ഇസ്‌ലാമാബാദ്: സാമ്പത്തിക പ്രതിസന്ധിയും രാഷ്ട്രീയ അസ്ഥിരതയും മൂലം പാകിസ്ഥാൻ തകർച്ചയുടെ വക്കിലെത്തി നിൽക്കെ, രാജ്യത്തെ സമ്പത്തും വിഭവങ്ങളും കൊള്ളയടിച്ച് ഭരണവർഗവും സൈനിക മേധാവികളും വിദേശത്തേക്ക് കടക്കാൻ ഒരുങ്ങുന്നതായി ഞെട്ടിക്കുന്ന റിപ്പോർട്ട്. സെന്റർ ഫോർ പീസ് സ്റ്റഡീസ് (Centre for Peace Studies) പുറത്തുവിട്ട റിപ്പോർട്ടിലാണ് പാകിസ്ഥാനിലെ അഴിമതിയുടെയും സൈനിക ആധിപത്യത്തിന്റെയും ദുരന്തചിത്രം വ്യക്തമാക്കുന്നത്. രാജ്യത്തെ സാധാരണ ജനങ്ങൾ കടുത്ത ദാരിദ്ര്യത്തിലും പട്ടിണിയിലും കഴിയുമ്പോഴാണ് ഉന്നത ഉദ്യോഗസ്ഥരും രാഷ്ട്രീയക്കാരും തങ്ങളുടെ ഭാവി സുരക്ഷിതമാക്കാൻ രാജ്യം വിടുന്നത്.
പാകിസ്ഥാൻ നാഷണൽ അസംബ്ലിയിൽ സമർപ്പിച്ച ഔദ്യോഗിക കണക്കുകൾ പ്രകാരം, 2026-ന്റെ ആദ്യ പകുതിയിൽ മാത്രം 3.17 ലക്ഷത്തിലധികം ആളുകളാണ് തൊഴിൽ തേടി രാജ്യം വിട്ടത്. 2024 മുതൽ 2026 വരെയുള്ള കാലയളവിൽ 18.7 ലക്ഷത്തിലധികം പൗരന്മാർ പാകിസ്ഥാൻ ഉപേക്ഷിച്ചു. ഇതിനുപുറമേ 2,500-ലധികം മുതിർന്ന ഫെഡറൽ ഉദ്യോഗസ്ഥരും ഐ.എ.എസ്-പോലീസ് തലപ്പത്തുള്ളവരും ഇരട്ട പൗരത്വം നേടിയിട്ടുണ്ടെന്നും ഇവരിൽ ഭൂരിഭാഗം പേരും തങ്ങളുടെ വിദേശത്തെ വൻ സ്വത്തുക്കൾ മറച്ചുവെച്ചിരിക്കുകയാണെന്നും കണക്കുകൾ വ്യക്തമാക്കുന്നു. പോർച്ചുഗൽ ഉൾപ്പെടെയുള്ള യൂറോപ്യൻ രാജ്യങ്ങളിലെ നിക്ഷേപ അധിഷ്ഠിത റെസിഡൻസി പദ്ധതികളാണ് (Golden Visa) പാക് പ്രമുഖർ കൂടുതലായി ഉപയോഗപ്പെടുത്തുന്നത്.
പാകിസ്ഥാൻ സർവീസിലിരിക്കെത്തന്നെ ഇവർ വിദേശ പൗരത്വത്തിനായി ആസൂത്രിതമായി നീക്കം നടത്തിയത് രാജ്യത്തോടുള്ള വഞ്ചനയാണെന്ന് പാക് പ്രതിരോധ മന്ത്രി ഖവാജ ആസിഫ് തന്നെ തുറന്നുപറഞ്ഞിരുന്നു. ഇതിനിടെ വിരമിച്ച എം.പിമാർക്കും സെനറ്റർമാർക്കും ആജീവനാന്തം ഒഫീഷ്യൽ ബ്ലൂ പാസ്‌പോർട്ട് ഉപയോഗിക്കാൻ അനുമതി നൽകുന്ന പാസ്‌പോർട്ട് ഭേദഗതി ബിൽ 2026 ഒക്ടോബറിൽ പാകിസ്ഥാൻ സെനറ്റ് പാസാക്കുകയും ചെയ്തു. ജനറൽ അസീം മുനീറിന്റെ നേതൃത്വത്തിലുള്ള പാക് സൈന്യം ഖൈബർ പഖ്തുൻഖ്വയിലെ അപൂർവ്വ ധാതുക്കളും പ്രകൃതിവിഭവങ്ങളും കൈക്കലാക്കി വൻതോതിൽ പണം സമ്പാദിച്ച് വിദേശത്തേക്ക് മാറ്റുകയാണെന്നും, പ്രകൃതിയും വിഭവങ്ങളും നശിപ്പിക്കപ്പെടുന്ന പ്രാദേശിക ജനതയ്ക്ക് രോഗവും ദാരിദ്ര്യവും മാത്രമാണ് മിച്ചമെന്നും റിപ്പോർട്ട് അടിവരയിടുന്നു.
