നെൻമാറ: നാട്ടിലിറങ്ങി ജനജീവിതത്തിന് ഭീഷണിയുണ്ടാക്കുന്ന കാട്ടാന അരിക്കൊമ്പനെ പറമ്പിക്കുളത്തേക്ക് മാറ്റണമെന്ന ഹൈക്കോടതി ഉത്തരവിനെതിരെ പ്രതിഷേധം. പറമ്പിക്കുളത്തെ ജനങ്ങളാണ് പ്രതിഷേധവുമായി രംഗത്തെത്തിയത്. നെൻമാറ എംഎൽഎ കെ ബാബു ഇതുമായി ബന്ധപ്പെട്ട് മുഖ്യമന്ത്രിക്ക് കത്തയയ്ക്കുകയും ചെയ്തു.
പറമ്പിക്കുളം മുതുവരച്ചാൽ മേഖലയിലേക്ക് അരിക്കൊമ്പനെ മാറ്റണമെന്ന് ആയിരുന്നു വിദഗ്ധ സമിതിയുടെ നിർദ്ദേശം. ഇത് കണക്കിലെടുത്താണ് ചിന്നക്കനാലിൽ നിന്ന് പറമ്പിക്കുളത്തേക്ക് മാറ്റാൻ ഹൈക്കോടതി ഉത്തരവിട്ടത്. വ്യാഴാഴ്ച പറമ്പിക്കുളത്ത് ജനകീയ പ്രതിഷേധത്തിനുൾപ്പെടെ നീക്കം നടക്കുന്നതായ വാർത്തകളും പുറത്തുവന്നിട്ടുണ്ട്.
പാലക്കാട് ചിറ്റൂർ താലൂക്കിൽ കടുവാസങ്കേതം ഉൾപ്പെട്ട വനമേഖലയാണ് പറമ്പിക്കുളം. ആദിവാസി കോളനികൾ ഉൾപ്പെടെ ഇവിടെയുണ്ടെന്നും അക്രമസ്വഭാവമുളള ആനയെ ഇവിടെ വിടുന്നത് ജനങ്ങളുടെ സുരക്ഷയ്ക്ക് ഭീഷണിയാണെന്നും നാട്ടുകാർ പറയുന്നു. നിലവിൽ അരിക്കൊമ്പൻ മദപ്പാടിലാണെന്ന റിപ്പോർട്ടുകളും ആശങ്ക ഇരട്ടിയാക്കുന്നു.
അരിക്കൊമ്പനെ പിടികൂടാനുളള മിഷൻ അരിക്കൊമ്പൻ ദൗത്യം അവസാന ഘട്ടത്തിലേക്ക് അടുക്കുമ്പോഴാണ് ഹൈക്കോടതി വിഷയത്തിൽ ഇടപെട്ടത്. ആനയെ മയക്കുവെടി വെച്ച് പിടികൂടുന്നതും വനംവകുപ്പിന്റെ താവളത്തിലേക്ക് മാറ്റുന്നതും തടഞ്ഞ കോടതി ഇക്കാര്യം പരിശോധിക്കാൻ വിദഗ്ധ സമിതിയെ നിയോഗിക്കുകയായിരുന്നു.











