ഇന്ത്യൻ നാഷണൽ കോൺഗ്രസ് പാർട്ടിക്ക് ലഭിക്കുന്ന വൻകിട സാമ്പത്തിക സംഭാവനകളിൽ വൻ ഇടിവ്. 2025-26 സാമ്പത്തിക വർഷത്തിൽ 20,000 രൂപയ്ക്ക് മുകളിലുള്ള സംഭാവനകളുടെ തുക 130.69 കോടി രൂപയായി കുത്തനെ കുറഞ്ഞു. കഴിഞ്ഞ സാമ്പത്തിക വർഷത്തിൽ ലഭിച്ച 517.39 കോടി രൂപയുമായി താരതമ്യം ചെയ്യുമ്പോൾ സംഭാവന തുകയിൽ ഏകദേശം 75 ശതമാനത്തിന്റെ ഇടിവാണ് ഉണ്ടായിരിക്കുന്നത്. കഴിഞ്ഞ ഒരു പതിറ്റാണ്ടിനിടയിൽ പാർട്ടിക്ക് ലഭിക്കുന്ന സംഭാവനകളിൽ ഉണ്ടാകുന്ന ഏറ്റവും വലിയ വാർഷിക തിരിച്ചടിയാണിതെന്ന് തിരഞ്ഞെടുപ്പ് കമ്മീഷന് സമർപ്പിച്ച റിപ്പോർട്ടുകൾ വ്യക്തമാക്കുന്നു.
പാർട്ടിക്ക് ഏറ്റവും കൂടുതൽ തുക നൽകിയിരുന്ന ‘പ്രൂഡന്റ് ഇലക്ടറൽ ട്രസ്റ്റ്’ വഴിയുള്ള സംഭാവന കുറഞ്ഞതാണ് ഈ തിരിച്ചടിക്ക് പ്രധാന കാരണമായത്. മുൻവർഷം 216.34 കോടി രൂപ നൽകിയ ട്രസ്റ്റ് ഇത്തവണ 25 കോടി രൂപ മാത്രമാണ് കോൺഗ്രസിന് നൽകിയത്. ഇതിൽ 88 ശതമാനത്തിന്റെ കുറവുണ്ടായി. സ്റ്റാർ സിമന്റ് (5 കോടി), സജ്ജൻ ഭജങ്ക (4 കോടി), പ്രേം കുമാർ ഭജങ്ക (2 കോടി) എന്നിവരാണ് പാർട്ടിക്ക് മറ്റ് വലിയ തുകകൾ നൽകിയ പ്രമുഖ വ്യക്തികളും സ്ഥാപനങ്ങളും. 2015-16 സാമ്പത്തിക വർഷത്തിൽ 86 ശതമാനത്തിന്റെ ഇടിവ് രേഖപ്പെടുത്തിയ ശേഷം ഇതാദ്യമായാണ് കോൺഗ്രസ് ഇത്രയും വലിയ ഫണ്ട് ദൗർലഭ്യം നേരിടുന്നത്.
അതേസമയം തിരഞ്ഞെടുപ്പ് കമ്മീഷന് നൽകിയ ഈ റിപ്പോർട്ടിൽ 20,000 രൂപയിൽ താഴെയുള്ള ചെറിയ സംഭാവനകളും അംഗത്വ ഫീസും കൂപ്പൺ വിൽപന വഴിയുള്ള തുകയും ഉൾപ്പെട്ടിട്ടില്ല. അതിനാൽ പാർട്ടിയുടെ ആകെ വരുമാനത്തിന്റെ പൂർണ്ണമായ വിവരങ്ങൾ അന്തിമ ഓഡിറ്റ് റിപ്പോർട്ട് പുറത്തുവന്ന ശേഷമേ വ്യക്തമാകൂ. ഇതിനുമുൻപ് 2024-25 വർഷത്തിൽ കൂപ്പൺ വിൽപനയിലൂടെ മാത്രം 350 കോടിയിലധികം രൂപ പാർട്ടി സമാഹരിച്ചിരുന്നു. വരുന്ന സംസ്ഥാന നിയമസഭാ തിരഞ്ഞെടുപ്പുകൾക്ക് മുന്നോടിയായി ഫണ്ടിലുണ്ടായ ഈ ഇടിവ് കോൺഗ്രസ് നേതൃത്വത്തിന് വലിയ വെല്ലുവിളിയായി മാറിയിട്ടുണ്ട്.
