ടെഹ്‌റാൻ: മധ്യപൂർവേഷ്യയിൽ വീണ്ടും ആഗോള ഭീതിയുയർത്തി അമേരിക്കയ്‌ക്കും ശത്രുരാജ്യങ്ങൾക്കും കടുത്ത മുന്നറിയിപ്പുമായി ഇറാൻ സേന രംഗത്ത്. ഇറാനെതിരെ എന്തെങ്കിലും തരത്തിലുള്ള അധിനിവേശത്തിനോ സാഹസത്തിനോ മുതിർന്നാൽ ശത്രുക്കൾ കൊടുത്തേക്കേണ്ടി വരുന്ന വില ചിന്തിക്കാവുന്നതിനും അപ്പുറമായിരിക്കുമെന്നും, മേലിൽ ആക്രമണം നടത്താൻ അവർ ധൈര്യപ്പെടാത്ത വിധം അതിശക്തമായ തിരിച്ചടി നൽകുമെന്നും ഇറാൻ നാവികസേനയുടെ നോർത്തേൺ ഫ്ലീറ്റ് കമാൻഡർ റിയർ അഡ്മിറൽ മൊഹ്‌സെൻ റസാഖി വ്യക്തമാക്കി.
വടക്കൻ തീരദേശ നഗരമായ അസ്താരയിൽ നടന്ന ചടങ്ങിൽ സംസാരിക്കവെയാണ് അമേരിക്കൻ സൈന്യത്തെ ലക്ഷ്യമിട്ട് ഇറാനിയൻ നാവികസേനാ മേധാവി കടുത്ത ഭാഷയിൽ പ്രതികരിച്ചത്. രാജ്യത്തിന്റെ കര-നാവിക-വ്യോമ സേനാ വിഭാഗങ്ങൾ തമ്മിലുള്ള ഏകോപനം എക്കാലത്തെയും ഉയർന്ന ഘട്ടത്തിലാണെന്നും സമഗ്രമായ സുരക്ഷ ഉറപ്പാക്കാൻ ഇറാൻ നാവികസേനയുടെ കമാൻഡോകളും മിസൈൽ-ഡ്രോൺ യൂണിറ്റുകളും 24 മണിക്കൂറും സജ്ജമായി സമുദ്ര അതിർത്തികളിൽ നിലയുറപ്പിച്ചിട്ടുണ്ടെന്നും അദ്ദേഹം കൂട്ടിച്ചേർത്തു.
സാധാരണ ഗതിയിൽ യുദ്ധം അവസാനിപ്പിക്കുക എന്നതിൽ ഉപരിയായി, ശത്രുവിന് വൻ നാശനഷ്ടങ്ങളും അസഹ്യമായ പ്രതിസന്ധിയും സൃഷ്ടിക്കുക എന്ന തന്ത്രപരമായ പ്രതിരോധ രീതിയാണ് ഇറാൻ സ്വീകരിക്കുന്നത്. രാജ്യത്തിന്റെ അത്യാധുനിക മിസൈലുകൾ, ഡ്രോൺ സാങ്കേതികവിദ്യ, നാവിക ശേഷി, തന്ത്രപ്രധാനമായ ഭൂമിശാസ്ത്രപരമായ സ്ഥാനം, ജനങ്ങളുടെ നിശ്ചയദാർഢ്യം എന്നിവയാണ് ഇറാന്റെ പ്രധാന കവചം.
ഇറാൻ വാർത്താ ഏജൻസിയായ ഐ.ആർ.എൻ.എ (IRNA) ആണ് ഇറാന്റെ സൈനിക തലവന്റെ മുന്നറിയിപ്പ് വാർത്ത പുറത്തുവിട്ടത്. പശ്ചിമേഷ്യയിൽ അമേരിക്കൻ സേന താവളങ്ങൾ കേന്ദ്രീകരിച്ച് നിരീക്ഷണം ശക്തമാക്കുകയും നീക്കങ്ങൾ സജീവമാക്കുകയും ചെയ്ത പശ്ചാത്തലത്തിൽ, ഇറാന്റെ ഭാഗത്തുനിന്നുണ്ടായ ഈ കടുത്ത മുന്നറിയിപ്പ് മേഖലയിൽ വീണ്ടും യുദ്ധഭീതി ഇരട്ടിയാക്കിയിരിക്കുകയാണ്.
