മുംബൈ: ഇന്ത്യൻ ക്രിക്കറ്റ് ടീമിൽ ഏറെ ആരാധകരുള്ള താരമാണ് വിരാട് കോഹ്ലി. നിരവധി റെക്കോർഡുകൾ കരിയറിൽ ഇതിനോടകം സ്വന്തമാക്കിയ താരത്തെ ആരാധകർ കിംഗ് കോഹ്ലി എന്നാണ് സ്‌നേഹത്തോടെ വിശേഷിപ്പിക്കാറുള്ളത്. എന്നാൽ തന്നെ കിംഗ് എന്ന് വിളിക്കരുതെന്ന് അഭ്യർത്ഥിച്ചിരിക്കുകയാണ് താരം. ചൊവ്വാഴ്ച ചിന്നസ്വാമി സ്റ്റേഡിയത്തിൽ നടന്ന ആർസിബി അൺബോക്സ് പരിപാടിയിലായിരുന്നു കോഹ്ലിയുടെ പ്രതികരണം. ‘കിംഗിന്’ എന്ത് തോന്നുന്നുവെന്ന അവതാരകനായ ഡാനിഷ് സെയ്തിന്റെ ചോദ്യത്തിനായിരുന്നു കോഹ്ലിയുടെ മറുപടി.
കിങ് കോഹ്ലി എന്ന വിളി കേൾക്കുമ്പോൾ തനിക്ക് നാണക്കേട് തോന്നാറുണ്ടെന്നാണ് താരം പറയുന്നത്. ബംഗളൂരു നായകൻ ഫാഫ് ഡുപ്ലെസിസിയുമായുള്ള സംഭാഷണത്തിലും താരം ഇക്കാര്യം തുറന്നുപറുന്നുണ്ട്. വീണ്ടും മടങ്ങിവരുന്നത് മനോഹരമാണ്’ എന്ന് മറുപടി പറഞ്ഞ് തുടങ്ങിയ കോഹ്ലിയുടെ സംസാരം ആരാധകരുടെ ആരവത്തിൽ മുങ്ങിപ്പോയി. ആരവം അടങ്ങിയപ്പോഴാണ് ആരാധകരെ ആകാംക്ഷയിലാക്കി കോഹ്ലി വീണ്ടും സംസാരം തുടങ്ങിയത്. ‘സുഹൃത്തുക്കളേ, ഞാൻ സംസാരിക്കട്ടെ. നമുക്ക് ഇന്ന് രാത്രി ചെന്നൈയിലെത്തണം. ഞങ്ങൾക്ക് ഒരു ചാർട്ടേഡ് ഫ്ളൈറ്റ് ഉണ്ട്, ഞങ്ങൾക്ക് സമയമില്ല (ചിരിക്കുന്നു),
‘ഒന്നാമതായി എന്നെ കിങ് എന്നു വിളിക്കുന്നത് നിർത്തണം. ദയവായി കോഹ്ലി എന്നു വിളിക്കു. ആ വാക്ക് (കിങ്) വിളിക്കുന്നത് നിർത്തണം. ഓരോ തവണയും നിങ്ങൾ എന്നെ ആ വാക്ക് വിളിക്കുമ്പോൾ എനിക്ക് ലജ്ജ തോന്നാറുണ്ടെന്ന് ഫാഫ് ഡുപ്ലെസിസിനോട് പറയുകയായിരുന്നു. അതുകൊണ്ട് എന്നെ വിരാട് എന്ന് വിളിച്ചാൽ മതി, ഇനി മുതൽ ആ വാക്ക് ഉപയോഗിക്കരുത്, ഇത് എനിക്ക് വളരെ നാണക്കേടാണ്’ -കോഹ്ലി പറഞ്ഞു.
താരത്തിന്റെ ഈ അഭ്യർത്ഥനയിൽ നിരാശ പങ്കു വച്ചിരിക്കുകയാണ് ആരാധകർ. തങ്ങൾ ഇനിയും പ്രിയതാരത്തെ കിംഗ് എന്ന് വിളിക്കുമെന്ന് തുടരുമെന്നും ആരാധകരനെന്ന നിലയിൽ അത് തങ്ങളുടെ അവകാശമാണെന്നുമാണ് അവർ പറയുന്നു.
