മലപ്പുറം: തൃണമൂൽ കോൺഗ്രസിൽ ചേർന്ന പി വി അൻവർ എംഎൽഎ ഇന്ന് ബംഗാൾ മുഖ്യമന്ത്രി മമതാ ബാനർജിയുമായി വാർത്താസമ്മേളനം നടത്തും. ഇന്നലെയാണ് അൻവറിന്റെ പാർട്ടി ജനറൽ സെക്രട്ടറി അഭിഷേക് ബാനർജി അംഗത്വം സ്വീകരിച്ചത്. അടുത്ത മാസം ആദ്യത്തോടെ മമതാ ബാനർജിയെ കേരളത്തിൽ എത്തിച്ച് റാലി നടത്താനാണ് അൻവറിന്റെ നീക്കം.
നിലവിൽ ടിഎംസിയുടെ സംസ്ഥാന കോർഡിനേറ്റർ പദവിയാകും അൻവർ വഹിക്കുക. ഒപ്പം കേരളത്തിലെ പാർട്ടിയുടെ ചുമതലകൾ ഏകോപ്പിക്കാൻ എംപിമാരായ സുസ്മിത ദേവ്, മഹുവ മൊയ്ത്ര എന്നിവർക്ക് മമതാ ബാനർജി ചുമതല നൽകിയെന്നാണ് വിവരം.
കൊൽക്കത്തയിൽ അഭിഷേക് ബാനർജിയുടെ ഓഫീസിൽ വച്ചാണ് അൻവർ പാർട്ടിയിൽ ചേർന്നത്. രാജ്യത്തിന്റെ പുരോഗതിക്കായി അൻവറുമായി ചേർന്ന് പ്രവർത്തിക്കുമെന്ന് തൃണമൂൽ കോൺഗ്രസ് വ്യക്തമാക്കി .
കേരളത്തിലെ മുഖ്യമന്ത്രി പിണറായി വിജയനോടു യുദ്ധം പ്രഖ്യാപിച്ച അൻവർ യുഡിഎഫിലേക്ക് പോകുമെന്നായിരുന്നു ആദ്യം പ്രചരിച്ചിരുന്ന വാർത്തകൾ. യുഡിഎഫിലേക്കു പോകുന്നെന്ന തരത്തിൽ ചർച്ചകളും കൂടിക്കാഴ്ചകളും നടന്നിരുന്നു. ഇതിനിടിയിലാണ് അപ്രതീക്ഷിതമായി ബംഗാൾ മുഖ്യമന്ത്രി മമത ബാനാർജി നയിക്കുന്ന തൃണമൂലിന്റെ ഭാഗമായത്.
