പുണെ: ആശുപത്രി വാസത്തിന് ശേഷം വീട്ടിൽ വിശ്രമത്തിൽ കഴിയുന്ന എൻസിപി (എസ്പി) അധ്യക്ഷൻ ശരദ് പവാറിനെ ഫോണിൽ വിളിച്ച് ആരോഗ്യവിവരങ്ങൾ ആരായുകയും വിശ്രമം നിർദേശിക്കുകയും ചെയ്ത് പ്രധാനമന്ത്രി നരേന്ദ്ര മോദി. ശരദ് പവാറിന്റെ മകളും പാർട്ടി എംപിയുമായ സുപ്രിയ സുലെ ഇനി രാജ്യത്തിന്റെ ഉത്തരവാദിത്വങ്ങൾ ഏറ്റെടുക്കാൻ പ്രാപ്തയാണെന്നും സുപ്രിയയും തങ്ങളും ചേർന്ന് രാജ്യത്തിന്റെ കാര്യങ്ങൾ നോക്കിക്കൊള്ളാമെന്നും മോദി ഫോൺ സംഭാഷണത്തിനിടെ പറഞ്ഞതായി ശരദ് പവാറിന്റെ അടുത്ത അനുയായിയും മുതിർന്ന നേതാവുമായ വിത്തൽ മണിയാർ വെളിപ്പെടുത്തി.
ബുധനാഴ്ച രാവിലെയാണ് പ്രധാനമന്ത്രി ശരദ് പവാറിനെ നേരിട്ട് ഫോണിൽ ബന്ധപ്പെട്ടത്. ഏറെ രാഷ്ട്രീയ പ്രധാന്യമുള്ള സഹോദരതുല്യമായ സ്നേഹത്തോടും ബഹുമാനത്തോടും കൂടിയാണ് മോദി സംസാരിച്ചതെന്ന് വിത്തൽ മണിയാർ മാധ്യമങ്ങളോട് പറഞ്ഞു. “സാഹേബ്, ദയവായി താങ്കൾ പൂർണമായി വിശ്രമിക്കണം. സുപ്രിയ ഇപ്പോൾ രാജ്യത്തിന്റെ കാര്യങ്ങൾ ഏറ്റെടുക്കാൻ സജ്ജയാണ്. സുപ്രിയയും ഞങ്ങളും ചേർന്ന് രാജ്യത്തെ ഭംഗിയായി നോക്കിക്കൊള്ളാം. താങ്കൾ വിശ്രമിക്കുക മാത്രമാണ് വേണ്ടത്. ഇതാണ് എന്റെ അഭ്യർഥന” – എന്നായിരുന്നു പ്രധാനമന്ത്രിയുടെ വാക്കുകൾ.
അടുത്തിടെ ആരോഗ്യപ്രശ്നങ്ങളെ തുടർന്ന് പൂണെയിലെ ആശുപത്രിയിൽ പ്രവേശിപ്പിക്കപ്പെട്ട ശരദ് പവാർ കഴിഞ്ഞ ദിവസമാണ് ഡിസ്ചാർജ് ആയി വീട്ടിൽ മടങ്ങിയെത്തിയത്. രാഷ്ട്രീയത്തിൽ എതിർചേരിയിലാണെങ്കിലും ശരദ് പവാറുമായി അടുത്ത വ്യക്തിബന്ധം സൂക്ഷിക്കുന്ന നേതാവാണ് നരേന്ദ്ര മോദി. ലോക്‌സഭാ തിരഞ്ഞെടുപ്പുകൾക്ക് ശേഷമുള്ള ദേശീയ രാഷ്ട്രീയ സാഹചര്യങ്ങളുടെയും മഹാരാഷ്ട്രയിലെ രാഷ്ട്രീയ സംഭവവികാസങ്ങളുടെയും പശ്ചാത്തലത്തിൽ, സുപ്രിയ സുലെയെക്കുറിച്ച് പ്രധാനമന്ത്രി നടത്തിയ ഈ പരാമർശം ദേശീയ തലത്തിൽ വലിയ രാഷ്ട്രീയ ചർച്ചകൾക്കാണ് വഴിതുറന്നിരിക്കുന്നത്.
