പട്ന: ജെ എൻ യു കൂട്ടാളി ഉമർ ഖാലിദിനെ തള്ളിപ്പറഞ്ഞ് സിപിഐ വിട്ട് കോൺഗ്രസിൽ ചേർന്ന നേതാവ് കനയ്യ കുമാർ. ഡൽഹി കലാപവുമായി ബന്ധപ്പെട്ട കേസിൽ ജയിലിൽ കഴിയുന്ന ഉമർ ഖാലിദിനെ കുറിച്ചുള്ള മാധ്യമപ്രവർത്തകരുടെ ചോദ്യത്തോടായിരുന്നു കനയ്യ കുമാറിന്റെ പ്രതികരണം. ഉമർ ഖാലിദ് കോൺഗ്രസ് പാർട്ടിക്കാരനാണോ എന്നും കനയ്യ മാധ്യമപ്രവർത്തകരോട് തിരിച്ച് ചോദിച്ചു.
കോൺഗ്രസുകാരനല്ലാത്ത ആളെ കുറിച്ചു തന്നോടു ചോദിച്ചിട്ടെന്താ കാര്യമെന്നും കനയ്യ കുമാർ മാധ്യമപ്രവർത്തകരോട് മറുചോദ്യം ചോദിച്ചു. ഉമർ ഖാലിദ് താങ്കളുടെ സുഹൃത്ത് അല്ലേയെന്ന മാധ്യമ പ്രവർത്തകരുടെ ചോദ്യത്തിന്, സുഹൃത്താണെന്ന് ആരു പറഞ്ഞുവെന്നായിരുന്നു കനയ്യയുടെ മറുചോദ്യം.
ഉമർ ഖാലിദിനെ കനയ്യ തള്ളിപ്പറയുന്ന വീഡിയോ സാമൂഹിക മാധ്യമങ്ങളിൽ വൈറൽ ആയതോടെ കനയ്യയെ ആദ്യം അനുകൂലിച്ച പലരും വിമർശനങ്ങളുമായി രംഗത്ത് വന്നു. ജെഎൻയു പ്രക്ഷോഭകാലത്തു കനയ്യയും ഉമർ ഖാലിദും ഒരുമിച്ചിരിക്കുന്ന ചിത്രങ്ങൾ പങ്കുവച്ച് പലരും കനയ്യയെ പരിഹസിച്ചു. കനയ്യ കുമാർ ഭീരുവും അവസരവാദിയുമാണെന്ന് നിരാശരായ സുഹൃത്തുക്കൾ പരിതപിച്ചു. രോഹിത് വെമുലയുടെ ആത്മഹത്യ വിറ്റു കാശാക്കിയവൻ എന്ന വിമർശനങ്ങളും സാമൂഹിക മാധ്യമങ്ങളിൽ ഉയർന്നു.
