സൗരയൂഥത്തിലെ പ്രധാന ഊർജ്ജസ്രോതസ്സായ സൂര്യനെ ഭൂമിയിൽ പുനഃസൃഷ്ടിക്കാനുള്ള ‘കൃത്രിമ സൂര്യൻ’ (Artificial Sun) പദ്ധതിയിൽ നിർണായക കുതിച്ചുചാട്ടവുമായി ചൈന. അണമുറിയാത്തതും പൂർണ്ണമായും പരിസ്ഥിതി സൗഹൃദവുമായ ഊർജ്ജ ഉൽപ്പാദനം ലക്ഷ്യമിട്ടുള്ള അണുസംയോജന (Nuclear Fusion) പദ്ധതിക്കായി ലോകത്തിലെ ഏറ്റവും വലിയ സൂപ്പർകണ്ടക്റ്റിംഗ് ഫ്യൂഷൻ മാഗ്നറ്റ് (Superconducting Fusion Magnet) ചൈന വിജയകരമായി നിർമ്മിച്ച് പരീക്ഷിച്ചു. 2030-ഓടെ ഫ്യൂഷൻ ഊർജ്ജത്തിൽ നിന്ന് വൻതോതിൽ വൈദ്യുതി ഉത്പാദിപ്പിക്കാനുള്ള രാജ്യത്തിന്റെ സ്വപ്നപദ്ധതിക്ക് വലിയ കരുത്തുപകരുന്നതാണ് ഈ പുതിയ നേട്ടം.
ചൈനീസ് അക്കാദമി ഓഫ് സയൻസസിന് കീഴിലുള്ള പ്രശസ്തമായ ഇൻസ്റ്റിറ്റ്യൂട്ട് ഓഫ് പ്ലാസ്മ ഫിസിക്‌സിലെ ശാസ്ത്രജ്ഞരാണ് സാങ്കേതികമായി ഏറെ സങ്കീർണ്ണമായ ഈ ഭീമൻ കാന്തം വികസിപ്പിച്ചെടുത്തത്. ‘D’ ആകൃതിയിൽ രൂപകൽപ്പന ചെയ്തിരിക്കുന്ന ഈ ടോറോയ്ഡൽ ഫീൽഡ് മാഗ്നറ്റിന് 21 മീറ്റർ നീളവും 12 മീറ്റർ വീതിയുമുണ്ട്. 582 ടൺ ഭാരമുള്ള ഈ കൂറ്റൻ കാന്തം ഫ്യൂഷൻ റിയാക്ടറിനുള്ളിലെ ഉയർന്ന മർദ്ദത്തെയും പ്ലാസ്മയെയും സുരക്ഷിതമായി നിയന്ത്രിച്ചു നിർത്താൻ ശേഷിയുള്ളതാണ്.
10 കോടി ഡിഗ്രി സെൽഷ്യസിലധികം (100 million°C) ഉയർന്ന താപനിലയിൽ ഹൈഡ്രജൻ ആറ്റങ്ങളെ തമ്മിൽ കൂട്ടിയോജിപ്പിച്ചാണ് റിയാക്ടറിനുള്ളിൽ അളവറ്റ ഊർജ്ജം ഉത്പാദിപ്പിക്കുന്നത്. അന്തരീക്ഷത്തിലേക്ക് കാർബൺ ഡൈ ഓക്‌സൈഡ് പുറന്തള്ളാതെ, പരിസ്ഥിതി മലിനീകരണമില്ലാത്ത ശുദ്ധമായ ഊർജ്ജം നിർമ്മിക്കാൻ ഈ സാങ്കേതികവിദ്യയിലൂടെ സാധിക്കും.
