ആലുവ: എറണാകുളം പറവൂരില് ഭക്ഷ്യ വിഷബാധയെ തുടർന്ന് ഹോട്ടൽ അടപ്പിച്ചു. പറവൂര് ടൗണിലെ മജ്ലിസ് ഹോട്ടലിലെ ഭക്ഷണത്തിൽ നിന്നാണ് വിഷബാധ ഉണ്ടായത്. കുഴിമന്തി കഴിച്ച 17പേര് ആശുപത്രിയില് ആയതിനെ തുടർന്നാണ് ആരോഗ്യവിഭാഗം ആശുപത്രിയിൽ പരിശോധന നടത്തിയത്. കുഴിമന്തിയും ബിരിയാണിയും കഴിച്ചവര്ക്കാണ് ഭക്ഷ്യവിഷബാധയേറ്റത്.
ഭക്ഷ്യ വിഷബാധയെ തുടർന്ന് രണ്ടു കുട്ടികൾ ഉൾപ്പടെ 17 പേരെ പറവൂർ താലൂക്ക് ആശുപത്രിയിൽ പ്രവേശിപ്പിച്ചു. ഗുരുതരാവസ്ഥയിലായ ഒരു യുവതിയെ എറണാകുളം മെഡിക്കൽ കോളജ് ആശുപത്രിയിലേയ്ക്കു മാറ്റിയിട്ടുണ്ട്. ഇതിൽ 9 പേർ കുന്നുകര എംഇഎസ് കോളജിലെ വിദ്യാർഥികളാണ്. കൂടുതൽ പേർക്കു വിഷബാധ ഏറ്റിട്ടുണ്ടെന്നാണ് വിവരം .
തിങ്കളാഴ്ച വൈകുന്നേരമായിരുന്നു മൂന്നുപേരും മജ്ലിസില്നിന്ന് കുഴിമന്തി കഴിച്ചത്. പിന്നാലെ ഛര്ദ്ദിലുള്പ്പെടെയുള്ള ശാരീരിക അസ്വസ്ഥതകളുണ്ടായതായാണ് വ്യക്തമാകുന്നത്.കുഴിമന്തിയും അൽഫാമും ഷവായിയും കഴിച്ചവരെയാണ് കടുത്ത ഛർദിയെയും വയറിളക്കത്തെയും തുടർന്ന് ആശുപത്രിയിൽ പ്രവേശിപ്പിച്ചത്.
മാംസം ഭക്ഷിച്ചതാണ് ആരോഗ്യപ്രശ്നമുണ്ടാക്കിയത് എന്നാണ് സൂചന. മുൻസിപ്പാലിറ്റി കഴിഞ്ഞ ദിവസം ഇവരുടെ തന്നെ മറ്റൊരു ഹോട്ടലിൽ നിന്നു പഴയ ചായപ്പൊടിയിൽ നിറം ചേർത്തതു പിടികൂടിയതിനെ തുടർന്ന് നടപടി സ്വീകരിച്ചിരുന്നു.












