വാംഖഡെ സ്റ്റേഡിയത്തിൽ നടന്ന മുംബൈ ഇന്ത്യൻസ് – റോയൽ ചലഞ്ചേഴ്സ് ബെംഗളൂരു പോരാട്ടം ആരാധകർക്ക് സമ്മാനിച്ചത് ആവേശവും അതിലേറെ വൈകാരികവുമായ നിമിഷങ്ങൾ. മത്സരഫലത്തിനപ്പുറം ഇന്ത്യൻ ക്രിക്കറ്റിലെ രണ്ട് ഇതിഹാസങ്ങളായ വിരാട് കോഹ്‌ലിയുടെയും രോഹിത് ശർമ്മയുടെയും ഹൃദ്യമായ കൂടിക്കാഴ്ചയാണ് ഇപ്പോൾ സോഷ്യൽ മീഡിയയിൽ വൈറലാകുന്നത്.
ബാറ്റ് ചെയ്യാൻ ക്രീസിലേക്ക് നടന്നടുക്കുകയായിരുന്ന വിരാട് കോഹ്‌ലിയെ ഫീൽഡിൽ നിന്നിരുന്ന രോഹിത് ശർമ്മ അടുത്തേക്ക് വിളിക്കുകയും ഇരുവരും സംസാരിക്കുകയും ചെയ്തു. ഇരുവരുടെയും പരസ്പര ബഹുമാനവും സൗഹൃദവും വിളിച്ചോതുന്ന ഈ വീഡിയോ ആരാധകർ ആവേശത്തോടെയാണ് ഏറ്റെടുത്തത്. ഇന്ത്യൻ ക്രിക്കറ്റിലെ ഒരു സുവർണ്ണ കാലഘട്ടത്തെ ഓർമ്മിപ്പിക്കുന്നതായിരുന്നു ആ ഹ്രസ്വമായ കൂടിക്കാഴ്ച.
കളിക്കളത്തിൽ രണ്ട് പേരും തങ്ങളുടെ സാന്നിധ്യമറിയിച്ചു. കോഹ്‌ലി 38 പന്തിൽ 50 റൺസെടുത്തപ്പോൾ, രോഹിത് 13 പന്തിൽ 19 റൺസുമായി മികച്ച ഫോമിൽ കളിച്ചുവരികയായിരുന്നു. എന്നാൽ ഹാംസ്ട്രിങ് (Hamstring) പരിക്ക് മൂലം രോഹിത്തിന് റിട്ടയേർഡ് ഹർട്ട് ആയി മടങ്ങേണ്ടി വന്നു. മറുപടി ബാറ്റിംഗിനിടെ കണങ്കാലിന് (Ankle) പരിക്കേറ്റതിനെ തുടർന്ന് കോഹ്‌ലിയും ഫീൽഡ് ചെയ്യാൻ ഇറങ്ങിയില്ല. ഇത് വരും മത്സരങ്ങളിൽ ഇരു ടീമുകൾക്കും വലിയ തലവേദന സൃഷ്ടിച്ചേക്കാം.
ഫിൽ സാൾട്ടിന്റെ (36 പന്തിൽ 78) വെടിക്കെട്ടാണ് ആർസിബിക്ക് കൂറ്റൻ സ്കോർ സമ്മാനിച്ചത്. സാൾട്ട്-കോഹ്‌ലി സഖ്യം 120 റൺസിന്റെ ഓപ്പണിംഗ് കൂട്ടുകെട്ട് പടുത്തുയർത്തി. പിന്നീട് വന്ന ക്യാപ്റ്റൻ രജത് പാട്ടിദാർ 20 പന്തിൽ 53 റൺസും ടിം ഡേവിഡ് പുറത്താകാതെ 34 റൺസും അടിച്ചുകൂട്ടിയതോടെ ആർസിബി 240/4 എന്ന പടുകൂറ്റൻ സ്കോറിലെത്തി. “വിരാടും സാൾട്ടും നൽകിയ മികച്ച തുടക്കമാണ് ഞങ്ങൾക്ക് കരുത്തായത്, ഇതൊരു പക്കാ ടീം വർക്കാണ്,” പാട്ടിദാർ മത്സരശേഷം പറഞ്ഞു.
Virat Kohli was walking with his head down, but Rohit Sharma called out to him, and Virat immediately ran towards Rohit.❤️🫂
Brothers at Wankhade🔥 pic.twitter.com/2mtQuYRBDq
— 𝐑𝐮𝐬𝐡𝐢𝐢𝐢⁴⁵ (@rushiii_12) April 12, 2026
