മലയാളി പ്രേക്ഷകരുടെ പ്രിയതാരം ഷെയ്ൻ നിഗം പ്രധാന വേഷത്തിലെത്തിയ ‘ദൃഢം’ എന്ന സിനിമയ്‌ക്കെതിരെ ഗുരുതരമായ കഥാചോരണ ആരോപണവുമായി മുൻ ഡിജിപിയും സൈക്കോളജിക്കൽ കൗൺസലറുമായ ആർ. ശ്രീലേഖ. താൻ വർഷങ്ങൾക്ക് മുൻപ് എഴുതി, മാതൃഭൂമി ആഴ്ചപ്പതിപ്പിൽ പ്രസിദ്ധീകരിച്ച ‘കരിങ്കുടി പോലീസ് സ്റ്റേഷൻ’ എന്ന ചെറുകഥ മോഷ്ടിച്ചാണ് ‘ദൃഢം’ എന്ന സിനിമയുടെ മൂലകഥ തയ്യാറാക്കിയിരിക്കുന്നതെന്നാണ് ശ്രീലേഖയുടെ പ്രധാന ആരോപണം. സോഷ്യൽ മീഡിയയിലൂടെ പങ്കുവെച്ച ദീർഘമായ ഫേസ്ബുക്ക് കുറിപ്പിലാണ് മുൻ ഡിജിപി മലയാള സിനിമയിലെ മുൻനിര സംവിധായകർക്കും അണിയറപ്രവർത്തകർക്കുമെതിരെ കടുത്ത ഭാഷയിൽ രംഗത്തെത്തിയത്.
പോലീസ് പശ്ചാത്തലത്തിലുള്ള കഥയായതുകൊണ്ടും യാദൃശ്ചികമായി കാണാൻ അവസരം ലഭിച്ചതുകൊണ്ടുമാണ് താൻ സിനിമ കണ്ടതെന്നും, എന്നാൽ സിനിമയുടെ കഥാഗതി തന്റെ ചെറുകഥയുടെ പൂർണ്ണമായ പകർപ്പാണെന്ന് കണ്ട് താൻ ഞെട്ടിപ്പോയെന്നും ശ്രീലേഖ കുറിച്ചു. തന്റെ സർവ്വീസ് കാലത്തെ അനുഭവങ്ങളും ഭാവനയും ചേർത്തുവെച്ച് എഴുതിയ കഥ ഇത്തരത്തിൽ അനുവാദമില്ലാതെ സിനിമയാക്കിയതിലുള്ള കടുത്ത അമർഷം അവർ പങ്കുവെച്ചു.
അതേസമയം, സിനിമകൾക്കെതിരെയുള്ള ശ്രീലേഖയുടെ വെളിപ്പെടുത്തൽ ഇവിടെക്കൊണ്ടും അവസാനിക്കുന്നില്ല. മുൻപ് ഏറെ ജനപ്രീതിയും നിരവധി സംസ്ഥാന അവാർഡുകളും കരസ്ഥമാക്കിയ, ഷെയ്ൻ നിഗം തന്നെ നായകനായ ‘ഭൂതകാലം’ എന്ന ചിത്രത്തിനെതിരെയും അവർ സമാനമായ ആരോപണം ഉന്നയിച്ചിട്ടുണ്ട്. മൂന്ന് വർഷങ്ങൾക്ക് മുൻപ് തന്റെ ഔദ്യോഗിക യൂട്യൂബ് ചാനലിലൂടെ താൻ പങ്കുവെച്ച ഒരു യഥാർത്ഥ അനുഭവ കഥയുടെ പച്ചയായ മോഷണമാണ് ‘ഭൂതകാലം’ എന്ന സിനിമയെന്നാണ് ശ്രീലേഖ വ്യക്തമാക്കുന്നത്. സിനിമയുടെ പ്രമേയത്തിൽ മാത്രമല്ല, അതിന്റെ തലക്കെട്ടിൽ വരെ വലിയ സാമ്യമുണ്ടെന്ന് അവർ ചൂണ്ടിക്കാണിക്കുന്നു. ‘ഭൂത ഭവനം’ എന്ന പേരിട്ടായിരുന്നു അന്ന് താൻ ആ അനുഭവക്കുറിപ്പ് പ്രേക്ഷകർക്കായി പങ്കുവെച്ചിരുന്നത്. വിചിത്രമായ കാര്യമെന്തെന്നാൽ, ഈ രണ്ട് സിനിമകൾക്കും തമ്മിൽ മറ്റൊരു അവിശ്വസനീയമായ കണക്ഷൻ കൂടിയുണ്ടെന്നും, രണ്ടിലും നായകനായി എത്തിയത് യുവനടൻ ഷെയ്ൻ നിഗം ആണെന്നതുമാണ്. കഥ മോഷ്ടിച്ചവർക്കെതിരെ കടുത്ത അതൃപ്തി രേഖപ്പെടുത്തുമ്പോഴും നായകൻ ഷെയ്ൻ നിഗത്തിനോട് തനിക്കുള്ള പ്രത്യേക വാത്സല്യവും മുൻ ഡിജിപി കുറിപ്പിൽ വ്യക്തമാക്കുന്നുണ്ട്.
സിനിമകളുടെ അണിയറപ്രവർത്തകർക്കെതിരെയാണ് ആരോപണമെങ്കിലും നടൻ ഷെയ്നെ തനിക്ക് ‘പറവ’ എന്ന സിനിമ കണ്ട കാലം മുതൽക്കേ ഏറെ ഇഷ്ടമാണെന്ന് ശ്രീലേഖ പറയുന്നു. അതിനൊരു വൈകാരികമായ കാരണം കൂടിയുണ്ടെന്ന് അവർ വെളിപ്പെടുത്തി. താൻ സർവ്വീസിലിരുന്ന കാലത്ത് തന്നോടൊപ്പം ജോലി ചെയ്തിരുന്നതും ഒരു കുഞ്ഞു സഹോദരനെപ്പോലെ സ്നേഹിച്ചിരുന്നതുമായ മുഹമ്മദ് എന്ന പോലീസുദ്യോഗസ്ഥന്റെ അതേ രൂപസാദൃശ്യമാണ് ഷെയ്ൻ നിഗത്തിനുള്ളത്. പ്രത്യേകിച്ച് ‘ദൃഢം’ എന്ന പുതിയ സിനിമയിൽ പോലീസ് വേഷത്തിൽ ഷെയ്നെ കണ്ടപ്പോൾ തന്റെ പഴയ സഹപ്രവർത്തകനെയാണ് ഓർമ്മ വന്നത്. തനിക്ക് വീട്ടിലെ കോശ്ശേരി മാവിന്റെ തൈയ്യും, ഇടയ്ക്കിടെ തികച്ചും ശുദ്ധമായ തേനും നെയ്യുമൊക്കെ സ്നേഹത്തോടെ സമ്മാനമായി കൊണ്ടുവന്നു തന്നിരുന്ന ആ പഴയ പോലീസുകാരൻ മുഹമ്മദിന്റെ മുഖമാണ് ഷെയ്നിലുള്ളതെന്നും ശ്രീലേഖ സ്നേഹത്തോടെ ഓർത്തെടുത്തു.
