കൊച്ചി: കൊച്ചിയിൽ സിനിമാ നടനും നടിയും ചേർന്ന് ഡോക്ടറെ മർദ്ദിക്കുകയും പണം തട്ടിയെടുക്കുകയും ചെയ്തെന്ന കേസിൽ വൻ വഴിത്തിരിവ്. മർദനത്തിനും ഭീഷണിക്കും ഇരയായതായി പരാതി നൽകിയ ഡോ. ജോൺസൺ കെ. വർഗീസിനെതിരെ ഗുരുതരമായ ബലാത്സംഗ പരാതിയുമായി നടിയുടെ ബന്ധു രംഗത്തെത്തി. മദ്യം നൽകി അവശയാക്കിയ ശേഷം ലൈംഗികമായി പീഡിപ്പിച്ചു എന്ന യുവതിയുടെ പരാതിയുടെ അടിസ്ഥാനത്തിൽ ഇൻഫോപാർക്ക് പൊലീസ് ഡോക്ടർക്കെതിരെ കേസെടുത്തു.
നഗരത്തിലെ പ്രമുഖ സ്വകാര്യ ആശുപത്രിയിലെ ഹൃദ്രോഗ വിദഗ്ദ്ധനായ ഡോ. ജോൺസൺ കെ. വർഗീസിനെതിരെയാണ് ബലാത്സംഗ കേസ് രജിസ്റ്റർ ചെയ്തിരിക്കുന്നത്. യുവതി നൽകിയ പരാതിക്ക് പിന്നാലെ ഡോക്ടറെ ജോലി ചെയ്തിരുന്ന സ്വകാര്യ ആശുപത്രി മാനേജ്‌മെന്റ് ചുമതലകളിൽ നിന്ന് പുറത്താക്കി. കഴിഞ്ഞ ദിവസമാണ് കേസിനാസ്പദമായ ആദ്യ സംഭവം നടക്കുന്നത്. ഡോക്ടറെ ഹണിട്രാപ്പിൽ കുടുക്കി മർദ്ദിക്കുകയും ലക്ഷക്കണക്കിന് രൂപ തട്ടിയെടുക്കുകയും ചെയ്തെന്ന പരാതിയിൽ നടിയും നടനും ഉൾപ്പെടെയുള്ള സംഘത്തിനെതിരെ പൊലീസ് കേസെടുത്തിരുന്നു.
എന്നാൽ, ഇതിന് പിന്നാലെയാണ് കേസിലെ പരാതിക്കാരനായ ഡോക്ടർക്കെതിരെ തന്നെ അതിതീവ്രമായ ലൈംഗികപീഡന ആരോപണവുമായി നടിയുടെ അടുത്ത ബന്ധു രംഗത്തെത്തുന്നത്. മദ്യം നൽകി ബോധരഹിതയാക്കിയ ശേഷമാണ് പീഡനം നടന്നതെന്നാണ് പൊലീസ് എഫ്.ഐ.ആറിൽ വ്യക്തമാക്കുന്നത്. കേസിൽ പരസ്പര വിരുദ്ധമായ ആരോപണങ്ങൾ ഉയർന്നതോടെ ഉന്നത പൊലീസ് സംഘം അന്വേഷണം ഊർജ്ജിതമാക്കി. ഡോക്ടറെയും പരാതിക്കാരിയായ യുവതിയെയും വരും ദിവസങ്ങളിൽ വിശദമായി ചോദ്യം ചെയ്യും.
