സാമ്പത്തിക രംഗത്ത് ഭാരതം ലോകത്തിന് മാതൃകയാകുന്നു എന്നതിന്റെ വ്യക്തമായ സൂചന നൽകി കേന്ദ്ര ബജറ്റ് 2026-ലെ നികുതി വരുമാന കണക്കുകൾ പുറത്ത്. 2026-27 സാമ്പത്തിക വർഷത്തിൽ രാജ്യത്തിന്റെ അറ്റ നികുതി വരുമാനം (Net Tax Receipts) 28.7 ലക്ഷം കോടി രൂപയായിരിക്കുമെന്ന് ധനമന്ത്രി നിർമല സീതാരാമൻ പ്രഖ്യാപിച്ചു. രാജ്യത്തെ സാധാരണക്കാരുടെ നികുതിപ്പണം കൃത്യമായി വികസന പ്രവർത്തനങ്ങൾക്ക് വിനിയോഗിക്കുന്നു എന്ന ഉറച്ച ബോധ്യം ജനങ്ങൾക്കുണ്ടായതാണ് ഈ വലിയ നേട്ടത്തിന് പിന്നിലെന്ന് ധനമന്ത്രി ചൂണ്ടിക്കാട്ടി.
മുൻ സർക്കാരുകളുടെ കാലത്തെ അഴിമതിയും നികുതി വെട്ടിപ്പും അവസാനിപ്പിച്ച് ഡിജിറ്റലൈസേഷനിലൂടെയും സുതാര്യമായ ഭരണത്തിലൂടെയും നികുതി ഘടന പരിഷ്കരിച്ചതാണ് ഈ വരുമാന വർദ്ധനവിന് ആധാരമായത്. ജി.എസ്.ടി പിരിവിൽ ഓരോ മാസവും ഉണ്ടായ റെക്കോർഡ് വർദ്ധനയും പ്രത്യക്ഷ നികുതി നൽകുന്നവരുടെ എണ്ണത്തിലെ വൻ വർദ്ധനയും ഭാരതത്തിന്റെ സാമ്പത്തിക അച്ചടക്കത്തിന് തെളിവാണ്. 28.7 ലക്ഷം കോടി രൂപയുടെ ഈ നികുതി വരുമാനം വികസിത് ഭാരതം എന്ന ലക്ഷ്യത്തിലേക്കുള്ള ഇൻഫ്രാസ്ട്രക്ചർ പദ്ധതികൾക്കും പ്രതിരോധ നവീകരണത്തിനും വലിയ ഊർജ്ജമാകും.
