പത്തനാപുരം: കറുപ്പ് കണ്ടാൽ അറസ്റ്റ് ചെയ്യുന്ന മുഖ്യമന്ത്രിക്കും പോലീസിനും എട്ടിന്റെ പണി കൊടുത്ത് ബിജെപി പഞ്ചായത്ത് കൗൺസിലർ. പത്തനാപുരം തലവൂർ പഞ്ചായത്ത് രണ്ടാലുംമൂട് വാർഡ് കൗൺസിലർ സി രഞ്ജിത്ത് ആണ് ശരീരം മുഴുവൻ വെളളചായം പൂശി മുഖ്യമന്ത്രി പോകുന്ന വഴിയിൽ വേറിട്ട പ്രതിഷേധം നടത്തിയത്. കറുപ്പ് കണ്ടാൽ അറസ്റ്റ് ചെയ്യുമെന്ന് പേടിച്ചാണ് വെളള നിറം പൂശിയതെന്ന് ആയിരുന്നു രഞ്ജിത്തിന്റെ വാക്കുകൾ.
മൊബൈലിന്റെ കവറ് പോലും വെളളപൂശിയാണ് രഞ്ജിത് എത്തിയത്. വാർഡിൽ വൈദ്യുതി മുടങ്ങുന്നത് പതിവായതോടെ വൈദ്യുതി ബില്ല് ചില്ലറയായി കെഎസ്ഇബി ഓഫീസിലെത്തി അടച്ചും രഞ്ജിത്ത് നേരത്തെ പ്രതിഷേധിച്ചിരുന്നു. മുഖ്യമന്ത്രിക്ക് ഇരിക്കാൻ ടൈം സ്‌ക്വയറിൽ ഉപയോഗിച്ച പോലുളള ഇരുമ്പു കസേരയും വെളള പെയിന്റ് അടിച്ച് കൊണ്ടുവന്നിരുന്നു.
വഴിയരികിലെ കടയുടെ വാതിലിൽ ഇരുന്ന രഞ്ജിത്തിനോട് മാറാൻ പോലീസ് ആവശ്യപ്പെട്ടെങ്കിലും തയ്യാറായില്ല. എന്റെ വാർഡിലാണ് ഞാൻ ഇരിക്കുന്നതെന്ന് ആയിരുന്നു രഞ്ജിത്തിന്റെ മറുപടി. എന്റെ വാർഡിൽ എവിടെ ഇരിക്കണമെന്ന് ഞാൻ തീരുമാനിക്കും. മുഖ്യമന്ത്രി സഞ്ചരിക്കുന്ന വഴികളിലെ വാർഡ് ജനപ്രതിനിധികളെ മുഴുവൻ അറസ്റ്റ് ചെയ്യുകയാണോ വേണ്ടതെന്നും രഞ്ജിത് ചോദിച്ചു.
വാർഡ് കൗൺസിലർ ആണെങ്കിലും താനും ഒരു ജനപ്രതിനിധിയാണ്. ഇവിടെ എന്നും വൃത്തിയാക്കുന്നതും പോസ്റ്റിൽ ബൾബിടുന്നതും ഞാനാണ്. ഇവിടെ ഇരിക്കാൻ പാടില്ലെന്ന് പറഞ്ഞാൽ പിന്നെ നിങ്ങൾ വന്ന് ഇതൊക്കെ ചെയ്യുമോ എന്നായിരുന്നു രഞ്ജിത്തിന്റെ ചോദ്യം. പബ്ലിസിറ്റിക്ക് വേണ്ടി പ്രതിഷേധിക്കുന്നുവെന്ന പോലീസ് ആരോപണത്തെയും രഞ്ജിത് പൊളിച്ചു. അങ്ങനെയാണെങ്കിൽ സാറിന്റെ പബ്ലിസിറ്റിക്ക് വേണ്ടി എന്നെ അറസ്റ്റ് ചെയ്യാൻ വന്നതല്ലേ എന്നായിരുന്നു മറുചോദ്യം. മുഖ്യമന്ത്രിക്ക് മാത്രം മറ്റൊരു നിയമവും ശരിയല്ലെന്നും രഞ്ജിത് പറഞ്ഞു.
പ്രതിഷേധത്തിൽ നിന്ന് പിന്തിരിയാൻ വിസമ്മതിച്ച രഞ്ജിത്തിനെ പോലീസ് ബലം പ്രയോഗിച്ച് നീക്കുകയായിരുന്നു. പോലീസ് നടപടിയിലും നാട്ടുകാർ പ്രതിഷേധം പ്രകടിപ്പിച്ചു.
