നിതേഷ് തിവാരിയുടെ സംവിധാനത്തിൽ ഒരുങ്ങിയ ബ്രഹ്മാണ്ഡ ചിത്രം ‘രാമായണ പാർട്ട് 1’ ഇന്ത്യൻ ബോക്സോഫീസിൽ ചരിത്രം തിരുത്തിക്കുറിക്കുകയാണ്. റിലീസ് ചെയ്ത് വെറും നാല് ദിവസങ്ങൾ പിന്നിടുമ്പോൾ ആഗോളതലത്തിൽ 500 കോടി രൂപയുടെ ഗ്രോസ് കളക്ഷൻ എന്ന നാഴികക്കല്ല് പിന്നിടാൻ ഒരുങ്ങുകയാണ് ചിത്രം.
മുൻകാല സൂപ്പർ ഹിറ്റ് ചിത്രങ്ങളായ സൽമാൻ ഖാന്റെ ‘ടൈഗർ 3’, പ്രഭാസിന്റെ ‘ആദിപുരുഷ്’ തുടങ്ങിയ വമ്പൻ ചിത്രങ്ങളുടെ ആദ്യ ദിവസങ്ങളിലെ കളക്ഷൻ റെക്കോർഡുകളെയും ബോക്സോഫീസ് ട്രെൻഡുകളെയും നിഷ്പ്രഭമാക്കിയാണ് രാമായണയുടെ കുതിപ്പ്. രൺബീർ കപൂറിന്റെയും റോക്കി ഭായ് യഷിന്റെയും (Yash) മാസ്മരിക പ്രകടനവും, ചിത്രത്തിന്റെ വിഷ്വൽ എഫക്റ്റുകളുമാണ് തിയേറ്ററുകളിലേക്ക് ആളുകളെ വൻതോതിൽ ആകർഷിക്കുന്നത്.
ബുക്ക് മൈ ഷോ അടക്കമുള്ള ടിക്കറ്റിംഗ് പ്ലാറ്റ്‌ഫോമുകളിൽ മണിക്കൂറിൽ ലക്ഷക്കണക്കിന് ടിക്കറ്റുകൾ വിറ്റഴിച്ച് റെക്കോർഡ് സൃഷ്ടിച്ച ഈ ചിത്രം, ഇന്ത്യൻ സിനിമയുടെ ഇതുവരെയുള്ള എല്ലാ ബോക്സോഫീസ് കണക്കുകളും തിരുത്തിക്കുറിക്കുമെന്നാണ് ട്രേഡ് അനലിസ്റ്റുകളുടെ വിലയിരുത്തൽ. ഉത്തരേന്ത്യൻ സംസ്ഥാനങ്ങൾക്ക് പുറമെ കേരളത്തിലും മറ്റ് ദക്ഷിണേന്ത്യൻ സംസ്ഥാനങ്ങളിലും ചിത്രത്തിന് മികച്ച സ്വീകാര്യതയാണ് ലഭിക്കുന്നത്.
