ഡൽഹിയിലെ ചരിത്രപ്രസിദ്ധമായ ചെങ്കോട്ടയ്ക്ക് സമീപം 11 പേരുടെ മരണത്തിനിടയാക്കിയ കാർ ബോംബ് സ്ഫോടനത്തിന് പിന്നിൽ അൽ-ഖ്വയ്ദയുടെ ഇന്ത്യൻ ഉപഭൂഖണ്ഡ വിഭാഗമായ ‘എ.ക്യു.ഐ.എസ്’ (AQIS) ആണെന്ന് ഐക്യരാഷ്ട്രസഭാ സുരക്ഷാ കൗൺസിലിന്റെ (UNSC) ഔദ്യോഗിക റിപ്പോർട്ട്. ഐസിസി, അൽ-ഖ്വയ്ദ ഭീകരസംഘടനകൾക്ക് മേലുള്ള ഉപരോധങ്ങൾ നിരീക്ഷിക്കുന്ന കൗൺസിലിന്റെ വിദഗ്ദ്ധ സമിതി തയാറാക്കി പുറത്തുവിട്ട പുതിയ റിപ്പോർട്ടിലാണ് ക്രൂരമായ ഈ ഭീകരാക്രമണത്തിന്റെ ഉത്തരവാദിത്തം ഔദ്യോഗികമായി അൽ-ഖ്വയ്ദ ശാഖയ്ക്കമേൽ ചുമത്തിയത്. ഇന്ത്യയിൽ മാത്രമല്ല, ബംഗ്ലാദേശിലും സമാനമായ രീതിയിൽ ഭീകര ശൃംഖലകളും രഹസ്യ സെല്ലുകളും വ്യാപിപ്പിക്കാൻ എ.ക്യു.ഐ.എസ് ശ്രമിച്ചുവരികയാണെന്ന ഗുരുതരമായ മുന്നറിയിപ്പും യു.എൻ റിപ്പോർട്ടിലുണ്ട്.
നേരത്തെ, സ്ഫോടനവുമായി ബന്ധപ്പെട്ട് ദേശീയ അന്വേഷണ ഏജൻസി (എൻ.ഐ.എ) ഡൽഹിയിലെ പ്രത്യേക കോടതിയിൽ സമർപ്പിച്ച 7,500 പേജുള്ള കുറ്റപത്രത്തിൽ അൽ-ഖ്വയ്ദയുടെ ഘടക സംഘടനയായ ‘അൻസാർ ഗാസ്‌വത്-ഉൽ-ഹിന്ദ്’ (AGuH) ആണ് ആക്രമണത്തിന് പിന്നിലെന്ന് വെളിപ്പെടുത്തിയിരുന്നു. ഈ കണ്ടെത്തലുകളെ തികച്ചും ശരിവെക്കുന്നതാണ് ഇപ്പോൾ പുറത്തുവന്ന അന്താരാഷ്ട്ര റിപ്പോർട്ട്. ഫരീദാബാദിലെ അൽ-ഫലാഹ് സർവ്വകലാശാലയിലെ മുൻ അസിസ്റ്റന്റ് പ്രൊഫസറും ഹരിയാന സ്വദേശിയുമായ ഡോ. ഉമർ ഉൻ നബി എന്നയാളാണ് കാർ ബോംബ് ഓടിച്ചുകൊണ്ട് ആത്മഹത്യാ മുനമ്പിൽ സ്ഫോടനം നടത്തിയ പ്രധാന പ്രതിയെന്ന് അന്വേഷണ ഏജൻസികൾ സ്ഥിരീകരിച്ചിരുന്നു. എൻ.ഐ.എ തയാറാക്കിയ കുറ്റപത്രത്തിൽ പ്രധാന പ്രതി ഉൾപ്പെടെ 10 പേർക്കെതിരെയാണ് ക്രിമിനൽ ഗൂഢാലോചന കുറ്റം ചുമത്തിയിട്ടുള്ളത്.
അഫ്ഗാനിസ്ഥാനിലെ കാബൂൾ കേന്ദ്രമാക്കിയാണ് എ.ക്യു.ഐ.എസ് തലവന്മാർ പ്രവർത്തിക്കുന്നതെന്നും, പര പരമ്പരാഗത വലിയ യൂണിറ്റുകൾക്ക് പകരം ചെറുതും ചിതറിക്കിടക്കുന്നതുമായ അതീവ രഹസ്യ നെറ്റ്‌വർക്കുകളാണ് ഇവർ രൂപീകരിക്കുന്നതെന്നും യു.എൻ സുരക്ഷാ സമിതി കൂട്ടിച്ചേർത്തു. വലിയ തോതിലുള്ള ഡിജിറ്റൽ സാമ്പത്തിക ഇടപാടുകളും ക്രിപ്റ്റോ കറൻസികളും ഭീകരപ്രവർത്തനങ്ങൾക്കായി ഇവർ ഉപയോഗിക്കുന്നുണ്ട്. വിദ്യാസമ്പന്നരായ യുവാക്കളെയും ഡോക്ടർമാരെയും ഡിജിറ്റൽ പ്ലാറ്റ്‌ഫോമുകളിലൂടെ തീവ്രവാദ ആശയങ്ങളിലേക്ക് ആകർഷിച്ച് നടത്തുന്ന ഇത്തരം “വൈറ്റ് കോളർ” ഭീകരാക്രമണങ്ങൾ ആഗോള സുരക്ഷയ്ക്ക് തന്നെ വലിയ ഭീഷണിയാണെന്ന് അന്വേഷണ റിപ്പോർട്ടുകൾ അടിവരയിടുന്നു.
