കായംകുളം: ഗോ സേവാ പ്രാന്തീയ പ്രശിക്ഷൺ പ്രമുഖും രാഷ്ട്രീയ സ്വയംസേവക സംഘം കായംകുളം മുൻ താലൂക് കാര്യവാഹുമായ ശ്രീവിഠോബാ വാർഡ് കനക ഭവനത്തിൽ എ. ജയകുമാറിന് ആദരാഞ്ജലി അർപ്പിച്ച് ജനങ്ങൾ. അറുപതാമത്തെ വയസ്സിൽ സംഭവിച്ച അകാല വേർപാട് ആദ്ധ്യാത്മിക മേഖലയ്ക്കും ഗോആധാരിത ജൈവകൃഷി വികാസത്തിനും ഓണാട്ടുകര പ്രദേശത്തെ ജനങ്ങൾക്കും തീരാനഷ്ടമാണെന്നും പ്രമുഖർ അനുസ്മരിച്ചു.
ജൈവകൃഷി പ്രചാരത്തിനും നാടൻ പശു പരിപാലനത്തിനും സമർപ്പിതമായിരുന്നു അദ്ദേഹത്തിന്റെ ജീവിതം. 2010ൽ നടന്ന അഖില ഭാരതീയ ഗോഗ്രാമയാത്രയിൽ നിന്ന് പ്രചോദനമുൾക്കൊണ്ടാണ് ജയകുമാർ ഗോസേവയിലേക്ക് തിരിയുന്നത്. കാസർകോട് കുള്ളൻ, കൃഷ്ണ, വെച്ചൂർ, കപില, സാഹൃവാൾ, കാങ്കയം തുടങ്ങീ നാടൻ ഇനങ്ങളിൽ പെട്ട നിരവധി പശുക്കളെ അദ്ദേഹം ഓണാട്ടുകരയിലെ കർഷകർക്ക് പരിചയപ്പെടുത്തി. തപാൽവകുപ്പിലെ ഔദ്യോഗിക ജീവിതവും സംഘടനാ ജീവിതവും നിർവഹിക്കുമ്പോഴും ഗോപരിപാലനത്തിന്റെ ഉത്തമ മാതൃകയായിരുന്നു ജയകുമാർ. ഗോസേവ പ്രശിക്ഷണത്തിനായി അദ്ദേഹം കേരളം മുഴുവൻ യാത്ര ചെയ്തു.
1980ൽ പത്തൊമ്പതാം വയസ്സിൽ ആർഎസ്എസ് കായംകുളം താലൂക്ക് കാര്യവാഹ് ആയാണ് ജയകുമാർ സംഘടനാ പ്രവർത്തനം ആരംഭിക്കുന്നത്. മാവേലിക്കര വിദ്യാധിരാജ നഴ്സിംഗ സ്കൂൾ സെക്രട്ടറിയായി പ്രവർത്തിച്ചിട്ടുണ്ട്. കേരള ക്ഷേത്രസംരക്ഷണസമിതിയുടെ ആലപ്പുഴ ജില്ലാ സെക്രട്ടറി, ആലപ്പുഴ ജില്ലാ ദേവസ്വം സെക്രട്ടറി, സംസ്ഥാന സെക്രട്ടറി, ക്ഷേത്രശക്തി മാസികയുടെ പ്രവർത്തകൻ എന്നീ നിലകളിലും പ്രവർത്തിച്ചു.
ജയകുമാറിന്റെ നേതൃത്വത്തിൽ നിരവധി കുടുംബക്ഷേത്രങ്ങളെ ഏറ്റെടുത്ത് സംരക്ഷിച്ചിട്ടുണ്ട്. ഹരിപ്പാട് പിത്തംബിൽ ക്ഷേത്രത്തിൽ നടന്ന ആദൃ അന്തർദേശീയ സമ്മേളനം ജയകുമാറിന്റെ ആശയവും സംഘടനാമികവും ആയിരുന്നു. ചെങ്ങന്നൂർ പേരിശ്ശേരി ക്ഷേത്ര പൂജാരിയായും പ്രവർത്തിച്ചു. ശ്രീനാരായണഗുരുദേവചരിതം എന്ന പുസ്തകം രചിച്ചിട്ടുണ്ട്. നിലവിൽ ഏവൂർ ബ്രാഞ്ച് പോസ്റ്റ് മാസ്റ്ററായിരുന്നു. ഭാര്യ: ജ്യോതിലക്ഷ്മി കായംകുളം ഹെഡ്പോസ്റ്റോഫീസിൽ ജീവനക്കാരിയാണ്. ഏകമകൾ കനക മഹാലക്ഷ്മി കൃഷ്ണപുരം ബ്രാഞ്ച് പോസ്റ്റ് വുമണ് ആയും സേവനം അനുഷ്ഠിക്കുന്നു.












