നടി അതുല്യ ചന്ദ്ര ഉൾപ്പെട്ട കേസിലെ നാടകീയ തിരിച്ചടികൾക്ക് പിന്നാലെ ബലാത്സംഗക്കേസിൽ മുൻകൂർ ജാമ്യം തേടി ഡോ. ജോൺസൺ വർഗീസ് കോടതിയിൽ. എറണാകുളം ജില്ലാ സെഷൻസ് കോടതിയിലാണ് ഡോക്ടർ ജാമ്യാപേക്ഷ സമർപ്പിച്ചത്. ഇൻഫോപാർക്ക് പോലീസ് സ്റ്റേഷനിൽ രജിസ്റ്റർ ചെയ്ത കേസിനെതിരെയാണ് ഡോ. ജോൺസൺ വർഗീസ് നിയമപോരാട്ടത്തിന് ഒരുങ്ങുന്നത്. താൻ ഒരു പ്രൊഫഷണൽ ഡോക്ടറാണെന്നും തനിക്കെതിരെ ഉയർന്ന ആരോപണങ്ങൾ തികച്ചും കെട്ടിച്ചമച്ചതാണെന്നും ഹർജിയിൽ വ്യക്തമാക്കുന്നു.
നടി അതുല്യ ചന്ദ്രയും സംഘവും ചേർന്ന് തന്നെ ക്രൂരമായി മർദ്ദിച്ചുവെന്ന് കാണിച്ച് ഡോ. ജോൺസൺ വർഗീസ് പോലീസിൽ പരാതി നൽകിയിരുന്നു. ഇതിന് പിന്നാലെ പ്രതിരോധ തന്ത്രത്തിന്റെ ഭാഗമായി നടിയുടെ ബന്ധു നൽകിയ വ്യാജ പരാതിയാണ് തനിക്കെതിരെയുള്ള ബലാത്സംഗക്കേസെന്ന് ഡോക്ടർ ജാമ്യാപേക്ഷയിൽ ആരോപിക്കുന്നു. ഒരുമിച്ച് മദ്യപിക്കുകയും ഒരേ മുറിയിൽ താമസിക്കുകയും ചെയ്തത് പരസ്പര സമ്മതത്തോടെയുള്ള കാര്യങ്ങളാണെന്നും അതിനെ ബലാത്സംഗമായി ചിത്രീകരിക്കാൻ കഴിയില്ലെന്നുമാണ് ഡോക്ടറുടെ വാദം.
തന്റെ വ്യക്തിത്വത്തെയും പ്രൊഫഷണൽ ജീവിത്തെയും തകർക്കാൻ ബോധപൂർവ്വമായ നീക്കമാണ് നടക്കുന്നതെന്നും പോലീസ് അന്വേഷണവുമായി പൂർണ്ണമായി സഹകരിക്കാൻ തയ്യാറാണെന്നും അതിനാൽ അറസ്റ്റ് തടയണമെന്നും മുൻകൂർ ജാമ്യാപേക്ഷയിൽ ആവശ്യപ്പെട്ടിട്ടുണ്ട്. കേസിൽ ഇൻഫോപാർക്ക് പോലീസ് അന്വേഷണം ഊർജ്ജിതമാക്കിയിരിക്കുകയാണ്. ഡോക്ടറുടെ ജാമ്യാപേക്ഷ എറണാകുളം ജില്ലാ സെഷൻസ് കോടതി ഉടൻ പരിഗണിക്കും.
