കണ്ണൂർ: ചൊക്ലി പെരിങ്ങത്തൂർ സ്വദേശിയായ പതിനേഴുകാരൻ ശിവസൂര്യയെ കാണാതായിട്ട് മൂന്ന് മാസം പിന്നിട്ടിട്ടും ഒരു തുമ്പും ലഭിക്കാത്തതിനെ തുടർന്ന് ക്രൈംബ്രാഞ്ച് ലുക്ക് ഔട്ട് നോട്ടീസ് പുറത്തിറക്കി. കുട്ടിയെക്കുറിച്ച് യാതൊരു വിവരവും ലഭിക്കാത്ത സാഹചര്യത്തിലാണ് അന്വേഷണം കൂടുതൽ വ്യാപിപ്പിക്കുന്നതിനായി ലുക്ക് ഔട്ട് നോട്ടീസ് പുറപ്പെടുവിച്ചത്.
കണ്ണൂർ ചൊക്ലി രാമവിലാസം ഹയർ സെക്കൻഡറി സ്കൂളിലെ വിദ്യാർത്ഥിയായ ശിവസൂര്യയെ കഴിഞ്ഞ ഓഗസ്റ്റ് എട്ടിനാണ് കാണാതാകുന്നത്.
“ഞാൻ കാശിക്ക് പോകുന്നു, ഇനിയുള്ള ജീവിതം അവിടെ ജീവിച്ച് ദൈവത്തിൽ അലിയും” എന്നെഴുതി വെച്ചാണ് ശിവസൂര്യ വീട് വിട്ടിറങ്ങിയത്.
മൊബൈൽ ഫോൺ മാറ്റി വെച്ചതിലെ പ്രതിഷേധം
വീട്ടുകാർ മൊബൈൽ ഫോൺ വാങ്ങി വെച്ചതിലുള്ള പ്രതിഷേധത്തെ തുടർന്നാണ് ശിവസൂര്യ വീട് വിട്ടിറങ്ങിയത്. ഏകദേശം 3000 രൂപയോളവും എടുത്താണ് കുട്ടി പോയത്. ഓഗസ്റ്റ് 8-ന് ഉച്ചയ്ക്ക് 12:45-ന് പ്ലസ് വൺ വിദ്യാർത്ഥിയായ കുട്ടി സ്കൂൾ ബാഗുമായി പൂമരം ജംഗ്ഷൻ ഭാഗത്തേക്ക് നടന്നു പോകുന്നത് നാട്ടുകാരിൽ ചിലർ കണ്ടിരുന്നെങ്കിലും ജംഗ്ഷനിലെ സിസിടിവി ക്യാമറകളിൽ ദൃശ്യങ്ങൾ പതിഞ്ഞിരുന്നില്ല.
അന്വേഷണം കേരളത്തിന് പുറത്തേക്കും; ദുരൂഹത തുടരുന്നു
പ്രാദേശിക പോലീസിന്റെ നേതൃത്വത്തിൽ രൂപീകരിച്ച പ്രത്യേക അന്വേഷണ സംഘം കേരളത്തിനകത്തും പുറത്തും വിപുലമായ തിരച്ചിൽ നടത്തിയിരുന്നു.
കുട്ടി മൈസൂരുവിലേക്കോ കാശിയിലേക്കോ പോയിരിക്കാം എന്ന നിഗമനത്തിൽ വാരണാസി, രാമേശ്വരം, മൈസൂരു, മംഗളൂരു, ബെംഗളൂരു തുടങ്ങിയ സ്ഥലങ്ങളിലെല്ലാം പോലീസും ബന്ധുക്കളും തിരച്ചിൽ നടത്തി.
വാരണാസിയിൽ മാത്രം നൂറിലധികം സിസിടിവി ക്യാമറകൾ യുപി പോലീസിന്റെ സഹായത്തോടെ പരിശോധിച്ചെങ്കിലും യാതൊരു വിവരവും ലഭിച്ചില്ല.
കേസ് ഏറ്റെടുത്ത് ക്രൈംബ്രാഞ്ച് പ്രാദേശിക പോലീസിന്റെ അന്വേഷണത്തിൽ പുരോഗതിയില്ലാത്തതിനെ തുടർന്ന് നാട്ടുകാർ ആക്ഷൻ കമ്മിറ്റി രൂപീകരിക്കുകയും കുടുംബം ആഭ്യന്തരമന്ത്രിയെ കണ്ട് നിവേദനം നൽകുകയും ചെയ്തു. ഇതേത്തുടർന്നാണ് കേസ് ക്രൈംബ്രാഞ്ചിന് കൈമാറിയത്.
എന്നാൽ ക്രൈംബ്രാഞ്ച് അന്വേഷണം ഏറ്റെടുത്ത് ദിവസങ്ങൾ കഴിഞ്ഞിട്ടും കുട്ടിയെക്കുറിച്ച് സൂചനകളൊന്നും ലഭിക്കാത്ത സാഹചര്യത്തിലാണ് ഇപ്പോൾ ലുക്ക് ഔട്ട് നോട്ടീസ് പുറത്തിറക്കിയത്. ശിവസൂര്യയ്ക്ക് ഒളിവിൽ കഴിയാൻ മറ്റാരുടെയെങ്കിലും സഹായം ലഭിക്കുന്നുണ്ടോ എന്നും അന്വേഷണസംഘം സംശയിക്കുന്നുണ്ട്.
ശിവസൂര്യയെക്കുറിച്ച് എന്തെങ്കിലും വിവരം ലഭിക്കുന്നവർ ഉടൻ തന്നെ അടുത്തുള്ള പോലീസ് സ്റ്റേഷനിലോ ക്രൈംബ്രാഞ്ച് അന്വേഷണ സംഘത്തെയോ വിവരമറിയിക്കണമെന്ന് പോലീസ് അഭ്യർത്ഥിച്ചു.
