ന്യൂയോർക്ക്: ഭീകരവാദത്തെയും 26/11 മുംബൈ ഭീകരാക്രമണക്കേസിലെ മുഖ്യസൂത്രധാരൻ ഹാഫിസ് സയീദിനെയും കുറിച്ചുള്ള മാധ്യമപ്രവർത്തകരുടെ ചോദ്യങ്ങൾക്കു മുന്നിൽ ഉത്തരംമുട്ടി ഒളിച്ചോടി പാക്കിസ്ഥാൻ പ്രധാനമന്ത്രി ഷെഹ്ബാസ് ഷെരീഫ്. ഐക്യരാഷ്ട്ര സംഘടനയുടെ 81-ാമത് പൊതുസഭയിൽ പങ്കെടുക്കാനെത്തിയ പാക്ക് പ്രധാനമന്ത്രിയെ യുഎൻ ആസ്ഥാനത്തിന്റെ കവാടത്തിലാണ് മാധ്യമപ്രവർത്തകർ വട്ടമിട്ടുപിടിച്ചത്. എന്നാൽ ചോദ്യങ്ങൾക്കു മുന്നിൽ മറുപടിയില്ലാതെ അദ്ദേഹം വഴുതിമാറുകയായിരുന്നു.
ഇന്ത്യൻ വാർത്താ ഏജൻസിയായ എഎൻഐയുടെ (ANI) റിപ്പോർട്ടർമാരാണ് യുഎൻ ആസ്ഥാനത്തേക്ക് പ്രവേശിക്കുന്നതിനിടയിലും മടങ്ങുന്നതിനിടയിലും ഷെഹ്ബാസ് ഷെരീഫിനോട് മൂർച്ചയുള്ള ചോദ്യങ്ങൾ ഉന്നയിച്ചത്.യുഎൻ ആസ്ഥാനത്തേക്ക് പ്രവേശിക്കുമ്പോൾ, “പ്രധാനമന്ത്രി, ഭീകരവാദികൾക്ക് ഒളിവുസങ്കേതം ഒരുക്കുന്നത് നിങ്ങൾ എന്ന് അവസാനിപ്പിക്കും?” എന്നായിരുന്നു ആദ്യ ചോദ്യം. എന്നാൽ ചോദ്യം കേട്ട ഭാവം നടിക്കാതെ ഷെരീഫ് തിടുക്കത്തിൽ അകത്തേക്ക് നടന്നു നീങ്ങി.
പിന്നീട് യോഗത്തിന് ശേഷം പുറത്തേക്ക് മടങ്ങുമ്പോഴും മാധ്യമപ്രവർത്തകർ അദ്ദേഹത്തെ വിട്ടില്ല. “ലഷ്കറെ തയ്യിബ തലവൻ ഹാഫിസ് സയീദിനെ വിചാരണ ചെയ്യാൻ പാക്കിസ്ഥാൻ എപ്പോഴാണ് തയ്യാറാകുക?” എന്നതായിരുന്നു രണ്ടാമത്തെ ചോദ്യം. ഈ ചോദ്യത്തിനും മറുപടി നൽകാൻ തയ്യാറാകാതെ അദ്ദേഹം സുരക്ഷാ ജീവനക്കാർക്കൊപ്പം സ്ഥലം വിടുകയായിരുന്നു. മാധ്യമപ്രവർത്തകരുടെ ചോദ്യങ്ങൾക്ക് മുന്നിൽ തലകുനിച്ചു നടക്കുന്ന പാക്ക് പ്രധാനമന്ത്രിയുടെ ദൃശ്യങ്ങൾ ഇതിനോടകം സോഷ്യൽ മീഡിയയിൽ വ്യാപകമായി പ്രചരിക്കുന്നുണ്ട്.
കഴിഞ്ഞ ദിവസങ്ങളിൽ ഐക്യരാഷ്ട്രസഭയിൽ ഇന്ത്യ പാക്കിസ്ഥാനെതിരെ അതിരൂക്ഷമായ വിമർശനം ഉന്നയിച്ചിരുന്നു. അതിർത്തികടന്നുള്ള ഭീകരവാദവും അയൽരാജ്യങ്ങളുടെ ഭൂമി കൈയ്യടക്കാനുള്ള മോഹങ്ങളും അവസാനിപ്പിച്ച്, കടക്കെണിയിലായ സ്വന്തം സമ്പദ്‌വ്യവസ്ഥയെ രക്ഷിക്കാനാണ് പാക്കിസ്ഥാൻ ശ്രമിക്കേണ്ടതെന്ന് ഇന്ത്യൻ നയതന്ത്രജ്ഞൻ ക്ഷിതിജ് ത്യാഗി തുറന്നടിച്ചിരുന്നു. അന്താരാഷ്ട്ര തലത്തിൽ ഇന്ത്യ സമ്മർദ്ദം ശക്തമാക്കുന്നതിനിടെയാണ് യുഎൻ ആസ്ഥാനത്തു വെച്ച് മാധ്യമപ്രവർത്തകരിൽ നിന്നും പാക്ക് പ്രധാനമന്ത്രിക്കു തിരിച്ചടി നേരിട്ടത്.
