ഐ.പി.എൽ 2026-ൽ ക്രിക്കറ്റ് ലോകത്തെ വിസ്മയിപ്പിച്ചുകൊണ്ട് ഒരു പതിനഞ്ചുകാരൻ ചരിത്രം കുറിക്കുന്നു. രാജസ്ഥാൻ റോയൽസിന്റെ ബാറ്റിംഗ് സെൻസേഷൻ വൈഭവ് സൂര്യവംശിയാണ് റെക്കോർഡുകൾ ഓരോന്നായി തകർത്തെറിഞ്ഞ് മുന്നേറുന്നത്. ശനിയാഴ്ച ഗുജറാത്ത് ടൈറ്റൻസിനെതിരെ നടന്ന മത്സരത്തിൽ മൂന്ന് സിക്സറുകൾ പറത്തിയതോടെ ഒരു സീസണിൽ ഏറ്റവും കൂടുതൽ സിക്സറുകൾ നേടുന്ന ഇന്ത്യൻ താരം എന്ന അഭിമാന റെക്കോർഡിന് തൊട്ടടുത്തെത്തിയിരിക്കുകയാണ് ഈ കൗമാര താരം.
അഭിഷേക് ശർമ്മ 2024-ൽ സ്ഥാപിച്ച 42 സിക്സറുകൾ എന്ന റെക്കോർഡിന് വെറും രണ്ട് സിക്സറുകൾ മാത്രം അകലെയാണ് വൈഭവ് (നിലവിൽ 40 സിക്സറുകൾ). ഈ കുതിപ്പിനിടെ വിരാട് കോലി (38), സൂര്യകുമാർ യാദവ് (38), ഋഷഭ് പന്ത് (37) തുടങ്ങിയ വമ്പൻമാരുടെ റെക്കോർഡുകൾ വൈഭവ് മറികടന്നു കഴിഞ്ഞു. വെറും 11 മത്സരങ്ങളിൽ നിന്നാണ് വൈഭവ് ഈ നേട്ടം സ്വന്തമാക്കിയത്.
ഗുജറാത്തിനെതിരായ മത്സരത്തിൽ മുഹമ്മദ് സിറാജിന്റെ ആദ്യ പന്തിൽ തന്നെ സിക്സർ പറത്തിയതോടെ ടി20 ക്രിക്കറ്റിൽ ഏറ്റവും വേഗത്തിൽ 100 സിക്സറുകൾ പൂർത്തിയാക്കുന്ന താരം എന്ന ലോക റെക്കോർഡ് വൈഭവ് സ്വന്തമാക്കി. വെറും 514 പന്തുകളിൽ നിന്നാണ് താരം ഈ ‘സെഞ്ച്വറി’ തികച്ചത്. ഇതോടൊപ്പം ഒരു ഐ.പി.എൽ സീസണിൽ പവർപ്ലേയിൽ ഏറ്റവും കൂടുതൽ സിക്സറുകൾ നേടുന്ന താരം എന്ന റെക്കോർഡും ഇനി വൈഭവിന് സ്വന്തം. ശനിയാഴ്ചത്തെ മത്സരത്തിൽ 16 പന്തിൽ 36 റൺസെടുത്ത താരത്തിന്റെ ഇന്നിംഗ്സിൽ മൂന്ന് ഫോറും മൂന്ന് സിക്സറുകളും ഉൾപ്പെട്ടിരുന്നു.
ഈ സീസണിലെ ഏറ്റവും മികച്ച അഞ്ച് റൺവേട്ടക്കാരിൽ ഒരാളാണ് വൈഭവ്. 11 മത്സരങ്ങളിൽ നിന്ന് 440 റൺസാണ് താരം ഇതുവരെ അടിച്ചുകൂട്ടിയത്. 236-ന് മുകളിൽ സ്ട്രൈക്ക് റേറ്റും 140 എന്ന അവിശ്വസനീയമായ ശരാശരിയും വൈഭവിന്റെ ബാറ്റിംഗ് കരുത്ത് തെളിയിക്കുന്നു. ഒരു സെഞ്ച്വറിയും രണ്ട് അർദ്ധ സെഞ്ച്വറികളും ഈ സീസണിൽ രാജസ്ഥാൻ ഓപ്പണർ ഇതിനോടകം നേടിയിട്ടുണ്ട്.
