത്രി അദ്ദേഹത്തിനൊപ്പം ഒരു സുഹൃത്തും ഉണ്ടായിരുന്നതായാണ് വിവരം.ഉച്ചയോടെ വീട്ടുജോലിക്കാരില്‍ ഒരാള്‍ പോയി വാതില്‍ മുട്ടിയെങ്കിലും തുറന്നില്ല. ഇതോടെ സംശയം തോന്നിയ ഇയാള്‍ മറ്റുള്ളവരെ അറിയിക്കുകയായിരുന്നു.
മുറി തുറക്കാനാവാതിരുന്നതോടെ ഇദ്ദേഹത്തിന്റെ സുഹൃത്ത് പോലീസിനെ വിവരം അറിയിച്ചു. തുടര്‍ന്ന് 12.30 യോടെ വാതില്‍ തള്ളി തുറന്നപോഴാണ് മരിച്ച നിലയില്‍ കണ്ടെത്തിയത്. അതേസമയം ഹരിയാന മുഖ്യമന്ത്രിയുടെ ഓഫീസില്‍ സ്‌പെഷ്യല്‍ ഓഫീസറായി നിയമിതനായ സുശാന്ത് സിംഗ് രജ്പുത്തിന്റെ സഹോദരന്‍ അഡീഷണല്‍ ഡിജിപി ഒ പി സിങ്ങും കുറ്റകൃത്യത്തില്‍ തിരിമറികള്‍ നടന്നതായി സംശയിക്കുന്നു.
സംഭവത്തെക്കുറിച്ച്‌ അറിഞ്ഞ ഉടന്‍ ഒ പി സിംഗ് മുംബൈയിലേക്ക് പുറപ്പെട്ടതായി സംസ്ഥാന അധികൃതര്‍ പറഞ്ഞു.ആത്മഹത്യയില്‍ ദുരൂഹത നിഴലിക്കുന്നതിനാല്‍ സമഗ്രമായ അന്വേഷണം നടത്തുകയാണ് അദ്ദേഹം.സഹോദരി ചണ്ഡിഗഡിലാണ് താമസിക്കുന്നത്.
