തൃശൂർ: ബിജെപി സംസ്ഥാന വൈസ് പ്രസിഡന്റ് ബി. ഗോപാലകൃഷ്ണന്റെ വീട്ടിലെത്തി കുടുംബാംഗങ്ങളെ സന്ദർശിച്ച മെഗാസ്റ്റാർ മമ്മൂട്ടിക്കെതിരെ സാമൂഹ്യമാധ്യമങ്ങളിൽ ഉണ്ടായ സൈബർ ആക്രമണങ്ങൾക്കെതിരെ ശക്തമായ പ്രതികരണവുമായി ബി. ഗോപാലകൃഷ്ണൻ രംഗത്ത്. രാഷ്ട്രീയ അഭിപ്രായവ്യത്യാസങ്ങൾക്കപ്പുറമുള്ള മനുഷ്യസ്നേഹത്തിന്റെയും സൗഹൃദത്തിന്റെയും ഭാഗമായുള്ള സന്ദർശനത്തെ വിവാദമാക്കുന്നത് സങ്കുചിത ചിന്താഗതിയാണെന്ന് അദ്ദേഹം വ്യക്തമാക്കി.
മമ്മൂട്ടി തന്റെ വീട്ടിലെത്തിയതിനെ ചിലർ രാഷ്ട്രീയവൽക്കരിക്കാൻ ശ്രമിക്കുന്നത് അപലപനീയമാണ്. രാഷ്ട്രീയത്തോടൊപ്പം തന്നെ വ്യക്തിപരമായ സൗഹൃദങ്ങൾക്കും കേരളത്തിൽ വലിയ സ്ഥാനമുണ്ട്. എന്നാൽ ഇതിന്റെ പേരിൽ നടത്തുന്ന സൈബർ ആക്രമണങ്ങൾ സിപിഎമ്മിന്റെ ഔദ്യോഗിക നിലപാടല്ലെന്നും, മറിച്ച് സിപിഎം പേരിൽ നടക്കുന്ന ചില പ്രത്യേക താൽപ്പര്യക്കാരുടെ ഗൂഢശ്രമമാണെന്നും ഗോപാലകൃഷ്ണൻ തുറന്നടിച്ചു.
വ്യക്തിബന്ധങ്ങൾക്ക് വില കൽപ്പിക്കുന്ന മനുഷ്യരെ ഇത്തരം സങ്കുചിത ആക്രമണങ്ങളിലൂടെ വേട്ടയാടുന്നത് അംഗീകരിക്കാനാകില്ലെന്നും, സൗഹൃദങ്ങളുടെ ‘ലക്ഷ്മണരേഖ’ ലംഘിച്ചുകൊണ്ടുള്ള ഇത്തരം സൈബർ രാഷ്ട്രീയത്തിന് അറുതിവരുത്തണമെന്നും അദ്ദേഹം ആവശ്യപ്പെട്ടു.
