തിരുവനന്തപുരത്ത് വെച്ച് ഹെൽമറ്റ് മാറി എടുത്തതിന്റെ വിഷമത്തിൽ ഷംനാദ് എന്ന യുവാവ് സമൂഹമാദ്ധ്യമങ്ങളിൽ പങ്കുവെച്ച കുറിപ്പ് ഇപ്പോൾ ശ്രദ്ധ നേടുകയാണ് . താൻ മാറിയെടുത്ത ഹെൽമറ്റിന്റെ ഉടമയെ തേടി ഇദ്ദേഹം ഫേസ്ബുക്കിൽ പങ്കുവെച്ച കുറിപ്പ് ഇപ്പോൾ നിരവധി പേരാണ് ഷെയർ ചെയ്തു കൊണ്ടിരിക്കുന്നത്. ശനിയാഴ്ച വൈകുന്നേരം ആണ് തിരുവനന്തപുരം കിംസിനു മുൻപിൽ വെച്ച് ഷംനാദിന് ഹെൽമറ്റ് മാറി പോകുന്നത്. തന്റെ ഹെൽമറ്റിന്റെ അതേ നിറത്തിലും ബ്രാൻഡിലും ഉള്ള മറ്റൊരു ഹെൽമെറ്റ് തൊട്ടടുത്ത ബൈക്കിൽ ഇരിക്കുന്നത് കണ്ട് ആരെങ്കിലും എടുത്തു മാറ്റിവെച്ചത് ആകും എന്ന് കരുതി അതെടുത്ത് തലയിൽ വെച്ച് തിരികെ വരുകയായിരുന്നു ഷംനാദ്. എന്നാൽ പിന്നീടാണ് സ്വന്തം ഹെൽമറ്റ് സ്കൂട്ടറിന്റെ ഡിക്കിയിൽ ശ്രദ്ധയിൽപ്പെട്ടത്. ഇതോടെ താൻ എടുത്ത ഹെൽമെറ്റിന്റെ യഥാർത്ഥ ഉടമയെ കണ്ടെത്താനായി സമൂഹമാദ്ധ്യമങ്ങളിലൂടെ തിരച്ചിൽ നടത്തുകയാണ് ഈ യുവാവ്.
ഷംനാദിന്റെ ഫേസ്ബുക്ക് പോസ്റ്റിന്റെ പൂർണ്ണരൂപം വായിക്കാം,
ഇരട്ടകളായ ഹെൽമെറ്റുകൾ
അജ്ഞാതനായ സുഹൃത്തേ,
12.08.23 ശനിയാഴ്ച്ച വൈകുന്നേരം ഏകദേശം നാലു മണിയോടടുപ്പിച്ച് തിരുവനന്തപുരം കിംസിന് മുൻവശത്തെ ബൈക്ക് പാർക്കിംഗിൽ വച്ച് അറിയാതെ താങ്കളുടെ ഹെൽമെറ്റ് എൻ്റെ കൈയിൽ വന്ന് ചേർന്നിട്ടുണ്ട്. ആ ഹെൽമെറ്റ് എങ്ങനെ വന്ന് ചേർന്നു എന്നതിന് കാരണം ചിത്രത്തിലുണ്ട്. ഡിക്കിയിലുണ്ടായിരുന്ന ഹെൽമെറ്റ് മറന്ന് തൊട്ട് ചേർന്നിരുന്ന ബൈക്കിൽ തൂക്കിയിട്ടിരുന്ന ഹെൽമെറ്റ് എടുത്തതാണ് സംഭവം. എടുക്കുമ്പോൾ മനസിൽ കരുതിയത് താഴെ വീണ ഹെൽമെറ്റ് ആരോ അറിയാതെ വണ്ടി മാറ്റി വച്ചു എന്നതാണ്.
ഇന്നലെ രാത്രി പെട്രോൾ അടിക്കാൻ ഡിക്കി തുറന്നപ്പോൾ ആണ് ഞാൻ ചെയ്തത് എത്ര വലിയ അപരാധം ആയിരുന്നു എന്ന് മനസിലായത്.
AI ക്യാമറകളുടെ ഇക്കാലത്ത് താങ്കൾക്കുണ്ടായ എല്ലാ മാനസിക- സാമ്പത്തിക- നഷ്ടങ്ങൾക്കും ഞാൻ മാത്രമാണ് ഉത്തരവാദി.
ദയവ് ചെയ്ത് താങ്കൾ ഈ പോസ്റ്റ് കാണുന്നു എങ്കിൽ 8113948420 എന്ന നമ്പരിൽ വിളിക്കുക.ഞാൻ താങ്കളുടെ ഹെൽമെറ്റ് എത്തിച്ചു തരുന്നതായിരിക്കും.
ക്ഷമാപണത്തോടെ,
നോട്ട്: സുഹൃത്തുക്കൾ പരമാവധി ഷെയർ ചെയ്ത് സഹകരിക്കുക..












