കോട്ടയം: ഉഴവൂരിൽ ഡിവൈഎഫ്‌ഐ പ്രവർത്തകരുടെ മർദ്ദനത്തിൽ എസ്‌ഐയുടെ ചെവിപൊട്ടി. കുറവിലങ്ങാട് സബ് ഇൻസ്‌പെക്ടർ കെ.വി സന്തോഷിന്റെ ചെവിയുടെ ഡയഫ്രമാണ് തകർന്നത്. മർദ്ദനത്തിൽ സാരമായി പരിക്കേറ്റ അദ്ദേഹം ആശുപത്രിയിൽ ചികിത്സയിലാണ്.
കഴിഞ്ഞ ദിവസം വൈകീട്ടോടെയായിരുന്നു സംഭവം. ഓട്ടോറിക്ഷ തൊഴിലാളികളും വിദ്യാർത്ഥികളും തമ്മിൽ പ്രദേശത്ത് സംഘർഷം ഉണ്ടായിരുന്നു. ഇത് പരിഹരിക്കാൻ എത്തിയതായിരുന്നു സന്തോഷ്. ഇതിനിടെ ഓട്ടോ തൊഴിലാളികളെ അറസ്റ്റ് ചെയ്യണമെന്ന ആവശ്യവുമായി ഡിവൈഎഫ്‌ഐ പ്രവർത്തകർ സംഘടിച്ചെത്തി. തുടർന്ന് സന്തോഷിനെ മർദ്ദിക്കുകയായിരുന്നു.
ഡിവൈഎഫ്‌ഐ പ്രവർത്തകർ അസഭ്യം വിളിച്ച് സന്തോഷിന്റെ മുഖത്ത് അടിച്ചു. ഇതിനിടെയാണ് ഡയഫ്രം പൊട്ടിയത്. ഇടത് ചെവിയ്ക്കാണ് ആക്രമണത്തിൽ പരിക്കേറ്റത്. അടിയേറ്റ് നിലത്ത് വീണ സന്തോഷിനെ പിന്നീട് പോലീസുകാർ എത്തി ആശുപത്രിയിലേക്ക് കൊണ്ടുപോകുകയായിരുന്നു. എസ്‌ഐയെ അടിച്ച സംഭവത്തിൽ മൂന്ന് പേരെ അറസ്റ്റ് ചെയ്തിട്ടുണ്ട്.
അതേസമയം പ്രതികളെ സംരക്ഷിക്കാനാണ് ഡിവൈഎഫ്‌ഐ ശ്രമിക്കുന്നത്. ഇത് പോലീസിനെ സമ്മർദ്ദത്തിലാക്കിയിട്ടുണ്ട്.
