ന്യൂഡൽഹി: ദീപാവലി ആഘോഷം കുടുംബത്തിന് കണ്ണീരായി മാറി. ഡല്‍ഹിയിലെ നറേലയില്‍ ദീപാവലി ആഘോഷത്തിനിടെ കയ്യിലിരുന്ന് പടക്കം പൊട്ടി പത്തുവയസുകാരന് ദാരുണാന്ത്യം. കുടുംബാംഗങ്ങള്‍ക്കൊപ്പം ആഘോഷത്തില്‍ പങ്കെടുത്ത റിഷിയെന്ന കുട്ടിയാണ് മരിച്ചത്.
പടക്കത്തിന് തീ കൊളുത്തി മുകളിലേക്ക് പടക്കെ എറിഞ്ഞതായിരുന്നു. ആകാശത്തേക്ക് എറിഞ്ഞ പടക്കം തിരിച്ച് കുട്ടിയുടെ നെഞ്ചിലേക്ക് തന്നെ പതിക്കുകയും പൊട്ടിത്തെറിക്കുകയുമായിരുന്നു.
ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ല
സാരമായി പൊള്ളലേറ്റ കുട്ടിയെ ഉടന്‍ തന്നെ സത്യവതി രാജ ഹരിശ്ചന്ദ്ര ആശുപത്രിയില്‍ പ്രവേശിപ്പിച്ചുവെങ്കിലും ജീവന്‍ രക്ഷിക്കാനായില്ല.
ഡല്‍ഹിയില്‍ കനത്ത ജാഗ്രതയും പരക്കെ അപകടങ്ങളും
ദീപാവലി ദിവസത്തിന്റെ ഭീകരാവസ്ഥ വ്യക്തമാക്കുന്ന കണക്കുകളാണ് ഡല്‍ഹിയിലെ അഗ്നിരക്ഷാ സേന പുറത്തുവിട്ടത്. ദീപാവലി ദിവസം മാത്രം 257 എമര്‍ജന്‍സി കോളുകളാണ് സേനയ്ക്ക് ലഭിച്ചത്.
ഇതില്‍ 214 എണ്ണവും പടക്കം പൊട്ടിയും അല്ലാതെയുമുള്ള തീ പിടിത്തങ്ങളുമായി ബന്ധപ്പെട്ടതായിരുന്നു. 24 പേരാണ് പടക്കം പൊട്ടിയുള്ള പൊള്ളലിനെ തുടര്‍ന്ന് സഹായം തേടിയത്.
രാത്രി എട്ടു മുതല്‍ പത്തുവരെ മാത്രം 85 ഫോണ്‍ കോളുകളും, പത്തിനും അര്‍ധരാത്രിക്കുമിടയില്‍ 61 ഫോണ്‍ കോളുകളും ലഭിച്ചു. നഗരത്തില്‍ വിവിധയിടങ്ങളിലുണ്ടായ അപകടങ്ങളില്‍ രക്ഷാപ്രവര്‍ത്തനത്തിന് പോയ അഞ്ച് അഗ്നിരക്ഷാ സേന പ്രവര്‍ത്തകര്‍ക്കും പരുക്കേറ്റിട്ടുണ്ട്.
