തിരുവനന്തപുരം : തിങ്കളാഴ്ച രാത്രി വരെ കേരളതീരത്ത് കടൽക്ഷോഭം രൂക്ഷമാകാൻ സാധ്യതയുണ്ടെന്ന് മുന്നറിയിപ്പ്. ദേശീയ സമുദ്രസ്ഥിതിപഠന ഗവേഷണ കേന്ദ്രമാണ് കേരളത്തിലെ തീരപ്രദേശത്ത് താമസിക്കുന്നവർക്കും മത്സ്യത്തൊഴിലാളികൾക്കും ജാഗ്രതാ നിർദ്ദേശം നൽകിയത്.
2.8 മുതൽ 3.3 മീറ്റർ വരെ ഉയർന്ന തിരമാലയ്ക്കും കടലാക്രമണത്തിനും സാധ്യതയുണ്ടെന്നും മുന്നറിയിപ്പുണ്ട്.
തിങ്കളാഴ്ച കടൽക്ഷോഭത്തിനും ഉയർന്ന തിരമാലകൾക്കും സാധ്യതയുള്ളതിനാൽ ബീച്ചുകളിലേക്കുള്ള യാത്രയും കടലിൽ ഇറങ്ങുന്നതും ഒഴിവാക്കണമെന്നും ദേശീയ സമുദ്രസ്ഥിതിപഠന ഗവേഷണ കേന്ദ്രത്തിന്റെ നിർദ്ദേശത്തിൽ പറയുന്നു. തീരപ്രദേശങ്ങളിൽ താമസിക്കുന്നവർ അധികൃതരുടെ നിർദ്ദേശം ഉണ്ടെങ്കിൽ മാറി താമസിക്കാനും തയ്യാറാകേണ്ടതാണ്. മത്സ്യബന്ധനത്തിന് പോകരുതെന്നും ഹാർബറിൽ കെട്ടിയിടുന്ന വള്ളങ്ങൾ തമ്മിൽ നിശ്ചിത അകലം പാലിക്കേണ്ടതാണെന്നും നിർദ്ദേശമുണ്ട്.
കേരളത്തിലെ എല്ലാ ജില്ലകളിലെയും സമുദ്രതീരങ്ങളിൽ ഉള്ളവർ ജാഗ്രത പാലിക്കേണ്ടതുണ്ടെന്ന് മുന്നറിയിപ്പിൽ പറയുന്നു. മത്സ്യബന്ധന ഉപകരണങ്ങൾ സുരക്ഷിതമായി സൂക്ഷിക്കണമെന്നും ഞായറാഴ്ച രാത്രി നൽകിയ അറിയിപ്പിൽ വ്യക്തമാക്കിയിട്ടുണ്ട്.












