വാഷിംഗ്ടണ്‍: അയോധ്യയിലെ ചരിത്രപരമായ രാമക്ഷേത്ര പ്രാണപ്രതിഷ്ഠ ആഘോഷമാക്കി മാറ്റാനൊരുങ്ങി അമേരിക്കയിലെ ഹിന്ദുക്കള്‍. ജനുവരി 22ന്‌ നടക്കുന്ന പ്രാണപ്രതിഷ്ഠാ ചടങ്ങുകള്‍ ന്യൂയോര്‍ക്ക് നഗരത്തിലെ ടൈംസ് സ്ക്വയറില്‍ പടുകൂറ്റന്‍ സ്ക്രീനില്‍ തത്സമയം സംപ്രേഷണം ചെയ്യും.
അമേരിക്കയിലെ പത്തിലധികം സ്റ്റേറ്റുകളില്‍ അയോധ്യ രാമക്ഷേത്രത്തിന്റെ ചിത്രങ്ങള്‍ അടങ്ങിയ പടുകൂറ്റന്‍ ബില്‍ബോര്‍ഡുകള്‍ സ്ഥാപിച്ച് കഴിഞ്ഞു. ടെക്സസ്, ഇല്ലിനോയിസ്, ന്യൂയോര്‍ക്ക്, ന്യൂജേഴ്സി, ജോര്‍ജിയ എന്നിവിടങ്ങളിലെല്ലാം പതിനഞ്ചാം തീയതി മുതല്‍ തന്നെ ആഘോഷങ്ങള്‍ക്ക് തുടക്കമാകും.
വിശ്വഹിന്ദു പരിഷത്തിന്റെ അമേരിക്കന്‍ ചാപ്റ്ററും യു എസ്സിലെ വിവിധ ഹൈന്ദവ സംഘടനകളും സംയുക്തമായാണ്‌ ആഘോഷങ്ങള്‍ക്ക് നേതൃത്വം വഹിക്കുന്നത്. അരിസോണയിലും മിസൗറിയിലും ഇന്ന് തന്നെ ആഘോഷങ്ങള്‍ ആരംഭിക്കുമെന്ന് വിവിധ സംഘടനകള്‍ അറിയിച്ചു.
ചരിത്രപരവും അസുലഭവുമായ ഈ ആഘോഷം ഏറ്റവും ഭക്തിപൂര്‍വം കൊണ്ടാടാന്‍ അമേരിക്കയിലെ ഹൈന്ദവ സമൂഹം തയ്യാറെടുത്ത് കഴിഞ്ഞതായി വി എച്ച് പി അറിയിച്ചു. രാമക്ഷേത്ര പ്രാണപ്രതിഷ്ഠയ്ക്കായി വ്രതമെടുത്ത് കാത്തിരിക്കുന്ന നിരവധി ഭക്തജനങ്ങള്‍ അമേരിക്കയില്‍ ഉണ്ടെന്നും വി എച്ച് പി അമേരിക്കന്‍ ചാപ്റ്റര്‍ വക്താവ് അമിതാഭ് അന്താരാഷ്ട്ര മാദ്ധ്യമത്തോട് വ്യക്തമാക്കി.
പ്രാണപ്രതിഷ്ഠാ ആഘോഷങ്ങളോട് അനുബന്ധിച്ച് അമേരിക്കയിലെ വിവിധ സ്റ്റേറ്റുകളില്‍ വമ്പന്‍ കാര്‍ റാലികള്‍ സംഘടിപ്പിക്കുമെന്ന് വി എച്ച് പി ജോയിന്റ് സെക്രട്ടറി തേജ എ ഷാ അറിയിച്ചു. ഇരുപത്തിയൊന്നാം തീയതി രാത്രി ന്യൂജേഴ്സിയിലും ന്യൂയോര്‍ക്കിലും അയോധ്യ രാമക്ഷേത്രത്തിന്റെ ചരിത്രം വിശദീകരിക്കുന്ന പ്രദര്‍ശനങ്ങള്‍ സംഘടിപ്പിക്കുമെന്നും അദ്ദേഹം അറിയിച്ചു.
