ദീപാവലി ആഘോഷങ്ങളുടെ പശ്ചാത്തലത്തിൽ പാകിസ്ഥാനിലെയും ലോകമെമ്പാടുമുള്ളതുമായ ഹിന്ദു സമൂഹത്തിന് ആശംസകൾ നേർന്ന് പാകിസ്ഥാൻ പ്രധാനമന്ത്രി ഷെഹ്ബാസ് ഷെരീഫ്. വിദ്വേഷത്തിനും അസഹിഷ്ണുതയ്ക്കും നിരാശയ്ക്കും മേൽ പ്രകാശവും പ്രതീക്ഷയും കൈവരിക്കുന്ന വിജയത്തിന്റെ പ്രതീകമാണ് ദീപാവലിയെന്ന് അദ്ദേഹം സോഷ്യൽ മീഡിയ പ്ലാറ്റ്‌ഫോമായ എക്‌സിൽ പങ്കുവെച്ച സന്ദേശത്തിൽ കുറിച്ചു. പാകിസ്ഥാനിലെ ന്യൂനപക്ഷങ്ങളുടെ അവകാശങ്ങൾ സംരക്ഷിക്കപ്പെടുമോയെന്ന അന്താരാഷ്ട്ര ആശങ്കകൾക്കിടയിലാണ് പ്രധാനമന്ത്രിയുടെ ഈ അത്യപൂർവ്വ പ്രതികരണം പുറത്തുവന്നത്.
പാകിസ്ഥാന്റെ ദേശീയ അടിത്തറയിലെ അവിഭാജ്യ ഘടകമാണ് അവിടുത്തെ ഹിന്ദു സമൂഹമെന്ന് ഷെഹ്ബാസ് ഷെരീഫ് വിശേഷിപ്പിച്ചു. രാജ്യത്തിന്റെ സാമൂഹിക, സാംസ്‌കാരിക, സാമ്പത്തിക മേഖലകളിൽ ഹിന്ദു സമൂഹം നൽകുന്ന സംഭാവനകൾ ഏറെ പ്രശംസനീയമാണെന്നും, വൈവിധ്യമാർന്ന മത-സാംസ്‌കാരിക പാരമ്പര്യങ്ങളാണ് പാകിസ്ഥാന്റെ യഥാർത്ഥ സമ്പത്തെന്നും അദ്ദേഹം കൂട്ടിച്ചേർത്തു. വ്യത്യസ്ത വിശ്വാസങ്ങൾ നിലനിൽക്കുമ്പോഴും പരസ്പര ബഹുമാനത്തോടെയും സമാധാനത്തോടെയും ഒന്നിച്ചുജീവിക്കുക എന്ന സന്ദേശമാണ് ദീപാവലി നൽകുന്നതെന്ന് അദ്ദേഹം അഭിപ്രായപ്പെട്ടു.
രാജ്യത്തെ ന്യൂനപക്ഷങ്ങളുടെ മതസ്വാതന്ത്ര്യവും പൗരാവകാശങ്ങളും ഭരണഘടന ഉറപ്പുനൽകുന്നുണ്ടെന്നും അത് പൂർണ്ണമായും സംരക്ഷിക്കാൻ സർക്കാരിന് പ്രതിബദ്ധതയുണ്ടെന്നും പാക് പ്രധാനമന്ത്രിയുടെ ഓഫീസ് പുറത്തിറക്കിയ ഔദ്യോഗിക പത്രക്കുറിപ്പിൽ വ്യക്തമാക്കി. ജാതി-മത വിവേചനമില്ലാതെ എല്ലാ പൗരന്മാർക്കും തുല്യനീതിയും മാന്യമായ ജീവിതവും ഉറപ്പാക്കുമെന്നും ഷെഹ്ബാസ് ഷെരീഫ് ഉറപ്പുനൽകി. പാകിസ്ഥാൻ പ്രസിഡന്റ് ആസിഫ് അലി സർദാരിയും ഹിന്ദു സമൂഹത്തിന് ദീപാവലി ആശംസകൾ നേർന്നു.
