യുഎഇയിൽ നിന്ന് ഇസ്രായേലിലേക്ക് പറക്കുകയായിരുന്ന ഫ്ലൈ ദുബായ് (FZ1073) വിമാനം തകർക്കാൻ ശ്രമിച്ച ഒമാനി സഹപൈലറ്റിന്റെ നീക്കം യാത്രക്കാരും ജീവനക്കാരും ചേർന്ന് തടഞ്ഞ സംഭവത്തിന്റെ നിർണായക ദൃശ്യങ്ങൾ പുറത്ത്. വിമാനത്തിലെ ക്യാപ്റ്റനും ഇന്ത്യൻ പൈലറ്റുമായ സ്മിത് മച്ചാറിനെ വെട്ടിപ്പരിക്കേൽപ്പിച്ച ശേഷമാണ് സഹപൈലറ്റ് വിമാനം അപകടപ്പെടുത്താൻ ശ്രമിച്ചത്. കോക്ക്പിറ്റിന് സമീപത്ത് നിന്ന് യാത്രക്കാരിലൊരാൾ പകർത്തിയ വീഡിയോ ദൃശ്യങ്ങളാണ് ഇപ്പോൾ പ്രചരിക്കുന്നത്. ഗുരുതരമായി പരിക്കേറ്റ് ചോരയിൽ കുളിച്ചു കിടക്കുമ്പോഴും കോക്ക്പിറ്റ് തുറന്ന് 174 യാത്രക്കാരുടെയും ജീവൻ രക്ഷിക്കാൻ ക്യാപ്റ്റൻ സ്മിത് മച്ചാറിന് സാധിച്ചു.
അടിയന്തര സാഹചര്യത്തിൽ വിമാനത്തിനുള്ളിൽ പരിഭ്രാന്തി പടരുമ്പോൾ അടിയന്തര വൈദ്യസഹായം അഭ്യർത്ഥിക്കുന്ന ജീവനക്കാരുടെ ശബ്ദവും ഡോക്ടറായ ഷോത മുസയേവ് എന്ന ഇസ്രായേലി പൗരൻ സഹായത്തിനെത്തുന്നതും ദൃശ്യങ്ങളിൽ കാണാം. പരിക്കേറ്റ ക്യാപ്റ്റൻ തനിക്ക് നേരെ പലതവണ ആക്രമണമുണ്ടായതായി വ്യക്തമാക്കുന്നുണ്ട്. തുടർന്ന് സൗദി അറേബ്യയിൽ വിമാനം അടിയന്തരമായി ഇറക്കിയ ശേഷമാണ് പരിക്കേറ്റ ക്യാപ്റ്റനെ വൈദ്യസംഘം ആശുപത്രിയിലേക്ക് മാറ്റിയത്.
ആക്രമണം നടത്തിയ ഒമാനി സഹപൈലറ്റിനെ വിമാനത്തിലെ ജീവനക്കാരും യാത്രക്കാരും ചേർന്ന് കെട്ടിയിട്ട് കീഴടക്കി. കൈകൾ പുറകോട്ട് കെട്ടി അക്രമിയെ നിലത്ത് ഇരുത്തിയിരിക്കുന്നതും അദ്ദേഹത്തിന്റെ വസ്ത്രങ്ങളിൽ രക്തക്കറ പുരണ്ടിരിക്കുന്നതും വീഡിയോയിൽ വ്യക്തമാണ്. ഇത് ഒരു ഭീകരാക്രമണമാണെന്നും പോലീസിനെ വിളിക്കണമെന്നും ജീവനക്കാർ ആവശ്യപ്പെടുന്നുണ്ട്. നിലവിൽ സൗദി കസ്റ്റഡിയിലായിരുന്ന അക്രമിയെ യുഎഇക്ക് കൈമാറിയിട്ടുണ്ട്. സംഭവത്തിന് പിന്നിൽ എന്തെങ്കിലും ഭീകരബന്ധമോ മുൻകൂട്ടി തയ്യാറാക്കിയ ഗൂഢാലോചനയോ ഉണ്ടോ എന്ന് അബുദാബി ഭരണകൂടം അന്വേഷിച്ചു വരികയാണ്.
