തിരുവനന്തപുരം : മുഖ്യമന്ത്രിയുടെ മകളുടെ കമ്പനിക്കെതിരായ മാത്യു കുഴൽനാടന്റെ പരാമർശത്തെ കുറിച്ചുള്ള മാദ്ധ്യമങ്ങളുടെ ചോദ്യങ്ങൾക്ക് സ്വതസിദ്ധമായ ധാർഷ്ട്യത്തോടെ ആയിരുന്നു എംവി ഗോവിന്ദന്റെ മറുപടി. പിണറായി വിജയന്റെ മകൾ വീണ വിജയന്റെ കമ്പനിയായ എക്സാലോജിക്കിന്റെ വിശദാംശങ്ങൾ പുറത്തുവിടാൻ സിപിഎം സെക്രട്ടേറിയേറ്റ് തയ്യാറുണ്ടോ എന്നാണ് മാത്യു കുഴൽനാടൻ ചോദിച്ചിരുന്നത്. എന്നാൽ ഇതേക്കുറിച്ചുള്ള ചോദ്യങ്ങൾക്ക് “ഓൻ ആരെടാ വെല്ലുവിളിക്കാൻ” എന്നായിരുന്നു എംവി ഗോവിന്ദന്റെ പ്രതികരണം.
മാത്യു കുഴൽനാടൻ വരുമാനത്തിലും കവിഞ്ഞ സ്വത്താണ് അനധികൃതമായി സമ്പാദിച്ചിട്ടുള്ളത് എന്നാണ് സിപിഎമ്മിന്റെ ആരോപണം. എന്നാൽ വിയർപ്പിന്റെ വില അറിയാത്തതിനാലാണ് സിപിഎം തനിക്കെതിരെ ആരോപണം ഉന്നയിക്കുന്നത് എന്ന് മാത്യു കുഴൽനാടനും വ്യക്തമാക്കി. തന്റെ കമ്പനിയുടെ വരവ് ചെലവ് കണക്കുകൾ സിപിഎമ്മിന് ആരെക്കൊണ്ട് വേണമെങ്കിലും പരിശോധിപ്പിക്കാം എന്നും അദ്ദേഹം വെല്ലുവിളിച്ചിരുന്നു.
വരുമാനത്തിന്റെ 29 ഇരട്ടി സ്വത്താണ് മാത്യു കുഴൽനാടൻ സമ്പാദിച്ചിരിക്കുന്നത് എന്നാണ് സിപിഎം എറണാകുളം ജില്ലാ സെക്രട്ടറി സി എൻ മോഹനന്റെ ആരോപണം. മാത്യു കുഴൽനാടൻ ഇലക്ഷൻ കമ്മീഷന് നൽകിയ അഫിഡവിറ്റിൽ ഇത് വ്യക്തമാണെന്നും സി എൻ മോഹനൻ ആരോപിച്ചു.












